Read kumam Isaías 43 Bible Online

Isaías 43 - kumam bible

Isaías 43

¹Atzun ja'lo, aqeye aj Israel tiyjil Jacob, ate Qman aju b'inchante kyeye chi kyja': Mi'n che xob'e porke ma che kolpete wu'ne; ti'j kyb'iye e tzaj ntxko'ne porke etzan qeye wu'ne.

²Qa il ti'j tu'n kyik'xe tuj a', aqine chin tele kyuk'ile, qa il ti'j tu'n kyik'xe kyuj nima, mlay che'x mulq'aje tjaq' a', ex qa il ti'j tu'n kyokx q'o'ne tuj q'aq', mlay che tz'e'ye ex mlay jaw julin q'aq' kyi'je.

³Porke aqine Dios aju Kymane, aju klol kyeye, ex aqine Dios Xjan kye aj Israel. Ma che'x nq'o'ne qe aj Egipto, qe aj Etiopía ex qe aj Sabá, tu'n tkub' kyi'j te kyxele tu'ntzun kykolpete.

⁴Ex nimxix nk'u'je kyi'je, ma' kyoklene tuj nwitze ex k'ujla'n qeye wu'ne. Noq tu'n kytene wuk'ile ex tu'n kykyaj anq'ine, ma che'x nq'o'ne qe xjal ex qe nasyon tu'n tkub' kyi'j te kyxele.

⁵Mi'n che xob'e porke lu qine atine kyuk'ile. Max tuj tx'otx' tuj tjawitz q'ij ex max jatum nne'x b'aj, che ajetz nchmo'ne qe kyxjalile tu'n kytene juntl maj junx.

⁶Kxel nma'ne teju lugar at tuj tb'anq'ab' q'ij kyja': Che tq'o'n ajtze, ex kxel nma'ne teju lugar at tuj tnayaj q'ij kyja': Mi'n che kyaj ttzyu'ne. Kyi'n ajtze qe nky'ajale ex qe nme'jele max ttxa'npun tx'otx' najchaq.

⁷Kykyaqil qeju tok nb'iye kyi'j, aqeju wu'ne, e b'ant tu'n tjaw kynimsa'n nb'iye.

⁸Kyi'ntze qe xjal etzan wu'ne, aqeju at tb'aq' kywitz pero moẍ qe, ex at kyẍkyin pero chkyin kywi'.

⁹B'a'n tu'n tok kychmon kyib' kykyaqil tnam ex kykyaqil nasyon tu'n kyok tuj xjel. ¿Alkye jun kyxol qe tnam lu otoq tma jlu ojtxi, ex qa otoq tzaj tq'o'n naj tqanil ti'j ju o b'aj te ojtxi? B'a'n tu'n ttzaj kyi'n testiw ti'j tu'n kymante qa ik tten jlu ex tu'n qb'inte ex tu'n tel qnik' ti'j qa ax tok kyyol.

¹⁰Chi Qman kyja': Aqeye testiw wi'je, ex aqeye nmajene e jaw nsk'o'ne tu'n wojtzqinjtze kyu'ne, tu'n tok qe' kyk'u'je wi'je ex tu'n tel kynik'e alkye qine. Mi a'l juntl dios o ten nej nwitze ex mi a'l juntl ktel te tib'ajxi.

¹¹O'kx qine Dios aju Kymane, mi a'l juntl jaku che klete tu'n.

¹²A qine in q'onte tqanil ex aqine in pakb'ante: Ma che klete wu'ne ex mya tu'n juntl dios, ax qeye testiw wi'je.

¹³Aqine Dios atxix ojtxi ex kukx ntene ja'lo. Mi a'l jun jaku tzoqpaj tuj nq'ab'e. Mi a'l jun jaku kub' q'uchinte ju in b'ant wu'ne.

¹⁴Ate Qman aju Dios Xjan kye aj Israel, ex aju tzoqpil kyeye chi kyja': Noq tu'nju at nk'ujlalile kyi'je, kxel nsama'ne txqan soldad tu'n kypon tuj Babilonia ex kykyaqil qe aj Caldeo che elel oq kyuj kybarc, aqeju nim in che tzalaj kyi'j.

¹⁵Aqine Dios aju Kymane, aju b'inchante kye aj Israel, aju Dios Xjan ex kyreye, chi Dios.

¹⁶Jaqet jun b'e ojtxi tu'n Qman tuj mar, jun b'e nno'kx tuj tmij a' in yukch wen,

¹⁷ex e je'tz ti'n txqan soldad nim kyipun, tuk'ix kycarwaj ex kychej, tu'ntzun kynaj tu'n. Kukx e kyaj pale' ex minti'tl o che jaw we', b'i'x e kub' b'aj ik tza'n jun mech in kub' yupj.

¹⁸Atzun ja'lo, chi Qman kye qe xjal etzan tu'n: Mi'n tzaj kyna'ntle aju o b'aj kyi'je ex mi'n che ximantle ti'j ju o b'aj ojtxi.

¹⁹Ex ok nb'incha'ye jun ti'xti ak'aj ex ok kyila'ye b'i'x ja'lo kb'antel. Kjaqetel jun b'e wu'ne tuj ju lugar minti' kynajb'il xjal tuj, ex che jawil jlet qe nima tuj tzqij tx'otx'.

²⁰Chin jawil nimsa'ne kyu'n qe jil te tjaq' k'ul, ik tza'n qe wech ex qe chyu'j avestrúz, ex kjawil jlet nim a' wu'ne tuj lugar minti' kynajb'il xjal tuj, ex che jawil jlet qe nima tuj tzqij tx'otx', tu'ntzun t-xi nq'o'ne te kyk'a' qe xjal etzan wu'ne ex sk'o'maj qe wu'ne.

²¹O nb'inchaye qe xjal lu tu'n tjaw kynimsa'n nb'iye tu'n kyb'itz.

²²Atzun kyeye aj Israel tiyjil Jacob, minti' e kub'sane nwitze, noq o'kx ma b'aj kyganiye wi'je.

²³Minti' ẍe kub' kyb'yo'ne qe ẍne'l tu'n tkub' kypatune tib'aj altar te jun oyaj te weye, ex minti' ẍin jaw kynimsa'ne kyu'n qeju chojb'il. Mya tu'nju in chin qanine oyaj kyeye ma che sikte, ex minti' ẍin q'ajte kyi'je tu'n tkub' kypatune storak.

²⁴Minti' ma che laq'one ti'j jun wiq ajlaj at tk'ok'jal tu'n ttzaj kyi'ne weye te kyoyaje, ex minti' tzaj kyq'o'ne t-sebyil alumaj weye te jun chojb'il tu'n ntzalaje ti'j. Noqpe ma chin yajlanjtze tu'n tlaj ju il in b'ant kyu'ne ex ma chin sikte tu'nju mya b'a'n in b'ant kyu'ne.

²⁵Pero noq tu'nju aqine Kydiose ma kub' nnajsa'ne kyile, tu'nju ma che ik'e tib'aj nleye, ex mlay tzaj nna'ntle.

²⁶Qa at jun wile tuj kywitze, b'a'n tu'n tok kyma'ne weye, tu'n qyolin ti'j ex tu'n tel nik'b'aj ti'j alkye at til. Kymantze qa jaku che ele twitz ex qa ax tok minti' kyile.

²⁷Aju tnejel kyxe'chele o b'inchan il, ex qe xnaq'tzal kyeye jaw kyi'n kyib' tu'n kyq'ojin wi'je.

²⁸Kyja'tzun kb'el nq'o'ne kych'ixwi qe nejenel in che ajb'en tuj njaye, ex kxel nq'o'ne amb'il tu'n kynaj ex tu'n kyok xmayin qe aj Israel, aqeju tiyjil Jacob.