Read kumam Isaías 46 Bible Online

Isaías 46 - kumam bible

Isaías 46

¹Aju kydios xjal Bel tb'i in kub' paqtz'aj ti'j, ex aju kydios xjal Nebo tb'i in kub' tz'aq twitz tx'otx'. Iqan in che'x qe tilb'ilal kyu'n chej ex puro al kyiqatz kyna'n qe chej otoq che sikt.

²Qe kydios xjal in che kub' paqtz'aj kyi'j ex in che kub' tz'aq twitz tx'otx', minti' in che jaw we' tu'n kyklet ex ax qe in che'x q'i'n pres tuj juntl tnam.

³Chin kyb'intze aqeye tiyjil Jacob, kykyaqile kyiyjil aj Israel, aqeye o che kyaj anq'ine, kykyaqil qeju ate'x tuj tnam Israel. Tej na'nxtoq kyul itz'je, tuj nkwente ate'ye, ex palo'n qeye wu'ne tej matoq ne'x qeye.

⁴Ex axwe qin ok kyoke te tij xjal; ok t-saqix kywi'ye, kukx tzyu'n qeye wu'ne tu'n tten kyipune. Aqine in b'inchante kyeye ex kukx che jawil wiqane, kukx kxel nq'o'ne kyipune ex che kletele wu'ne.

⁵¿Alkye juntl jaku che yoline ti'j qa ikx ik tza'n qine? ¿Alkye jun jaku pon ik tza'n qine tuj kywitze?

⁶At xjal in jatz kyi'n nim q'an pwaq tuj kych'u'ẍ ex nno'kx kymalo'n saq pwaq tuj balans; te tib'ajxi in b'ant jun kytrat tuk'il jun xjal at nim tnab'l tu'n taq'nan ti'j saq pwaq, tu'n tkub' tb'incha'n jun dios ex tu'n kykub' ẍmeje' k'ulul twitz.

⁷In jax kyq'o'n twi kysemil tu'n t-xi kyiqan ex in kub' kyq'o'n tuj jun lugar kyuw tten, ex axtzun in kyaj ten tuj tlugar, minti' in yukch. Maske ma che jaw sch'in tu'n kyqanin onb'il te, minti' in tzaj ttzaq'we'n ex mlay che klet tu'n ok ttzaj yajb'il kyi'j.

⁸Kyna'ntze jlu, aqeye mib'an che nimane, cheb'a che ximane ti'j ju o nb'inchaye.

⁹Kyna'ntze aju o b'aj tuj tq'ijlalil ojtxi. O'kx aqine Dios ex minti' juntl. Aqine Dios ex minti' juntl ik tza'n qine.

¹⁰In nq'o'ne tqanil atxix t-xe tnejel ti'j ju tzul te b'ajsb'il; in nq'o'ne tqanil atxix ojtxi ti'j ju kb'ajel tuj tq'ijlalil tzul. In xi nma'ne kyja': Aju o kub' nximane tu'n tb'ant, wu'ne kb'antel; kb'antel wu'ne tkyaqilju wajb'ile.

¹¹Ma tzaj ntxko'ne jun xjal tuj tjawitz q'ij, tzul te najchaq ik tza'n jun q'anjan ex kjapunel nximb'etze tu'n. O nmaye, ex iktzun kb'antel wu'ne; o kub' nximane alkye tu'n tb'ant wu'ne, ex kjapunelx.

¹²Chin kyb'intze aqeye xjal kyuw kyanmi, tuj kywitze qa najchaq ta' kolb'il kyeye:

¹³wu'ne tzul laq'e' aju kolpib'l kye xjal, aju kolb'il wu'ne mlay we', lu ch'ix tul kanun. Che kletel aj Sión wu'ne ex kxel nq'o'ne kyajwalil aj Israel, ik tza'n weye.