Read kumam Isaías 56 Bible Online

Isaías 56 - kumam bible

Isaías 56

¹In tma'n Qman kyja': Kyb'inchame ti'j xtis, kyb'inchame aju tuj tumelxix, ex ch'ix tul kanun aju kolb'il kyeye ex kxel nyek'une wipumale tu'n kyklete.

²At tzalajb'il te xjal aju kukx t-xi tniman qe yol lu ex in che japun tu'n tuj tumelxix, aju xo'n ju q'ij te ojlab'l tu'n ex minti' nno'k tq'o'n te minti' tajb'en, aju tok tkwent ti'j tu'n mi'n tb'inchante jun mya b'a'n.

³Qa at jun stranjer xjal ma txi tq'on tib' te Qman, mi'n txi tma'n kyja': Part chin tele tu'n Qman ti'j ju tnam etzan tu'n. Ax ikx ju xinaq minti' tumel tu'n tten t-xu'jil, mi'n txi tma'n kyja': Mer ik tza'n jun tze' tzqij qine.

⁴Porke in tma'n Qman kyja': Aqeju xinaq minti' tumel tu'n tten kyxu'jil, qa ma txi kyniman qeju q'ij te ojlab'l q'ma'maj wu'ne, ex qa ma japun aju wajb'ile kyu'n, ex qa kukx ma che ten wa'lxix tuj ju yol o kyaj b'ant ti'j wu'ne,

⁵kxel nq'o'ne jun ti'xti kye mejorxix twitzju tu'n tten kyk'wa'l, kukx ktzajel na'n kyb'i tuj njaye tujxi ju muro te njaye, ex kxel nq'o'ne jun kyb'i tu'n tten te jumajx, ex mlayx jaw q'uchin.

⁶Ex aqeju stranjer xjal ktzajel kyq'on kyib' wuk'ile tu'n kyajb'en weye ex tu'n tten kyk'ujlalil wi'je, tu'ntzun kyok te nmajene, qa ma txi kyniman qeju q'ij te ojlab'l, qa mi'n ma tz'ok kyq'o'n te minti' tajb'en ex qa kukx ma che ten wa'lxix tuj ju yol o kyaj b'ant ti'j wu'ne,

⁷che tzajel wi'ne twi witz xjan aju etzan wu'ne, ex che tzalajel wu'ne tuj njaye te nab'l weye. Twi altar etzan wu'ne kk'metel wu'ne aju kyoyaj patun in kub', ax ikx qe chojb'il ktzajel kyq'o'n weye, porke aju njaye, ja te nab'l Dios tb'i k'okel te kye kykyaqil tnam.

⁸Che ajetz meltz'aj wu'ne qe xjal otoq che'x q'i'n pres najchaq, chi Qman Dios aju nna'jtz chmonte kye aj Israel, aqeju otoq che b'aj sputj.

⁹Kytzaje aqeye txkup ate' tuj kojb'il, kytzaje aqeye jil te tjaq' k'ul, kytzaje chyo'l qe ẍne'l;

¹⁰porke qe kwentil kye qe xjal etzan wu'ne mer ma kub' moẍxix kywitz ex minti' ch'in b'a'n kyu'n. Kykyaqil qe jlu ik kyten ik tza'n tx'yan mib'an che q'ajt ex mib'an che qawin, noq b'unl qe ex in che witzky'an, nimxix kygan tu'n kytan.

¹¹Mer ik tza'n tx'yan qe, noq nne'l kyk'u'j ex minti' in che noj, pastor qe ex minti' nne'l ch'in kynik' ti'j; teylex te junjun in xi ti'n tex tb'e, o'kx in che jyon ti'j aju kyex kyajb'il.

¹²In kyma'n kyja': Qo' jyolte qk'a vin ex jyolte q'e'n aju mas at-xix ta'w, tu'ntzun tchyo'n qwi'. Ex e tb'ant qu'n nchi'j, ik tza'n kb'antel qu'n ja'lo ex qa masxix ch'intl.