Read kumam Isaías 7 Bible Online

Isaías 7 - kumam bible

Isaías 7

¹Aju rey te Siria Rezín tb'i, ex aju rey kye aj Israel Peka tb'i, aju tky'ajal Remalías, e ok tzoqpaj jlu q'ojlel kyi'j aj Jerusalén ex o kyajb'e tu'n tkub' kyi'j kyu'n, ex minti'x kub' kyi'j. O b'aj jlu tuj tq'ijlalil tej tok Acaz aju tky'ajal Jotam ex tal tchman Uzías te rey tuj Judá.

²Tuj q'ij lu, pon tqanil lu tuk'il rey Acaz ex kyuk'il qeju ate' tuj tja: Ma tz'ok kyjunin kyib' aj Siria kyuk'il aj Efraín. Tej tb'inte rey kyuk'ix qe xjal, e ok ten lu'lul ik tza'n in che yukch qe tze' tuj chk'ul ok in tzaj kyq'iq'.

³Tzajtzun tma'n Qman te Isaías kyja': Uk'inx tky'ajala Sear-jasub,[1] ex txi'ya kanil ti'j rey Acaz ma jatum ponin b'aj tb'eyil a' tuj tkub'il te jawni, tuj b'e in xi' tuj tkojb'il ju xjal tx'jol ti'j xb'alun,

⁴ex q'manxa te kyja': Ten tkwenta, mi'n jaw sek'paja ex mi'n xob'a, mi'n tzaj b'aj tk'u'ja kyu'n qe kab'e xjal lu; ik qe ik tza'n kab'e ttxa'n q'aq' in che qusin, ex atzun qe jlu: Rezín, kyuk'ix aj Siria, tuk'ix tky'ajal Remalías; nimxix kyq'oj ma tzaj.

⁵Qe aj Siria, kyuk'ix qe aj Efraín, tuk'ix tky'ajal Remalías, ma b'ant ti'j kyu'n tu'n kyb'inchante mya b'a'n ti'ja ex ma kyma kyja':

⁶E qok tzoqpaj q'ojlel kyi'j aj Judá ex e tok qxob'tza'n qe; e qok te tajwil kytx'otx' ex e tok qq'o'n tky'ajal Tabeel te rey kyib'aj, che chi.

⁷Ex chi Qman: Mlayx b'ant jlu ikju.

⁸Aju tnam Damasco, atzun jun nintz tnam tuj tx'otx' Siria, ex ate Rezín tok te rey tuj Damasco; atzunte Samaria, atzunju nintz tnam tuj tx'otx' Efraín, ex aju tky'ajal Remalías tok te rey tuj Samaria, ex tujxi 75 ab'q'i ja'lo, knajel kykawb'il aj Efraín; ax ikx kyeye qa minti' ma ten kyokslab'le axix tok, mlay che kyaj anq'ine, chi Qman.

¹⁰Ax ikx xi tma'n Isaías te Acaz aju yol tzaj tma'n Qman:

¹¹Qaninxa te Qman Dios tu'n tb'inchante jun señ nim tipumal tu'n tajb'en te teya, qa max tjaq'xi tx'otx' taja tu'n tke'yinjtz ex qa max tuj kya'j.

¹²Xi ttzaq'we'n Acaz: Mlay txi nqanine jun señ te Qman ex mlay tz'ok nq'o'ne tuj malb'il.

¹³Tma Isaías: Aqeye tiyjil rey David, kyb'intze: ¿Minti' in qe' kyk'u'je tu'n tb'aj kypasens xjal kyu'ne, ax ikx kyaje tu'n tb'aj tpasens Ndiose kyu'ne?

¹⁴Atzun ja'lo, ax te Qman ktzajel yek'unte jun señ kyeye: Kyb'intze: K'okel ten tal jun q'apoj ex q'a jun tal tzul itz'j, ex Emanuel[2] tb'i k'okel.

¹⁵Kyes kxe'l tu'n ex ta'l kab' okxi tel tnik' ti'j tu'n tel tik'un aju mya b'a'n ex tu'n tjaw t-sk'o'n aju b'a'n.

¹⁶Ex atxtoq taj tu'n tel tnik' tal ne' ti'j tu'n tel tik'un aju mya b'a'n ex tu'n tjaw t-sk'o'n aju b'a'n, kyjel kolin ju tx'otx' jatum ate' qe kab'e rey in tzaj t-xob'ila kyu'n.

¹⁷Tzul tq'ijlalil tu'n ttzaj ti'n Qman aju rey kye aj Asiria q'ojlel ti'ja, kyi'j qe t-xjalila ex kyi'j terman tmana, ex b'ajx tzaj jun maj ikju atxix tej tel kypa'n kyib' aj Efraín kyi'j aj Judá.

¹⁸Tuj tq'ijlalil tzul, che tzajel ti'n Qman qe xjal ate' max kytzi' qe nima te Egipto ik tza'n txqan us, ex che ul ti'n qe xjal ate' tuj Asiria ik tza'n txqan ttxu kab'.

¹⁹Kykyaqil qe jlu che ul tu'n kykub' ten kyuj qe tqan xaq ma' kyxe' ex kyuj qe toy' pik, tuj tkyaqil tqan ch'i'x ex kyuj qe lugar jatum in che k'an alumaj a'.

²⁰Ok tul tq'ijlalil lu, k'ajb'el rey te Asiria tu'n Qman ik tza'n jun navaj in tzaj majanit, max jlajxi nima Éufrates, ex k'elel b'aj ti'n tkyaqil ttxa'n kywi' aj Israel tuk'ix kyxmatz ex xya'n kyi'j.

²¹Ok tul tq'ijlalil lu, qa ma ch'iy jun vac ex kab'e chip tu'n jun xjal,

²²ktel nim lech tuk'il ex kchyo'l kyes. Ex kykyaqil xjal che kyjel ten ok tnaj tnam, che chyo'l kyes ex che lo'l ta'l kab'.

²³Tuj tq'ijlalil lu, aju lugar attoq jun mil wi' tqan uva tuj, ex ax jun mil saq pwaq twi', k'okel te jun lugar at nim ch'i'x k'ul ex ch'i'x tze' tuj.

²⁴Noq o'kx tu'n arc xo'l plech in ajb'en tu'n kykub' jil jaku che okx xjal tuj lugar lu, porke enter tnam k'okel te tqan ch'i'x k'ul ex ch'i'x tze'.

²⁵Ktzajel ch'iy nim tqan ch'i'x k'ul ex ch'i'x tze' kywi'yile tal witz jatum in aq'net tx'otx' tu'n ch'ok nej, ex mi a'l jun xjal kxel b'etel tuj. O'kx k'ajb'el jlu te kywab'l wakẍ ex kywab'l ẍne'l.