Read kumam Isaías 50 Bible Online

Isaías 50 - kumam bible

Isaías 50

¹Chi Qman kyja': Mi'n che ximane ti'j qa ma che kyaj nkoline qe aj Israel ik tza'n jun xinaq nne'x tlajo'n t-xu'jil, ex mi'n che ximane ti'j qa ma che'x nk'ayine qe tu'n kyok te majen tu'nju at kyk'as tuk'il juntl. E je'x nk'ayine qe aj Israel tu'n tlaj e b'inchan il, ex tu'nju el kypa'n kyib' wi'je ex e ok mib'an che niman.

²¿Tiqu'n mi a'l jun o knet wu'ne tej wule? ¿Tiqu'n mi a'l jun tzaj tzaq'wente weye tej ntxokone? ¿Baqa minti' wipumale tu'n kykolpete, ex baqa mlay che tzoqpete wu'ne? Noq tu'n jun nyole ok t-xi nma'ne, nna'j tzqij mar ex qe nima in che ok te tzqij tx'otx'; tu'n jlu in che b'aj kyim qe kyiẍ tu'n txqetle'n ex in che q'ay tu'nju minti' a'.

³Wu'ne nno'k yupj twitz kya'j ex b'is in kyaj.

⁴Ma tzaj q'o'n nnab'le tu'n Qman tu'n t-xi nma'ne jun yol te q'uqb'ab'l kyk'u'j qe xjal ma che sikt. Kykyaqil prim in chin jaw k'asune tu'n Qman tu'n t-xi nq'o'ne nwi'ye ti'j tyol, ik tza'n jun xnaq'tzb'en.

⁵A Qman ma tzaj q'onte nnab'le, minti' ma tz'el wik'une ex minti' ma chin el oqe ti'j.

⁶Xi nq'o'ne ttzal wi'je tu'n nb'aj asyaline ex minti' in q'ajte tej tjatz b'aqo'n nxmatze. Minti' el wewane nwitze kye qeju e ok yasonte weye ex kye qeju okx kytzub'an tuj nwitze.

⁷Ate Qman onil weye, kyja'tzun minti' tzaj nch'ixwiye kywitz qeju e ok yasonte weye, ex kyuw ntene ik tza'n jun pik, porke b'a'n wu'ne mlay kub' nch'ixwiye.

⁸Tkub' ju kolol wi'je ntxlaje: ¿Atpe jun at tq'oj wi'je? Qo' junx twitz jwes. ¿Atpe jun taj tu'n tmante alkye wile? E ttzaj wuk'ile ex e ttzaj tma'n weye.

⁹Ate Qman onil weye, ¿alkye jun jaku kub' q'onte nsentense? Kykyaqil aj q'oj wi'je che b'el naj ik tza'n jun xb'alun in b'aj tu'n pok'.

¹⁰Aqeye in che niman te Qman ex in xi kyb'i'ne aju in tma'n tmajen, qa in che b'ete tuj qlolj ex minti' ch'in spik'un tuj kyb'eye, tok qe' kyk'u'je ti'j Qman, kyoqxenanx kyib'e tuj tq'ab' Dios.

¹¹Ex kykyaqile aqeye nno'k kytxaqo'ne q'aq' ex in tzaj kytzyu'ne ttxa'n tzaj, che b'ete tuj t-spik'umal q'aq' ex che b'ete tuj t-spik'umal ttxa'n tzaj otoq tz'ok kytxaqo'ne. Ktzajel t-sama'n Qman aju castiw lu kyib'aje, ex ax che kyjel pale'ye tuj k'ixb'isab'l.