Read kumam Isaías 61 Bible Online

Isaías 61 - kumam bible

Isaías 61

¹Aju T-xew Qman Dios at wuk'ile, porke ma tzaj q'o'n woklene tu'n Qman ex ma chin tzaj sama'ne q'olte tqanil b'a'n kye meb'a, tu'n kyb'anix qeju b'is ta' kyanmi, tu'n t-xi nq'o'ne tqanil kye qeju e je'x q'i'n pres tu'n kykolpet ex tu'n tjaqet tlamel kyja pres,

²ex tu'n t-xi nq'o'ne tqanil ti'j tq'ijlalil tu'n tul kanun t-xtalb'il Qman ex tu'n tkub' kycastiw qe aj q'oj ti'j. Ma chin tzaj t-sama'n tu'n tq'uqb'et kyk'u'j qeju in che b'isun,

³tu'n t-xi nq'o'ne tzalajb'il te t-xel b'is kye qeju in che b'isun tuj tnam Sión, tu'n t-xi nq'o'ne nim tzalajb'il kye te t-xel oq'el ex tu'n kyb'itzan te nimb'il tb'i Dios te t-xel b'is. Ik che okel ik tza'n jun wi' k'ol awa'n tu'n Qman ex ok kyb'incha' aju tz'aqlxix tu'n tyek'unjtz tajwalil Qman.

⁴Kjawil kyb'incha'n juntl maj qe tnam ex qe ja e kub' xitj ojtxi.

⁵Stranjer xjal che okel kwentil kyi'j kyẍne'le ex che aq'nal tuj kykojb'ile ex ti'j tqan uva at kyeye.

⁶Atzun kyeye k'okel q'o'n kyb'iye pal te Qman ex tmajen Qdios. Che wa'le ti'j kyq'inumab'l txqantl nasyon ex aju kyajwalil k'okel te jun adorn te kyeye.

⁷Ex tu'nju nimxix ma tzik'x kyu'ne ex nim ma kub' kych'ixwiye ex nim ma che ok ik'lene, kyja'tzun il ti'j tu'n kyk'monteye nim q'inumab'l ax tuj kytanmiye ex che tzalajele te jumajx.

⁸Porke nim in tzalaj Qman tu'n tb'inchet aju tz'aqlxix ex ik'un tu'n aju elq'a'mj ex ju b'yoj xjal. Ok tq'a' chojb'il tb'anilxix kye qe xjal etzan tu'n ex kyjel b'ant ti'j jun tyol kyuk'il te jumajx.

⁹Qe kyiyjil che ul itz'j te tib'ajxi che okel te ma' kyoklen kyxol qe txqantl nasyon; kykyaqil qeju che ke'yil kyi'j k'elel kynik' ti'j qa tkub' tky'iwb'il Qman kyib'aj.

¹⁰Nimxix in chin tzalaje ti'j Qman ex in noj tuj wanmiye tu'n tzalajb'il ti'j Ndiose, porke ma chin klete tu'n ex ma chin ok q'o'ne te tz'aqlxix tu'n. Ik ma chin oke ik tza'n jun ku'xun kyja' tmoje' tok t-xb'alun tb'anilxix, ex ik tza'n jun q'apoj kyja' tmoje' in b'aj tb'incha'n tib' ex nno'k tq'o'n tu'.

¹¹Porke ik tza'n te tx'otx' in tpoq'sa'n tawal ex in tzaj t-xul awal tuj pe'n, ikxtzun ok tb'incha' Qman tu'n kukx tb'inchet aju tz'aqlxix, ex kykyaqil nasyon kjawil kynimsa'n tb'i tu'n kyb'itz.