Read kumam Isaías 42 Bible Online

Isaías 42 - kumam bible

Isaías 42

¹Lu we nmajen lu, ex tzyu'n wu'ne tu'n tten tipumal, ma jaw nsk'o'ne ex in chin tzalaje ti'j. Ma noj tuj tanmi tu'n Nxewe tu'n t-xi tq'o'n aju nleye tz'aqlxix kye kykyaqil nasyon.

²Mlay jaw sch'in ex mlay jaw tq'ajq'ajel twi', mlay b'injtz tq'ajq'ajel twi' tuj cay.

³Mlay kub' ttoqin jumajx jun ajlaj potz'jni ex mlay kub' tyuptz'a'n aju mech noq in qusin. Axix tok il ti'j kkawil tuj tumelxix.

⁴Mlay sikt ex mlay tzaj b'aj tk'u'j okxi tb'inchet ju tz'aqlxix twitz tx'otx'. Qe tnam ttzi'yile mar che ayol ti'j tu'n kyb'inte ju t-xnaq'tzb'il, chi Qman.

⁵Ate Qman Dios kub' b'inchante kya'j ex xi tlik'u'n, a kub' b'inchante twitz tx'otx' ex tuk'ix ju in tzaj ch'iy twitz, a in q'onte kyanq'ib'l ex kyxew qe xjal najl twitz tx'otx', ex atzun jlu in tma'n Qman te tmajen:

⁶Aqine Dios in tzaj txkonte teya tu'nju tz'aqlxix qine, ex tzyu'n tq'ab'a wu'ne ex aqine kwentil teya; aya k'okel te nxele tu'n tkyuwset aju nyole kyjel b'ant ti'j wu'ne kyuk'il qe aj Israel, ex tu'n toka spik'un kye nasyon.

⁷Kjaqetel kywitz qe moẍ tu'na ex k'eletz ti'na qe xjal tuj pres ex tuj calabós jatum najlqe tuj qlolj.

⁸Aqine Jehová porke atzun nb'iye, ex mlay waq'e amb'il tu'n tjaw nimsa'n tb'i juntl ex tu'n kyok ten k'ulul kywitz qe tilb'ilal te nxele.

⁹Lu ma japun tkyaqil tqanil xi nq'o'ne ojtxi ex atzun ja'lo kxel nq'o'ne txqantl tqanil ak'aj; in xi nma'ne jlu tu'ntzun tel kynik'e ti'j na'nxtoq tb'ant, chi Dios.

¹⁰Kyb'itzanxe jun b'itz ak'aj te Qman; kynimsa'n jawe tb'i max ttxa'npun tx'otx'; ikx kyeye, aqeye in che b'ete tib'aj mar ex kyuk'ix qe txkup najl tuj, ax ikx qe tnam kykub'sa'n ttzi'yile mar kyuk'ix qe xjal najl kyuj.

¹¹Che tzalajx qe lugar tzqij tx'otx' kyuk'ix qe tnam ate' tuj, ax ikx qe lugar jatum kykub'sa'n qe tiyjil Cedar. Che b'itzan tu'n tzalajb'il qe xjal najl tuj tnam Sela, e tjaw tq'ajq'ajel kywi' max kywi' qe witz.

¹²Kynimsa'n jaw tb'i Qman ex kyq'onx chjonte te max kyuj qe tnam kykub'sa'n ttzi'yile mar.

¹³Kxel Qman q'ojlel ik tza'n jun q'ojlel nim tipun, ex kq'ojlel tuk'il nim tq'oj ik tza'n jun xjal kyuw tk'u'j tuj q'oj; kjawil tq'ajq'ajel twi', kjawil sch'in tu'n ttzyet q'oj ex kb'el kyi'j qe aj q'oj tu'n.

¹⁴Chi Qman kyja': Ma tz'el q'ij minti' ma chin q'ajte ex minti' jun yol o txi nma'ne, atzun ja'lo chin jawil sch'ine ik tza'n jun xu'j ok nnu'l itz'j tal, in ayayan ex in xjiq'b'an tk'u'j tu'n.

¹⁵Che b'ajel naj qe nmaq witz wu'ne, ex qe tal witz kb'ajel tzqij tkyaqil k'ul at twitz wu'ne, che okel qe nima wu'ne te jun tzqij tx'otx', ex che b'ajel tzqij qe najab'.

¹⁶Che xel wi'ne qe moẍ tuj b'e minti' ojtzqi'n kyu'n, che xel nẍaqlu'ne tuj ju b'e na'nx kylonte. Kch'expetel qlolj wu'ne tu'n tok te spik'un kywitz, ex aju tx'otx' nim tqan xaq tuj k'okel te chq'ajlaj. Kb'antel jlu wu'ne ex mlay tzik'x ti'j.

¹⁷Aqeju nno'k qe' kyk'u'j kyi'j tilb'ilal ex in kyma'n kye tilb'ilal kyja': Aqeye qdiose che chi, che elel oq ex ktzajel kych'ixwi, chi Dios.

¹⁸Aqeye chkyin kywi', kyb'intze; aqeye moẍ, kyke'yintze tu'ntzun tkyile.

¹⁹Moẍxix twitz nmajene kywitz kykyaqil xjal, ex chkyinxix twi' nsanjele kywitz kykyaqil. Moẍxix twitz aju sk'o'maj wu'ne kywitz kykyaqil, ex moẍxix twitz nmajene kywitz kykyaqil.

²⁰Nno'k tke'yin nim ti'xti, ex minti' nno'k tq'o'n tkwent ti'j; b'a'n b'in, ex minti' ch'in in tzaj tq'o'n twi' ti'j.

²¹O tzalaj Qman ti'j tu'n tok t-xnaq'tzb'il te ma'xix toklen ex tb'anilxix, tu'nju tz'aqlxix te.

²²Ex ma txi elq'a'n tkyaqilju at kye xjal lu, kykyaqil ma che ku'x lamo'n tuj jul ex ma che okx lamo'n tuj tze'; ma che'x q'i'n kyu'n xjal ex mi a'l jun b'a'n ttzoqpinte kye, ma che'x elq'a'n ex mi a'l jun tu'n tkolpinte kye.

²³¿Ex alkye jun kyeye jaku txi nimante jlu? ¿Alkye b'anin tten tu'n t-xi tb'i'n aju kb'ajel te tib'ajxi?

²⁴¿Alkye o q'onte amb'il kye aj Israel aqeju tiyjil Jacob, tu'n tkub' kyi'j ex tu'n kyxi elq'a'n? ¿Myapetzun ax tok a Qman o q'onte amb'il? E b'inchan il twitz Qman, minti' kub' tuj kywitz tu'n kyb'et tuj b'e xi yek'un kye ex minti' xi kyb'i'n aju t-xnaq'tzb'il.

²⁵Kyja'tzun o tzaj tq'oj Qman kyi'j ex kub' tq'o'n kycastiw tu'n jun q'oj nimxix wen, ex e okx q'o'n mer ik tza'n tuj jun q'aq' in k'ant wen, ex mi tu'n jlu minti' el kynik' ti'j. Maske nim o che k'ixb'isanjtz tu'n q'aq', pero minti' okx tuj kywi'.