Read kumam Isaías 66 Bible Online

Isaías 66 - kumam bible

Isaías 66

¹In tma'n Qman kyja': Aju kya'j, atzun nq'uqb'ile tu'n nkawine, ex aju tx'otx', atzun lugar tu'n tkub' ten nqane tib'aj. ¿Alkyetzun jun ja ok kyb'inchaye weye? ¿Jatum b'a'n tu'n tb'aj kyb'incha'ne jun lugar te wojlab'le?

²Tkyaqil jlu taq'unb'en nq'ab'e, ex kyja'tzun tten e xe't tu'n kyten. Qe xjal in chin tzalaje kyi'j, aqeju mans ex in ajtz ti'j kyanmi ex at tchiylal nyole tuj kywitz.

³Ex at xjal in xi tq'o'n jun tor te chojb'il, ax ikx in kub' kyb'yo'n jun xjal, nno'kx kyqesin tjaq' tqul jun ẍne'l, ax ikx in kub' kytoqin ti'j tqul jun tx'yan, in xi kyq'o'n qe twitz awal te oyaj, ax ikx in xi kyq'o'n tchk'el jun b'och; in kub' kypatun storak, ax ikx in che k'ulun kywitz qe tilb'ilal. Aqeju e jaw sk'onte qe costumr ik'b'ilxix lu, nimxix kygan tu'n kyb'inchante tkyaqil jlu.

⁴Ax ikx weye, kjawil nsk'o'ne jun k'ixb'isab'l tu'n ttzaj wi'ne kyib'aj, ex ktzajel wi'ne aju nimxix in che xob' twitz, ex e tzaj ntxko'ne, ex mi a'l jun tzaj tzaq'wente weye, in yoline kyuk'il, ex minti' in tzaj kyb'i'n; o kyb'incha aju minti' in kub' tuj nwitze, jaw kysk'o'n aju minti' in chin tzalaje ti'j.

⁵Kyb'inxe tyol Qman, aqeye b'a'n che niman tyol: At junjun kyxjalile in che ik'un kyi'je ex in che q'ojin kyi'je tu'nju in tzaj kyna'ne nb'iye, ex in kyma'n kyja': E ttzaj tyek'un Qman tajwalil; qajb'ile tu'n kyok qke'yine in che tzalaje, che chi. Ex ktzajel kych'ixwi qe xjal lu.

⁶Kyb'inxe tq'ajq'ajel kywi xjal in q'ajt tuj tnam, tuk'ix tq'ajq'ajel in q'ajt tuj tja Dios; atzun tq'ajq'ajel lu tu'n Qman, porke in kub' tq'o'n kycastiw qe xjal aj q'oj ti'j.

⁷Aju tnam Sión ik tten ik tza'n jun xu'j noq minab'en nnu'l itz'j tal na'nxtoq ttzaj ta'w tk'u'j tu'n tul itz'j tal.

⁸¿Alkye jun o tb'ixi ik tza'n jlu? ¿Alkye jun o lonte ik tza'n tten jlu? ¿Tzinpe nnu'l itz'j jun nasyon te junx q'ij? ¿Tzinpe nnu'l itz'j jun tnam jurat naj? Ex tej ttzaj ta'w tk'u'j tnam Sión, jurat naj e ul itz'j qe tal.

⁹Mlay b'ant tu'n tmayet wu'ne tu'n mi'n kyul itz'j qe k'wa'l, porke wu'ne in xi nq'o'ne amb'il tu'n kyul itz'j, chi Kydiose.

¹⁰Che tzalajxe tuk'il tnam Jerusalén, che tzalajxe nim junx tuk'il aqeye at kyk'ujlalile ti'j, che tzalajxe nim junx tuk'il kykyaqile aqeye o che b'aj oq'e ti'j;

¹¹ex atzunte tnam Jerusalén ik k'okel ik tza'n jun txub'aj, che okel k'a'chine tu'n okxi tnoj kyk'u'je ex kq'uqb'anjtzel kyk'u'je tu'n.

¹²Porke aqine Kymane kxel nma'ne jlu: Ok nb'incha'ye tu'n tten Jerusalén tuj txub'txaj ik tza'n a' tuj jun nima nimxix at, ex atzun kyq'inumab'l qe nasyon kxel nq'o'ne, ik k'okel ik tza'n jun nima otoq tz'ex qojl tuj tb'e. Atzunju tnam Jerusalén kk'a'chal te kyeye, che jawil chle'ne tu'n tuj tq'ab' ex che okel xmoxine tu'n q'uql qeye twi tqan.

¹³Ik tza'n jun txub'aj in xi tq'uqb'a'n tk'u'j tal, kyja'xtzun weye kxel nq'uqb'a'ne kyk'u'je, ex knetel q'uqb'ab'l kyk'u'je tuj Jerusalén.

¹⁴Oktzun kylonteye jlu, kjawil tzalaj kyanmiye; k'okel ak'aj tipumal kyximlale ik tza'n cha'x k'ul. Ktzajel tyek'un Qman tipumal kyxol qe tmajen, ax ikx ktzajel tq'oj kyi'j qe aj q'oj ti'j.

¹⁵Porke tzul Qman tuk'il tqan q'aq', qe tcarwaj mer ik tza'n jun xkyaqinpaẍ; ktzajel ttzoqpi'n ttx'u'jil tuk'ix tq'oj; aju castiw ktzajel tq'o'n in k'ant ik tza'n q'aq'.

¹⁶Ax tok tzul jwisi tu'n Qman tuk'il q'aq'; kb'el kycastiw kykyaqil xjal tu'n tu'nju t-spad q'i'n, ex che kymel nimku xjal tu'n.

¹⁷In tman Qman kyja': Aqeju in b'aj kyxjansan kyib' tu'n kyk'ulun kywitz tilb'ilal kyxol tqan awal, lepchix qe ti'j jun nejenel kyxol ex in xi kychyo'n tchib'jal b'och ex tchib'jal ich' ex kychib'jal txqantl jil mayo'n tu'n ley, kykyaqil b'i'x che kymel te jumajx,

¹⁸porke ojtzqi'n wu'ne qe kyb'inchb'en ex kyximb'etz. Chin ultzune ex ax qine chin okel chmonte qe tnam ex qe nasyon, che ul ex k'okel kyke'yin aju wajwalile.

¹⁹Kxel nq'o'ne jun techal kye; kxel nq'o'ne amb'il tu'n kykyaj anq'in junjun ex che xel nsama'ne kyuj qe nasyon lu: Tuj Tarsis, Libia, Lidia, atzunju tnam lu jatum ate' qe xjal b'a'n che yukun xob'l plech, tuj Tubal, Grecia ex kyuj qe tx'otx' ate' najchaq ttzi'yile mar, aqeju b'ajx kyb'i tqanil wi'je ex b'ajx kyil wajwalile; ex atzun qe che xel q'mante tqanil wajwalile kyxol qe nasyon.

²⁰Che tzajel q'i'n kykyaqil kyxjalile kyuj kykyaqil nasyon; at che ul tib'aj chej, at tuj carwaj, ex at kyuj carret jawo'n kyu'n chej, at kyib'aj chej mul ex kyib'aj chej camey, ik che okel ik tza'n jun oyaj te weye tuj Jerusalén aju witz xjan etzan wu'ne, ik tza'n qe oyaj in tzaj kyi'n aj Israel kyuj qe vas saqxix kyuj tu'n tul kyi'n tuj njaye. Aqine Dios ma chin q'mante jlu.

²¹Che jawil nsk'o'ne junjun kyxol tu'n kyok te pal ex te aj Leví. Aqine Dios ma chin q'mante jlu.

²²Ax ikx in tma'n Qman kyja': Ik tza'n ju ak'aj kya'j ex ju ak'aj tx'otx' aqeju che b'antel wu'ne che tel te jumajx, ikxtzun qe kyiyjile che tel te jumajx tuk'ix kyb'iye.

²³Ex teyle junjun xjaw, tuj q'ij ok in tzaj ke'yin ak'aj xjaw, ax ikx tuj teyle junjun seman, tuj q'ij te ojlab'l, che tzajel kykyaqil xjal tu'n kykub' ẍmeje' nwitze. Aqine Dios ma chin q'mante jlu.

²⁴Ok kyex, ok kyila' kyximlal qe kyimni e kyim tu'n tlaj tjawlen kyi'n kyib' tu'n kyq'ojin wi'je. Mlay che kyim qe ẍuq' che chyo'l kyi'j ex mlay yupj q'aq' jatum che okex xo'n tuj. A jlu ik'b'ilxix kye kykyaqil xjal.