Read kumam Isaías 44 Bible Online

Isaías 44 - kumam bible

Isaías 44

¹Chin kyb'intze ja'lo aqeye aj Israel tiyjil Jacob, aqeye nmajene sk'o'maj wu'ne.

²Aqine Kymane aju b'inchal kyeye, aju b'inchante kyeye tej na'nxtoq kyul itz'je ex onin qeye wu'ne. Aqeye aj Israel tiyjil Jacob, mi'n che xob'e, aqeye nmajene sk'o'maj wu'ne,

³ex kxel nq'o'ne a' tuj lugar minti' kynajb'il xjal tuj ex che jawil jlet qe nima wu'ne tuj tzqij tx'otx'. Ktzajel nq'o'ne Nxewe tu'n tten kyuk'il qe kyiyjile ex ktzajel nq'o'ne nky'iwb'ile kyib'aj kyk'wa'le.

⁴Che ch'iyel ik tza'n cha'x k'ul a'lin wen ex ik che okel ik tza'n qe tze' chjaj ate' ttzi nima.

⁵Ok tma jun kyja': Te Qman we qin, ex juntl k'okel tq'o'n tb'i tiyjil Jacob, ex juntl kb'el ttz'ib'an tib'aj tq'ab': Tetzb'il Qman we qin, ex k'okel tq'o'ntl Israel te juntl tb'i.

⁶Ate Qman, kyrey aj Israel ex kolpil kye ex Tajaw Tkyaqil, chi kyja': Aqine t-xe tnejel ex ax qine te b'ajsb'il; o'kx aqine Dios, minti' juntl.

⁷¿Atpe jun jaku pon ik tza'n qine? B'a'n tu'n tyolin ex tu'n ttzaj ttx'olb'a'n weye. ¿Atpe jun jaku tzaj tq'o'n jun tqanil ti'j ju kyja' ttzaj te tib'ajxi, ex tu'n tmante alkyeju ch'ix tjapun?

⁸Mi'n che sek'paje ex mi'n che xob'e. Bay weye o nmaye jlu ex xi nma'ne atxix ojtxi, aqeye testiw ti'j jlu. ¿Atpe juntl Dios? Minti', o'kx qine. Minti' juntl kolol kyi'je, minti' jun ojtzqi'n wu'ne.

⁹Kykyaqil qeju b'a'n che b'inchan tilb'ilal noqx gan qe, ex qeju tilb'ilal aqeju k'ujla'nxix kyu'n, minti' kyajb'en. Aqeju in che k'ulun kywitz, moẍ qe ex minti' nne'l kynik' ti'j, kyja'tzun kb'el kych'ixwi.

¹⁰Aju xjal in kub' b'inchante jun tilb'ilal tu'n tok te tdios ex tu'n tk'ulun twitz, noqx gan in naj tq'ij ti'j.

¹¹Kykyaqil qeju in che k'ulun kywitz qe tilb'ilal kb'el kych'ixwi. Aqeju b'inchal qe tilb'ilal, xjal qe. Noqwit junx che ul yek'ul kyib' tu'n kyok tuj xjel, jakulo kub' kych'ixwi ex jaku tzaj nim kyxob'il.

¹²B'a'n qu'n ti in tb'incha'n jun tx'inol k'uxb'il: In tzaj ti'n ju tz'qab', ex tb'ajlenxi kyaqix ju k'uxb'il tu'n q'aq', in b'aj ttx'ino'n ju k'uxb'il tu'n martiy tu'ntzun tb'ant aju taj tu'n tkub' tb'incha'n. In aq'nan ti'j tuk'il tipun tq'ab', ex qa minti' ma wa'n, in b'aj tipun, ex qa minti' ma k'an, in sikt.

¹³B'a'n qu'n alkye in tb'incha'n jun calpinter: In b'aj techan ju tze' tu'n metro, in b'aj tq'o'n techal tu'n lapis tuk'ix compás ex nno'k ten aq'nal ti'j tu'n tz'qab'. Kyja'tzun tten in b'ant jun tilb'ilal tu'n, ex in kyaj tq'o'n tilb'ilal mer ik tza'n tilb'ilal xjal ex mejor nno'k tu'n. Oktzun tb'ant, nno'kx tq'o'n tuj tja.

¹⁴In jaw ttx'emin xjal jun tze' wi'ten, ex qa tzis, ex qa jun wi' k'ol, aqeju in che ch'iy kyxol txqantl tze' tuj chk'ul. Ex qa in ku'x tawa'n jun wi' tzaj aju in ch'iy tu'n jb'al.

¹⁵Ti'j tze' lu nne'l kysi' xjal, in xi kyi'n junjun piẍ tu'n tokx tuj q'aq' tu'n kymeq't tu'n, ex junjuntl piẍ in che ajb'en tu'n ttzq'aj pan, atzun junjuntl in ajb'en kyu'n tu'n tb'ant jun tilb'ilal tu'n tok te kydios, ex in che kub' ẍmeje' twitz tu'n kyk'ulun te.

¹⁶Junjun piẍ tze' nno'kx kyq'o'n tuj q'aq' tu'n tokx txo't chib'j tib'aj; oktzun tb'aj chib'j txo'maj kyu'n, b'i'x in che noj tu'n. Ax ikx in che meq't tu'n q'aq' ex in kyma'n kyja': B'a'n ju q'aq', ch'ix qmeq't tu'n.

¹⁷Ex ti'j ttx'aqan tze' in b'aj kyb'incha'n jun tilb'ilal tu'n tok te kydios, in che kub' ẍmeje' tu'n kyk'ulun twitz, ex in che kub'san twitz, che chi kyja': Qo tkloma porke aya qdiose.

¹⁸Qe xjal lu minti' ch'in b'a'n kyu'n ex minti' nne'l kynik' ti'j, moẍ ta' kywitz, minti' in che ke'yin ex lamo'n tuj kynab'l, minti' nne'l kynik' ti'j.

¹⁹Minti' in che kub' ten ximal ti'j, atx taj tu'n tok kynab'l tu'n tel kynik' ti'j ex tu'n t-xi kyma'n: Mij tze' ma tz'okx qq'o'n tuj q'aq' ex tu'n t-xq'a'lil ma tzq'aj qwa pan, ma b'aj qtxo'n qchi' ex ma b'aj qu'n. ¿B'a'npetzun tu'n tb'ant qu'n jun tilb'ilal ik'b'il ti'jx ttx'aqan tze' lu? ¿B'a'npetzun tu'n qk'ulun twitz jun piẍ tze'? Che chiwt.

²⁰A jlu axix tok noqx gan, junx ta' ik tza'n tu'n t-xi qlo'n tza'j. Axju kynab'l xjal in sb'unte kye ex tu'ntzun jlu mlayx che klet. Mlayx tz'el kynik' ti'j noq tten ju tilb'ilal tzyu'n kyu'n ex mya dios.

²¹Aqeye aj Israel tiyjil Jacob, kyna'ntze qa aqeye nmajene; aqeye nmajene ex aqine in b'inchan kyeye. Aqeye aj Israel, mi'n tzik' nna'njtze kyu'ne.

²²Ma kub' naj kypaltile ex kyile wu'ne, ik tza'n in kub' naj muj. Kyajtz meltz'aje wuk'ile porke wu'ne ma che kolpete.

²³Aya kya'j, tjaw sch'ina tu'n tzalajb'il ti'j ju ma tb'incha Qman, ex aqeye lugar t-xe'pun tx'otx', che sch'ine tu'n tzalajb'il. Aqeye witz ex tal witz ex kykyaqil qe tze' ate' kywi'ye, che sch'ine tu'n nim tzalajb'il porke ma tzaj tyek'un Qman tajwalil tu'nju ma che kolpet qe aj Israel tu'n, aqeju tiyjil Jacob.

²⁴Atzun jlu in tma'n Qman aju kolpil kyeye, aju poq'sante kyeye tej na'nxtoq kyul itz'je: Aqine Dios aju kymane, aju b'inchal tkyaqil, wu'ne xi nlik'pu'ne kya'j ex kub' nq'uqb'a'ne tx'otx' ex mi jun o oninte weye.

²⁵Mlayx waq'e amb'il tu'n tjapun kyyol qe pakb'al nik'al yol; kb'ajel tzakt kynab'l qe xjal aj q'ij wu'ne. Che okel meltz'aj qe aj nab'l ti'jx kyyol ex aju kyojtzqib'l k'okel te noqx gan.

²⁶Ex wu'ne in japun kyyol qe nmajene, ex wu'ne nne'l b'a'n aju kyximb'etz qeju sama'n wu'ne. Kxel nma'ne tu'n kynajan juntl maj qe xjal tuj Jerusalén, ex qe tnam tuj tx'otx' Judá che jawil b'inchet, ex qe tnam otoq che kub' xitj che jawil b'inchet juntl maj.

²⁷Jaku txi nma'ne te nintz mar tu'n taj tzqij, ex kye qe nima tu'n taj tzqij a' kyuj.

²⁸Kxel nma'ne te rey Ciro kyja': Ma tz'ok nq'o'ne te kwentil qe xjal etzan wu'ne. Ok tb'incha'ya tkyaqilju wajb'ile ex kxel tma'na te tnam Jerusalén kyja': Kjawil b'incha'na juntl maj, ex kxel tma'na te njaye: Che b'el qe' t-simyentila.