Read kumam Isaías 55 Bible Online

Isaías 55 - kumam bible

Isaías 55

¹Kykyaqile aqeye in che txqete, kytzaje tu'n kyk'ane a'; aqeye minti' kypwaqe, kytzaje, jaku knet triw noq kukx te kyeye ex che wa'ne; jaku knet kyk'a'ye ta'l twitz uva ex kyk'a'ye lech noq kukx ex minti' tu'n tchjet kyu'ne.

²¿Tiqu'n noqx gan tu'n tb'aj kynajsa'ne kypwaqe qa mya wab'j tu'n tlaq'et kyu'ne? ¿Tiqu'n tu'n tb'aj kynajsa'ne twi kyk'u'je ti'j ju minti' in che noje tu'n? Kyq'ontz kywi'ye ti'j nyole ex che wa'le tb'anil wab'j ex che nik'b'ele kyi'j qe ti'xti nim tk'ok'jal.

³Kytzaje wuk'ile ex kyq'ontz kywi'ye ti'j nyole, chin kyb'intze ex che anq'ile. Kyjel b'ant ti'j jun nyole kyuk'ile tu'n tkyaj ten te jumajx, tu'ntzun tjapun aju nyole xi ntziyane te David, tu'nju at nk'ujlalile ti'j.

⁴Ok nq'o'ne David ik tza'n jun testiw kye xjal tu'n tel kynik' wi'je, ex te jun nejenel ex q'ol xnaq'tzb'il kye xjal.

⁵Ktzajel ttxko'na qe xjal minti' ojtzqi'n kywitz tu'na; qe xjal mi ojtzqi'na kyu'n che ul qelan tuk'ila, porke aqine aju Dios Xjan kye aj Israel, ma jaw nnimsa'ne, chi Qman.

⁶Che jyone ti'j Qman akux at amb'il kyeye tu'n tknet kyu'ne, che kub'sane twitz akux niqayin ta'.

⁷Aju xjal b'inchal il, b'a'n tu'n tkyaj tkolin ju tb'e mya b'a'n, aju xjal b'inchal tplojil, b'a'n tu'n tkyaj tq'o'n ju t-ximb'etz mya b'a'n; e tajtz meltz'aj tuk'il Qdios, porke ate Dios at nim xtalb'il tuk'il tu'n tkub' tnajsa'n kyil xjal.

⁸Porke chi Qman kyja': Aju weye nximb'etz, mya junx ta' ik tza'n kyeye kyximb'etz, ex ok in b'ant jun ti'xti wu'ne, mya ik tten ik tza'n kyeye in b'ant kyu'n.

⁹Ik tza'n te kya'j ma' tjaw tib'aj tx'otx', ikxtzun weye nximb'etz ex aju tumlal in b'ant wu'ne, mas ma' t-xilen twitz kyximb'etze ex twitz aju in b'ant kyu'ne.

¹⁰Ik tza'n jb'al ex ttxa che'w in ku'tz twitz kya'j, minti' nna'j meltz'aj juntl maj, noq o'kx in b'aj ak'ix twitz tx'otx' tu'n, tu'n tpoq'l tawal ex tu'n tok twitz, tu'n tq'onte iyaj, ex tu'n tku'x awet juntl maj, ex tu'n ttzaj tq'o'n twa ju in awan ti'j,

¹¹ikxtzun we nyol in xi nma'ne, mlay tz'ajtz meltz'aj juntl maj wuk'ile noq kukx, noq o'kx in tb'incha'n alkye wajb'ile ex in japun tu'n aju in xi nma'ne tu'n tb'ant.

¹²Che eletze ma chixin tuk'il tzalajb'il, che ul meltz'aje tuj txub'txaj. Ok kyke'yinjtze kyu'n qe nmaq witz ex qe tal witz, che jawil b'itzan tu'n tzalajb'il ex kykyaqil tze' tuj kojb'il che jawil tzalaj.

¹³Te t-xel ch'i'x, che tzajel ch'iy tzaj, ex te t-xel la, ktzajel ch'iy q'atxab'; atzun jlu k-yek'ulte ma' t-xilen tb'i Qman; kyjel ten te jun techal te jumajx ex mlay naj.