Read kumam Isaías 39 Bible Online

Isaías 39 - kumam bible

Isaías 39

¹Tuj tq'ijlalil lu tzaj t-sama'n Merodac-baladán jun u'j ex jun oyaj te Ezequías, tu'nju o tb'i tej tyab't Ezequías ex otoq b'anix. Toktoq Merodac-baladán te rey tuj Babilonia, aju tky'ajal Baladán.

²Atzunte Ezequías jaw tzalaj tej kypon qe sanjel ex xi tyek'un qe tq'inumab'l kye, saq pwaq ex q'an pwaq, kyuk'ix qe perjum ex ju aseyt tb'anilxix tuk'ix jatum k'u'n qe makb'il in che ajb'en tuj q'oj ex kykyaqil qe ja jatum k'u'n tq'inumab'l. Minti' jun ti'xti at tuj tja rey ex tuj enter tkawb'il minti'wt xi tyek'un kye.

³Xi'tzun Isaías aju t-sanjel Dios tuk'il rey Ezequías ex xi tqanin te kyja': —¿Jatum ẍe tzaj qe xinaq lu, ex ti saj kyma'n teya? —Ma che tzaj tuj jun tx'otx' najchaq wen, max ma che tzaj tuj Babilonia, chi Ezequías, xi ttzaq'we'n.

⁴Xi tqanintl Isaías te: —¿Ti ma kyil qe xjal lu tuj tjaya? Xi ttzaq'we'n Ezequías kyja': —Ma kyil tkyaqil aju at tuj njaye. Minti' jun ti'xti jatum k'u'n qe nq'inumab'le minti'wt ma txi nyek'une kye.

⁵Xitzun tma'n Isaías te Ezequías kyja': —B'intza aju ma tma Qman aju Tajaw Tkyaqil:

⁶Tzul q'ij tu'n kyxi q'i'n kykyaqil qe ti'xti ate' tuj tjaya ex tkyaqilju o b'aj kychmo'n qtzan t-xe'chela ojtxi ex aju kukx tchmet ja'lo, ex kxel q'i'n tkyaqil jlu tuj Babilonia. Minti' jun kyjel ten tzalu.

⁷Ex kyuk'ix junjun tiyjila che ul itz'j te tib'ajxi che xel q'i'n tuj Babilonia ex che okel te aj sanjelal tuj tja rey.

⁸Xitzun ttzaq'we'n Ezequías te Isaías: —Aju tqanil ma tzul ti'na, aju ma tzaj tma'n Qman teya, b'a'n te jlu. Ex tmatl: Akux itz'x qine qo tel tuj txub'txaj ex segurxix qo tel.