Read kumam Isaías 8 Bible Online

Isaías 8 - kumam bible

Isaías 8

¹Tzaj tma'n Qman weye: Q'intza jun tz'lom ma tij ex tz'ib'an kub'a tu'n letr clarxix aju yol lu: Maher-salal-hasbaz.[3]

²Ex q'intza pal Urías, tuk'ix Zacarías aju tky'ajal Jeberequías, tu'n kyok te testiw, ex ax tok che yolin, chi Qman.

³Yajxi ch'intl, ok nmojb'an wib'e tuk'il ju xu'j pakb'al tyol Dios, aju nxu'jile; ok ten jun tal ex ul itz'j jun tal xinaq. Tzajtzun tma'n Qman weye: Q'on oka tb'i ne' Maher-salal-hasbaz.

⁴Tu'nju na'nxtoq tb'ant tmante tal ne': Tat ex qa Nan, k'eletz q'i'n q'inumab'l tuj tnam Damasco ex tuj tnam Samaria ex kxel q'i'n tu'n tpon tuk'il rey te Asiria.

⁵Ex tzaj tma'ntl Qman weye:

⁶Tu'nju ma tz'el kyik'un qe xjal aju a' Siloé, aju cheb'a in b'et, ex ma che tzalaj ti'j rey Rezín ex ti'j rey Peka aju tky'ajal Remalías,

⁷kyja'tzun ktzajel wi'ne aju rey kye aj Asiria, kyuk'ix kykyaqil qe t-soldad, tu'n kyok tzoqpaj q'ojlel kyi'j aj Judá; che ul ik tza'n nima Éufrates in ch'iy nimxix wen ex in b'aj naj tkyaqil aju at ttzi a' tu'n;

⁸kb'ajel naj tkyaqil kyu'n, mer ik tza'n otoq noj tuj tx'otx' Judá tu'n nima ex mer ik tza'n otoq japun a' twi kysemil xjal. Ik che okel qe aj q'oj, ik tza'n jun chyu'j lik'un qe t-xik', ex in maqset tkyaqil ttx'otx'a kyu'n, aya Emanuel.

⁹Aqeye nasyon, kychmo'n ok kyib'e ex che najele; kyb'intze jlu aqeye tnam najchaq ate'ye: Maske b'ant kytene tu'n kyq'ojine, che najele; ax tok, maske b'ant kytene tu'n kyq'ojine, che najele.

¹⁰Che ximane ti'j aju kyaje tu'n tb'ant, ex kb'ajel naj kyximb'etze; kyximan kub'e alkye kyaje, ex mlayx japun, tu'nju at Dios quk'ile.

¹¹In tzaj tzyu'ne tu'n Qman kyuwxix wen ex tzaj tma'n weye tu'n mi'n wok lpe'ye ti'j kymod xjal lu ex tma kyja':

¹²Ok kymante xjal: At xob'ajil qi'j tu'nju in che ximan xjal tu'n kyb'inchante mya b'a'n qi'j, qa che chi, mi'n tz'okx kyq'on kyib'e kyxol. Mi'n che sek'paje ex mi'n che xob'e ti'j tkyaqilju in che el xob' ti'j.

¹³Aqine Kymane aju Tajaw Tkyaqil, aqine tu'n wok kyq'o'ne te xjan, ex b'a'n tu'n tten nchiylale kyi'je ex tu'n kyxob'e nwitze.

¹⁴Chin okele te jun lugar jatum tu'n kyklete; ex te kye qe kab'e k'loj tiyjil Israel chin okele te jun ab'j tu'n kyjaw tolj ti'j; chin okele ik tza'n jun k'ob'il kye aj Jerusalén, tu'n kyjaw tz'aq tuj.

¹⁵Nimku che jawil tolj tu'n kykub' tz'aq ex che kymel; nimku che b'el tz'aq tuj k'ob'il ex che tzyetel tu'n, chi Qman.

¹⁶Kyk'u'nxe aju yol lu ex b'i'x kyq'on kyaje tal aju tkub'il nxnaq'tzb'ile.

¹⁷Maske ma kub' tewan tib' Qman kywitz qe tiyjil Jacob, atzun weye chin ayole ti'j, porke o'kx ti'j ma qe' nk'u'je.

¹⁸Aqine ex qe nk'wa'le ma che tzaj tq'o'n Qman weye, qo ajb'ele te jun techal kyxol aj Israel. Tu'n Qman aju Tajaw Tkyaqil ma qo ok q'o'ne ikju, aju najl twi witz Sión.

¹⁹Ex qa ma tzaj kyma'n xjal kyeye: Kyqaninxe jun yol te kyanmi kyimni ex kye aj q'ij, qa che chi, aqeju in b'aj kych'expu'n tq'ajq'ajel kywi' ok kyyolin ex ok kyjasun, atzun kyeye kxel kytzaq'we'ne kyja': ¿Baqa mya b'a'n tu'n kyqanin xjal jun yol te Kydios? ¿B'a'npe tu'n kyqanin jun consej kye kyimni kyi'j qe itz'x?

²⁰Kyb'inxe aju xnaq'tzb'il ex aju tley Dios. Qa minti' in kyma'n xjal ik tza'nx ju yol lu, kukx ate' tuj qlolj.

²¹Noq che b'etjeb'el qe xjal, ktzajel yajb'il kyi'j ex k'okel ta'w we'yaj kyi'j, ex tu'n ta'w we'yaj ktzajel nim kyq'oj. Tu'ntzun jlu kxe'l kyyol ti'j kyrey ex ti'j Kydios. Ex kjawil kyi'n kywitz jawni,

²²ex te tib'ajxi kb'el kyke'yin twitz tx'otx'; o'kx yajb'il tzul kyib'aj, tuk'ix qlolj ex qxopin ex nim b'is. Kykyaqil che kyjel ten tuj qlolj.