Read kumam Isaías 53 Bible Online

Isaías 53 - kumam bible

Isaías 53

¹¿Mape txi kyoksla'n xjal qpakb'ab'le? ¿Mape pon kynab'l xjal ti'j tipumal Qman?

²O tajb'e Qman tu'n tch'iy tmajen ik tza'n awal ma in ch'iy ex in xi' tlok' tuj tzqij tx'otx'. Mya tb'anil ke'yin ex aju ke'yin twitz, mlay qo tzalaj ti'j;

³el ik'un kyu'n xjal ex minti' e tzalaj ti'j. Aju xjal lu nimku k'ixk'oj tzaj ti'j ex b'a'n tu'n tza'n ta'w k'ixk'oj. Ik tza'n jun xjal minti' qaj tu'n tok qke'yin, ik'un qu'n ex minti' qaj ti'j.

⁴Maske ikju, xi tiqan tkyaqilju k'ixk'oj at qi'j, ex ik'x ta'w k'ixk'oj tu'n noq tu'n qlaj. Ximan qu'n qa tu'n Dios otoq tz'ok k'ixb'isa'n ex otoq kub' q'o'n tcastiw ex otoq tz'ok yajla'n.

⁵Ex o k'ixb'isanjtz tu'n qlaj, tu'nju mib'an qo b'in; nimxix k'ixk'oj ik'x tu'n tu'n tlaj qb'inchb'en mya b'a'n; tu'nju ik'x castiw tu'n, kyja'tzun ma qo ten tuj txub'txaj, ex tu'nju tk'ixb'len ma qo b'anix.

⁶Qkyaqil ma qo'x tzpet; ik tza'n qe ẍne'l in che'x tzpet, teyle junjun in xi' tuj tex tb'e, ex ate Qman kub' q'onte qb'inchb'en mya b'a'n tib'aj tmajen tu'n t-xi tiqan.

⁷O b'aj yajla'n, ex kub' tipa'n ex kub' tmansin tib', minti' o q'ajt; xi q'i'n ik tza'n jun ẍne'l in xi q'i'n tuj b'iyb'il te ex ik tza'n jun ẍne'l minti' in q'ajt ok nne'l matzo'n ttzmal, ikxtzun te, minti' o q'ajt.

⁸Noqx gan xi q'i'n pres, minti' til ex mi a'l jun kolin ti'j; misikyer jun tzaj tb'is ti'j. B'i'x o naj nmajene kyxol xjal tzalu twitz tx'otx' ex kub' t-sentens tu'n tkyim tu'n tlaj kyil qe xjal etzan wu'ne.

⁹Kub' kyximan xjal tu'n tku'x maqu'n kyxol qe xjal b'inchal mya b'a'n, ex okx maqu'n junx kyuk'il qe q'inun, maske minti' jun mya b'a'n otoq tb'incha ex minti' o tma jun yol te sb'ub'l.

¹⁰O tajb'e Qman tu'n tk'ixb'iset ex tu'n tyajlanjtz. Ex tu'nju xi tq'on tib' tu'n tchjet il te jumajx, ktel nim tanq'ib'l ex kpol ke'yil qe tiyjil che ul itz'j te tib'ajxi; noq tu'n, k'elel b'a'n aju tajb'il Qman tu'n tb'ant.

¹¹Tik'lenxitzun nim yajb'il ti'j, ok tila' ju spik'un ex nimxix ktzalajel ti'j ok tke'yinte; tu'nju tz'aqlxix ju tmajen Qman, che kolpetel nimku xjal tu'n, ex kxel tiqan ju kyb'inchb'en mya b'a'n.

¹²Kyja'tzun kxel tq'o'n Dios jun toklen kyxol qeju ma' kyoklen, ex tuk'ix ktel kyxol qeju at kyipumal ok tb'aj kysipan aju otoq kykamb'a tuj q'oj, tu'nju xi tq'on tib' tu'n tkyim, ex kyxol qe mya b'a'n ok te tajlal, ex xi tiqan kyil nimku, ex o kub'san twitz Dios kyi'j xjal tu'n tnajset kyil.