Read kumam Isaías 51 Bible Online

Isaías 51 - kumam bible

Isaías 51

¹Chin kyb'intze, aqeye kyajb'ile tu'n kyanq'ine tuj tumelxix ex aqeye in che jyon wi'je, chi Qman in tma'n: Kyke'yintze aju pik jatum e el tx'emine, ex aju lugar jatum in jatz ab'j axtzun e je'tz q'i'ne;

²che ximane ti'j Abraham aju kyxe'chele, ex che ximane ti'j Sara aju tzaj alinte kyeye. Tej ttxket Abraham wu'ne, tjunalxtoq te at, ex kub' nky'iwla'ne ex chmet-xix kyb'aj tiyjil wu'ne.

³Kxel nq'uqb'a'ne kyk'u'j aj Sión, aju tnam otoq kub' xitj tkyaqil. Aju tzqij tx'otx' k'okel wu'ne te tqan awal, ik tza'n tqan awal kub' nq'o'ne tuj Edén. Tuj tnam lu ktel tzalajb'il ex che tel xjal tuj txub'txaj, kxel kyb'itzan qe b'itz te aq'b'il chjonte te weye tuk'il tq'ajq'ajel twi chnab'.

⁴Aqeye xjal etzan wu'ne chin kyb'intze, aya nasyon sk'o'maj wu'ne chin tb'intza: Aqine chin q'malte xnaq'tzb'il, ex qe nmandamyente che ajb'el te spik'un kye tnam.

⁵Ch'ix tul kanun tq'ijlalil tzoqpib'l wu'ne; aju kolpib'l wu'ne kyja' ttzaj laq'e'; tuk'il wipumale chin kawile kyib'aj qe tnam. Qe tnam ate' ttzi'yile mar in che ayon wi'je ex nno'k qe' kyk'u'j ti'j wipumale.

⁶Kyke'yin jawe twitz kya'j ex kyke'yin kub'e twitz tx'otx'; kb'el naj kya'j ik tza'n sib', kb'ajel tipun tx'otx' ik tza'n jun xb'alun in b'aj, qe xjal najl twitz che kymel ik tza'n qe tal us. Atzunju kolb'il wu'ne kukx kyjel ten te jumajx, ex aju tzoqpib'l wu'ne minti' b'ajsb'il te.

⁷Chin kyb'intze, aqeye nne'l kynik'e ti'j alkyeju tz'aqlxix ex awa'n nxnaq'tzb'ile tuj kyanmiye. Mi'n che xob'e qa in che ok ik'le'ne kyu'n xjal, mi'n che el sek'paje qa ma che ok yaso'ne kyu'n,

⁸ok che najel ik tza'n in naj xb'alun tu'n pok' ex ik tza'n in b'aj tamtz'u'n lan tu'n sq'i'n. Ex aju tzoqpib'l wu'ne kukx ktel te jumajx, ex aju kolb'il wu'ne minti' b'ajsb'il te, chi Qman.

⁹Tzulx tnab'la Qman, tenx tipun tq'ab'a, tzulx tnab'la ik tza'n o tb'inchaya tuj tq'ijlalil ojtxi. Tu'na b'aj tpaẍu'na aju nintz txkup Rahab ex tu'na b'aj t-xayu'na aju nintz txkup dragón,

¹⁰tzqij ju mar tu'na, aju ma' t-xe', ex b'ant jun b'e tu'na max t-xe'pun mar tu'n kyik'tz qe xjal tuj, aqeju otoq che kolpet.

¹¹Kyja'xtzun tten che ul meltz'aj qeju ma che kolpet tu'n Qman, ex che okex tuj tnam Sión in che b'itzan tu'n tzalajb'il; ex kukx ktzalajel kywitz; knetel tzalajb'il kyu'n ex che tel tuj txub'txaj; mlay che tentl tuj b'is ex mlay che ayayantl.

¹²Chi Qman kyja': Ax qine chin xel q'uqb'ante kyk'u'je. ¿Tiqu'n in che xob'e kywitz qe xjal in che kyim, aqeju ik kyten ik tza'n ch'im jurat in tzqij?

¹³¿Mape tz'ik tna'l Qman kyu'ne, aju poq'salte kyeye, aju xi lik'unte kya'j ex kub' tq'o'n t-simyentil tx'otx'? ¿Kok'xpe che lu'lule tkyaqil q'ij tu'n tlaj kytx'u'jil qeju b'a'n che yajlan ex ma b'ant kyten tu'n kynaje kyu'n? Ex ¿jatumtzun ta' aju kytx'u'jil ja'lo?

¹⁴Qe xjal in che yajlanjtz tuj pres, jurat che tzoqpetel, mlay che kyim tuj calabós ex kukx kxel q'o'n kywa.

¹⁵Aqine Kymane aju Kydiose aju Tajaw Tkyaqil, atzun nb'iye jlu; wu'ne in yukch twitz mar ex in julin ok in xtulq'in a',

¹⁶wu'ne xi nlik'pu'ne kya'j ex wu'ne kub' nq'o'ne tq'uqb'il tx'otx'. Wu'ne okx nq'o'ne qe nyole tuj kytzi'ye ex e ok nkwentine tjaq' t-xlekumal nq'ab'e. Xi nma'ne kye aj Sión: Aqeye etzan wu'ne.

¹⁷Tzulx kynab'le, tzulx kynab'le aqeye aj Jerusalén, che we'ktze. O che k'ixb'isanjtze tu'n tq'oj Qman mer ik tza'n jun xjal in xi tk'a'n q'e'n, kxel tk'a'n okxi tb'aj tu'n ex okxi tchyo'n twi'.

¹⁸Kyxol kykyaqil qe kyk'wa'le o che tzaj, minti' jun in xi ẍaqlunte kyeye; kyxol kykyaqil qe kyk'wa'le o che kub' kych'isune, minti' jun in xi q'inte kyq'ab'e.

¹⁹Atzun qe kab'e mya b'a'n lu e tzaj kyib'aje: Aju kytanmiye o kub' xitun ex o tz'ex elq'an aju at tuj, ex qe xjal ate' tuj e kyim tu'n we'yaj ex tu'n q'oj. ¿Alkye jun jaku tzaj tz'e'y tk'u'j kyi'je? ¿Alkye jun jaku tzaj q'uqb'ante kyk'u'je?

²⁰Qe kyxjalile ma b'aj kyipun, ik kyten ik tza'n jun masat otoq tzyet tu'n k'ob'il, palch qe kyuj kyskyin tkyaqil cay, ma che tza'w tu'n tq'oj Qman Dios ex tu'nju ma che tzaj kawin tu'n.

²¹Kyja'tzun, aqeye xjal ate'ye tuj yajb'il kyb'intze jlu, ma chyo'n kywi'ye ex mya tu'n vin.

²²Chi Qman aju Kydiose kyja', aju in kolin kyi'j qe xjal etzan tu'n: K'elel wi'ne aju copa tuj kyq'ab'e, aju xi nq'o'ne kyeye tej ttzaj ntx'u'jile kyi'je ex chyo'n kywi'ye tu'n, ex mlay txi kyk'antle juntl maj.

²³Kxel nq'o'ne kye qeju ma che k'ixb'isante kyeye, aqeju in kyma'ntoq kyeye kyja': Che palekuye twitz tx'otx' porke qo ik'ex b'ete kyib'aje, che chi; atzun kyeye e kub' pale'ye twitz tx'otx', ik e oke ik tza'n b'e tu'n kyik'x b'et xjal kyib'aje.