Read kumam Isaías 57 Bible Online

Isaías 57 - kumam bible

Isaías 57

¹In che kyim qe xjal tz'aqlxix ex minti' in tzaj ch'in kyximb'etz xjal kyi'j, qe xjal nimal Dios in che kub' naj ex mi a'l jun nne'l tnik' ti'j; ok kykyim in che tzoqpet tu'n mi'n kyten tuj jun k'ixk'oj,

²ex in che ten tuj txub'txaj. Otoq che b'et tuj tumelxix ex atzun ja'lo in che ojlan jatum maqu'n qe.

³Che laq'etze aqeye tal jun xu'j b'a'n ky'a'n, aqeye o che el itz'j ti'j jun xu'j aj pajil ex ti'j jun xu'j jawni twitz kyuk'il xinaq:

⁴¿Al i'j in che xmayine? ¿Al i'j in jaw kyyuch'ine twi kytxa'ne? ¿Al i'j in xi kyyek'une kyaq'e? Aqeye kyk'wa'l xjal mib'an che b'in ex nik'al yol qe,

⁵in xi kyq'on kyib'e tu'n kyk'ulune kywitz qe tilb'ilal, ex tu'n kyyaẍine kyjaq' k'ol ex kyjaq' kykyaqil tze' nim kyxaq, ex in xi kyq'o'ne kyk'wa'le te chojb'il kytxlaj qe tq'ab' xaq ex kyuj qe kypa'xil pik.

⁶Aqeye aj Israel, mas b'a'n tuj kywitze tu'n t-xi kyq'o'ne k'ulb'il kywitz qe ab'j tz'umin kywitz ate' tuj tq'ab' xaq, ex atzun ta' jun lugar pa'nmaj kyu'ne te kyeye. Kyib'ajtzun qeju ab'j lu ma kub' kyqo'ne ta'l twitz uva te oyaj kye ex ma txi kyq'o'ne twitz awal te oyaj kye. ¿Okpetzun chin tzalajele ti'j tkyaqil jlu?

⁷Twi' jun witz ma'xix twa'l, atzun kub' kyq'o'ne kywatb'ile tu'n kyyaẍine, ex axtzun in che jaxe q'olte ju chojb'il.

⁸Ti'jxi tlamel kyjaye kub' kyq'o'ne qe tilb'ilal ik'b'ilxix. Ma tzik' nna'njtze kyu'ne, ma tz'el kysqitin kyi'je ex ma che kub' tane twi kywatb'ile ma' twitz; ma b'ant kytrate kyuk'il qe xinaq aqeju kyajb'ile tu'n kykub' tane kyuk'il, ex in che ke'yine kyi'j qe tilb'ilal.

⁹E je'x qelane tu'n kypone jatum ta' ju dios Mélec, q'i'n aseyt kyu'ne ex nimxix tajlal perjum; xi kysama'ne qe sanjel najchaq wen, xi kysama'ne tu'n kyku'pun tuj kynajb'il kyimni.

¹⁰E sikte tu'nju nimxix e b'ete, ex minti' el kynik'e ti'j qa tkyaqil jlu minti' tajb'en. Ok juntl maj kyipune ex tu'ntzun jlu minti' e sikte.

¹¹¿Alkyetzun qe dios in che xob'toqe kywitz ex in xi kyq'o'ne nimb'il kye, tu'nju minti' ma japun nyole kyu'ne ex ma tzik' nna'njtze kyu'ne te jumajx? ¿Myapetzun ax tok minti' in che xob'e nwitze, tu'nju minti' in chin q'ajte atxix ojtxi?

¹²Ex kxel nma'ne kyeye alkye kymodiye, tuj kynab'le tz'aqlxix ate'ye, ex tkyaqil jlu mlay tz'ajb'en te kyeye.

¹³Ok kyjaw sch'ine tu'n kytzaj onine, mlay che tzaj onine kyu'n qe tilb'ilal in che k'ulune kywitz, ex mlay che klete kyu'n. Kykyaqil qe che xel iqan tu'n kyq'iq'; noq che b'el naj ok kyel xupin tu'n kyq'iq'. Atzun qe xjal q'uql kyk'u'j wi'je, che etzal ti'j ju tx'otx' ex che najal twi' ju witz xjan etzan wu'ne.

¹⁴Kb'injtzel jun yol kyja': Kyb'inchame jun b'e chq'ajlaj tuj, kyi'mele qe ti'xti tolsab'l kykub' tuj b'e, tu'ntzun kyex qe xjal etzan wu'ne, chi Dios.

¹⁵Porke ate Dios aju at tuj kya'j, aju itz' te jumajx ex aju tok tb'i Xjan, in tma'n kyja': Atzun najl qine tuj jun lugar najchaq tjaw ex xjan, ax ikx atine tuk'il ju xjal mans ex ma tz'ajtz ti'j tanmi, ax ikx in xi nkyuwsa'ne tk'u'j ex in xi nq'uqb'a'ne tk'u'j.

¹⁶Mya kukx kxel nma'ne kyil qe xjal etzan wu'ne ex mya kukx tu'n ttzaj tlo'ch nk'u'je kyi'j; ex qa kukx ma b'ant wu'ne ikju, jaku tzaj b'aj kyk'u'j nwitze qe xjal nch'isb'ene.

¹⁷Tu'n tlaj kyil qe aj Israel tzaj nq'oje kyi'j, kub' kycastiw wu'ne ex el npa'n wib'e kyi'j; atzun kye kukx el kypa'n kyib' wi'je ex kukx e ok lpe' ti'j kyex kyajb'il.

¹⁸Ma wile kyb'inchb'en mya b'a'n, ex che b'anixel wu'ne ex che xel nẍaqlu'ne. Kxel nq'uqb'a'ne kyk'u'j qeju in che b'isun,

¹⁹ex kxel nq'o'ne b'itz tuj kytzi'. E kyten tuj txub'txaj qeju ate' najchaq, ex e kyten tuj txub'txaj qeju ate' niqayin ex che b'anixel wu'ne.

²⁰Ex qe xjal mya b'a'n, ik kyten ik tza'n jun mar in pulin wen, minti' tu'n twe' ex nne'tz t-xo'n xoq'l ex ttz'ilil.

²¹Qe xjal mya b'a'n mlay che ten tuj txub'txaj, chi Dios.