Read kumam Isaías 52 Bible Online

Isaías 52 - kumam bible

Isaías 52

¹Che we'ktze aqeye aj Sión, che wek'tze, kyq'o'nk kyipune aqeye aj Jerusalén aju tnam xjan, kyq'o'nk kyxb'alune tb'anilxix, porke qe xjal mya okslal ti'j Dios ex mya saq tuj kyanmi mlay che oktz juntl maj tuj kytanmiye.

²Che we'ktze aqeye aj Jerusalén, kychto'n ele quq kyi'je, che qekuye tuj q'uqb'il te kawb'il; aqeye aj Sión e je'x q'i'ne pres, kyi'n ele aju caden k'alo'n ti'j kyqule.

³Chi Qman kyja': Mi jun sentav o nk'ame kyi'je tej kyxi k'ayine tu'n kyoke te majen; ax ikx weye mi jun sentav kxel nq'o'ne kyi'je tu'n kykolpete wu'ne.

⁴T-xe tnejel qe xjal etzan wu'ne e je'x tuj tnam Egipto ex e ten ik tza'n stranjer xjal ma chixin; te tib'ajxi noqx gan ma che yajlet kyu'n aj Asiria.

⁵Atzun ja'lo, ¿ti nb'aj weye tzalu? Qe xjal etzan wu'ne ma che'x q'i'n tuj Babilonia ex minti' kyil. Qe xjal ma kub' kyi'j aj Israel kyu'n in che sch'in tu'nju in jaw kyniman kyib', ex tkyaqil q'ij in che yolin mya b'a'n wi'je.

⁶Ex tzul tq'ijlalil tu'n tel kynik' xjal wi'je, aqeju etzan wu'ne, aqine Dios o chinx yoline kye.

⁷Tb'anilxix tke'yinx ju xjal in b'et kywi' qe tal witz in pakb'an tqanil tu'n kyten xjal tuj txub'txaj, in pakb'an tqanil b'a'n ex in tq'o'n tqanil tzoqpib'l, ex in tma'n kye aj Sión kyja': Aju Kydiose kukx tkawin.

⁸Kyb'inxe, in jaw tq'ajq'ajel kywi' qe kwentil kytanmiye ex junx in che sch'in tu'n tzalajb'il, ex ax qe in che ke'yinte tza'n tten kyja' ttzaj juntl maj Qman tu'n tul tuj tnam Sión.

⁹Che sch'ine wen tu'n tzalajb'il aqeye aj Jerusalén maske o kub' xitj kytanmiye, porke ma tzaj tq'uqb'a'n Qman kyk'u'j qe xjal etzan tu'n ex ma kolpet tnam Jerusalén tu'n.

¹⁰Ma tzaj tyek'un Qman tipumal kywitz kykyaqil nasyon. Tuj tkyaqil twitz tx'otx' ok kyb'i' xjal ma qo klet tu'n Qdios.

¹¹Kyetze, kyetz naje tuj Babilonia, mi'n tz'ok kymako'ne ju ttz'ilil, kyetze tuj Babilonia. B'a'n tu'n tkub' kykwentin kyib'e ti'j mya b'a'n, aqeye q'ilte kykyaqil qe makb'il in che ajb'en tuj tja Qman.

¹²Ex mya jurat naj che eletze, ex mya noq che eletz oqe, porke ate Qman aju Kydiose k'okel kwentin kyeye, aqeye aj Israel; a kb'el nej kywitze ex ax ktzajel lpe' kyi'je.

¹³B'a'n k'elel tkyaqil te nmajene, kjawil nimsa'n ex k'okel q'o'n toklen ma'xix.

¹⁴Nimku xjal b'i'x naj kynab'l tej kyke'yinte tej tch'expet tilb'ilal ex mya ik ke'yintl ik tza'n jun xjal.

¹⁵Atzun ja'lo che lab'il nimku nasyon ti'j; qe rey, ok kyke'yinte, mlay che yolin tu'n kyxob'il, porke k'okel kyke'yin aju b'ajxtoq tzaj q'ma'n kye ex k'elel kynik' ti'j aju b'ajxtoq kyb'i.