Read kumam Isaías 59 Bible Online

Isaías 59 - kumam bible

Isaías 59

¹Aju tipumal Qman minti' ma tz'ajtz ti'j, atx tipumal tu'n kyklete tu'n; minti' ma tz'ok te mib'an b'in, b'a'n te Qman b'in.

²Ex tu'nju mya b'a'n o kyb'inchaye o tz'el tpa'n tib' Dios kyi'je; tu'nju il o kyb'inchaye ma tz'ok tmaqsi'n Dios twitz; tu'ntzun jlu minti' in che tzaj b'i'ne tu'n.

³Tz'il ti'j kyq'ab'e tu'n kychk'el xjal kub' kyb'yo'ne, tz'il kyi'j qe tal kyq'ab'e tu'n nimku mya b'a'n in b'ant kyu'ne; in kyma'ne nik'aj yol tu'n kytzi'ye, ax ikx in kyma'ne nimku mya b'a'n.

⁴Ok kyxi'ye tuj jusgad q'malte til juntl, minti' in che yoline axix tok, mi a'l jun in xtisin tuj tumelxix. Mas nno'k qe' kyk'u'je ti'j ju nik'aj yol ex kyi'j qe yol mya ax tok. In kub' kyximane mya b'a'n tuj kyanmiye ex axtzunju mya b'a'n in kub' kyb'incha'ne.

⁵Aju kyximb'etze mya b'a'n ik tten ik tza'n tjos q'anti'; qa ma txi tchyo'n xjal qe jos lu kymel, ex qa at jun ma kub' b'etz'ante kye, che eletz qe tal lob'aj kyuj, aqeju in che kyim xjal kyu'n. Mer ik tza'n in che chmone ti'j tchemaj xin;

⁶ex kyi'j qe tchemaj xin lu mlay che b'ant xb'alun kyi'j; mi a'l jun jaku tz'ok xb'aluminte aju in che chmone ti'j. Kykyaqil kyb'inchb'ene puro mya b'a'n ex o'kx in b'ant kyu'ne tu'n tkub' kyb'yo'ne jun xjal;

⁷in che ajb'en kyqane tu'n kyxi ojqelane tu'n kyb'inchanteye mya b'a'n ex nno'k tilil kyu'ne tu'n tkub' kyb'yo'ne jun xjal minti' til. O'kx tok kyximb'etze tu'n kyb'inchanteye mya b'a'n ex jatum in che ik' b'ete in kub' xitj tkyaqil kyu'ne ex in che naj xjal kyu'ne.

⁸Minti' ch'in kymojb'ab'l kyib'e kyuk'il txqantl, tkyaqil aju in b'ant kyu'ne mya tuj tumel. Aju b'e q'i'n kyu'ne ẍo'k ti'j; qe xjal in che b'et tuj b'e lu minti' ch'in in che ten tuj txub'txaj.

⁹Kyja'tzun, aju kolb'il qe ma tz'el laq'e' qi'j ex aju tzoqpib'l minti' nnu'l laq'e' qi'j; in qo ayontoq ti'j spik'un, ex o'kx qlolj at, in qo ayontoq ti'j spik'un ex tuj qxopin in qo b'et.

¹⁰In qo b'et noq xmakan nno'k qu'n ik tza'n qe moẍ noq xmakan in che b'et twitz ja, mer ik tza'n minti' tb'aq' qwitz; in qo jaw tolj te chilkuq'ij, mer ik tza'n qonik'an in qo b'et, b'a'n ta' qximlal, ex mer ik tza'n kyimni qo'.

¹¹Qkyaqil in qo wu'yin ik tza'n qe txkup oso, in qo q'ututun, ik tza'n qe paloma; in qo ayon ti'j kolb'il qe, ex minti' nnu'l; in qo ayon ti'j tzoqpib'l qe, ex najchaq ta'.

¹²Qman Dios, nimxix mya b'a'n ma qb'inchaye twitza ex ax qile in q'mante aj il qo'ye; b'a'n qu'ne alkye qe qile ex ojtzqi'n qu'ne aqeju mya b'a'n o qb'inchaye.

¹³Qman, ma qo oke mib'an qo nimane ex ma tz'el qpa'n qib'e ti'ja, minti' o qajb'eye tu'n qok lpe'ye ti'ja aya Qdiose, o qo yoline ti'j tu'n tkub' qyajla'ne qe xjal ex ma tz'el qpa'n qib'e ti'ja, b'aj qnak'u'ne ti'j tu'n qsb'une kyi'j txqantl.

¹⁴Ya minti' in xi b'incha'n kyi'j xjal tuj jusgad, minti' in kyb'incha'n aju tz'aqlxix, ya minti'tl in che yolin xjal ti'j ju yol axix tok; ok kyxi' xtisil minti' in kyq'o'n amb'il tu'n tb'ant ti'j jun ti'xti tuj tumelxix.

¹⁵Ma kub' naj aju yol axix tok, ex alkye nne'l tpa'n tib' ti'j mya b'a'n, nne'l elq'a'n aju at te. Ma til Qman jlu ex mya b'a'n ma tz'ela tuj twitz, tu'nju minti' in xi b'incha'n kyi'j xjal tuj tumelxix.

¹⁶Jaw lab'in Qman tej tke'yinte mi a'l jun tu'n tonin kyi'j qeju in che yajlanjtz, kyja'tzun e klet tu'nx tipumal ex tu'nju tz'aqlxixte, ex axte o kamb'an.

¹⁷Tzaj tyek'un qa tz'aqlxix te, ik tten jlu ik tza'n jun chikyet k'uxb'il nno'k tq'o'n soldad, tzaj tq'o'n ju kolb'il, ik tten jlu ik tza'n jun pasb'il k'uxb'il, ex o xelin tu'n aju mya b'a'n o kyb'incha xjal, mer ik tza'n jun soldad nno'k tq'o'n t-xb'alun te q'ojb'il, ex tzaj nim tq'oj.

¹⁸Kxel tq'o'n Qman chojb'il te teyle junjun ik tza'nx tb'inchb'en, kb'el tq'o'n kycastiw qe aj q'oj ti'j. Kxel tq'o'n chojb'il kye qeju in che ik'un ti'j ik tza'nx kyb'inchb'en, kyuk'ix qe tnam ate' ttzi'yile mar.

¹⁹Kykyaqil xjal kxel kyniman Qman, ktzajelx qe' tuj tjawitz q'ij ex tu'n tpon b'aj tuj telex q'ij, kxel kyniman Qman ok tok kyke'yin tajwalil, porke tzul te Qman tuk'il tipumal ik tza'n jun nima otoq ch'iy, yukun tu'n jun kyq'iq' nimxix tipun.

²⁰Tzul tu'n ttzoqpet tnam Sión kyuk'ix qe tiyjil Jacob, aqeju k'ajetz ti'j kyanmi ti'j kyb'inchb'en mya b'a'n. Ate Qman in q'mante jlu.

²¹In tma'n Qman kyja': Kb'antel ti'j jun yol wu'ne kyuk'ile, aju Nxewe ex qe xnaq'tzb'il o txi nq'o'ne kyeye, mlay che el wi'ne kyeye ex mi kye qe kyiyjile te jumajx.