Read kumam Isaías 64 Bible Online

Isaías 64 - kumam bible

Isaías 64

¹Noqwit xb'aj tlaqina kya'j ex xku'tza tu'n kyjaw lu'lun qe witz twitza,

²ik tza'n in b'aj tz'e'y txqan ch'i'x tu'n q'aq' ex qa ik tza'n in tzaj loqlon a', jakutzun tz'el kynik' aj q'oj ti'ja, ti'j tipumala ex jaku che tzaj lu'lun qe nasyon twitza.

³Tej tb'inchanteya tb'inchb'ena xob'ajilxix, aju minti'toq ximan qu'ne tu'n ttzaj tq'o'na, ex tej tku'tza, e jaw lu'lun qe witz twitza.

⁴B'ajx qb'iye ex b'ajx qile qa at juntl dios jaku b'ant tkyaqil jlu tu'n, ex tu'n tb'inchante t-xtalb'il kye qeju q'uql kyk'u'j ti'j.

⁵In k'met xjal tu'na, aju in tzalaj tu'n tb'inchante ju b'a'n ex nnu'l ti'j tk'u'j tu'n tb'inchante aju tajb'ila. Ma tzaj tq'oja qi'je tu'n tlaj ma qo b'inchane il; ax tuj qile ma qo tene ma b'et-xi q'ij. ¿Okpetzun qo kletele?

⁶Qkyaqile ik qtene ik tza'n jun xjal mya saq tuj tanmi, tkyaqilju qb'inchb'ene b'a'n mer ik tza'n jun ttx'aqan xb'alun tz'il ti'j; qkyaqile ma qo kub' tz'aqe ik tza'n t-xaq tze' in tzaj tz'aq ok ttzqij, ex aju qb'inchb'ene mya b'a'n in xi q'inte qeye ik tza'n tu'n kyq'iq'.

⁷Mi a'l jun in kub'san twitza ex mi a'l jun nno'k tilil tu'n tu'n tok qe' tk'u'j ti'ja; kyja'tzun ma kub' tewan tib'a qwitze ex ma qo kyaj tkolina tu'n tlaj qb'inchb'ene mya b'a'n.

⁸Maske ikju, ex aya Qmane; aqo'ye ik tza'n xkab' tx'otx' ex atzun teya b'inchal qeye ik tza'n jun xjal b'inchal xar, porke qkyaqile ma qo b'ante tu'na.

⁹Qman, mi'n tzaj nimxix tq'oja qi'je ex mi'n tzaj tna'na qb'inchb'ene mya b'a'n. Qo tke'yintza, porke qkyaqile etzan qo'ye tu'na.

¹⁰Qe tnam xjan teya, ma che ok te jun lugar tzqij tx'otx'; ma tz'ok Jerusalén te jun tnam minti' xjal tuj, ma naj tnam Sión.

¹¹Aju lugar xjan ex ma' toklen te qeye, jatum jaw nimsa'n tb'iya kyu'n qe qxe'chele, ma b'aj naj tu'n q'aq'. Tkyaqilju in qo tzalaje ti'j ma b'aj xitj.

¹²Ex ti'j tkyaqil jlu, Qman, ¿kukxpetzun k'ik'elex ti'j tu'na? ¿Maj mi'ntzun q'ajta ti'j? ¿Kukxpetzun qo tele tuj b'is ma'xix tu'na?