Read kumam Isaías 4 Bible Online

Isaías 4 - kumam bible

Isaías 4

¹Tuj tq'ijlalil tzul, tu'nju nik'xi xinaq che kyjel ten, k'okel kyq'on kyib' wuq xu'j te t-xu'jil jun xinaq ex kxel kyma'n kyja': Bay qeye, qu'nxe jaku tz'ok qkwentin qib'e ex qu'nxe jaku tz'ok qxb'alumin qib'e, noq o'kx tu'n toka te qchmile, tu'ntzun mi'n qele tuj qch'ixwiye.

²Tuj tq'ijlalil tzul, aju t-xul ju tronc ktzajel tu'n Qman tb'anilxix ke'yin ex nimxix tajwalil, ex aju twitz awal ktzajel tq'o'n tx'otx' k'okel te jun kyoklen ma'xix ex te nimb'il kye aj Israel, aqeju otoq che kyaj anq'in.

³Aqeju che kyjel anq'in tuj tnam Sión ex ate'x tuj Jerusalén ex at kyoklen tu'n kynajan ma chixin, k'okel kyb'i qe xjal xjansa'maj tu'n Qman.

⁴Ok tkub' kysentens aj Jerusalén tu'n Qman, knajsetel kyil tu'nju nim xjal kub' kyb'yo'n; ex ok tkub' kycastiw qe xu'j najl tuj tnam Sión, che tx'jetel, tu'n tel kytz'ilil.

⁵Tib'aj tkyaqil witz Sión ex kyib'aj qe xjal kychmon kyib' ma chixin, ktzajel tq'o'n Qman jun q'eq muj q'ijl, ex atzun qonik'an ktzajel tq'o'n jun spik'un ex tqan q'aq'. Ex kb'el ten tajwalil Qman tib'aj tkyaqil tnam,

⁶tu'ntzun kykwentinjtz xjal ex tu'n tajb'en te kolb'il kyib'; ex k'ajb'el te kyxmuj ok ttzaj ta'w kyaq q'ijl ex te kolb'il kyib' ok ttzaj jb'al ex kyq'iq' jb'al.