Read kumam Levítico 1 Bible Online

Levítico 1 - kumam bible

Levítico 1

¹O txokl Moisés tu'n Qman max tuj ja xb'alun te mojb'ab'l tib'il ex tma:

²Yolina kyuk'il aj Israel ex q'manxa kye kyja': Qa at jun kye ma tzaj tq'o'n alumaj te jun oyaj weye, b'a'n tu'n tetz ti'n kyxol qe twakẍ ex qa kyxol qe t-ẍne'l.

³Qa kyxol qe tex twakẍ k'eletz ti'n aju ktzajel tq'o'n weye te jun oyaj patun in kub', il ti'j tu'n ttzaj tq'o'n jun tor minti' ch'in tpaltil. Tu'n tk'monjtz oyaj lu, il ti'j tu'n tkub' patit nwitze ttzi ja xb'alun te mojb'ab'l tib'il,

⁴ex kb'el tq'o'n xjal tq'ab' tib'aj twi' alumaj. Kyja'tzun kk'monjtzel alumaj ex knajsetel til xjal.

⁵K'okex tqesin xjal tjaq' tqul tor nwitze, atzun kye pal tiyjil Aarón, ktzajel kyyek'un chik' nwitze, ex te tib'ajxi k'okel kytx'ito'n ti'jele tk'u'j altar aju tkub'sa'n ttzi ja xb'alun te mojb'ab'l tib'il.

⁶K'elel ti'n ttz'umal ex kb'ajel tqesin xjal t-ximlal alumaj tuj piẍun,

⁷atzun kye pal, aqeju tiyjil Aarón, kb'el kyq'o'n q'aq' tib'aj altar ex kb'el kyb'incha'n tten si' tib'aj.

⁸Ex kb'el kyq'o'n alumaj tuj piẍun tten, tuk'ix twi', tuk'ix t-sebyil, tib'aj q'aq' tjax tib'aj altar.

⁹Ex ax xjal kb'ajel tx'jonte tuj tk'u'j alumaj tu'n a', kyuk'ix qe tqan; atzunte pal kb'el tpatun tkyaqil jlu tib'aj altar, te jun oyaj patun in kub' at tk'ok'jal in chin tzalaje ti'j.

¹⁰Qa kyxol qe tex t-ẍne'l ex qa tchip k'eletz ti'n aju ktzajel tq'o'n weye te jun oyaj patun in kub', il ti'j tu'n ttzaj tq'o'n jun tman minti' tpaltil.

¹¹K'okex tqesin xjal tjaq' tqul alumaj nwitze tuj tb'anq'ab' q'ij te altar. Atzun kye pal tiyjil Aarón, kxel kytx'ito'n tchk'el alumaj ti'jele tk'u'j altar.

¹²Kb'ajel tqesin xjal t-ximlal alumaj tuj piẍun; atzunte pal kb'el tq'o'n chib'j qesimaj tib'aj si' in k'ant tu'n q'aq' tjax tib'aj altar, junx tuk'il twi' ex t-sebyil.

¹³Ex ax xjal kb'ajel tx'jonte tu'n a' qeju tuj tk'u'j alumaj, kyuk'ix qe tqan ex qe tkux; atzunte pal kb'el tpatun tkyaqil jlu tib'aj altar te jun oyaj patun in kub' at tk'ok'jal in chin tzalaje ti'j.

¹⁴Qatzun jun chyu'j ktzajel tq'o'n xjal te toyaj patun in kub' te weye, il ti'j tu'n ttzaj tq'o'n jun ẍpo'q ex qa jun tal paloma.

¹⁵Ktzajel ti'n pal aju chyu'j, k'elel tjawo'n twi' ex kb'el tpatun tib'aj altar tel-lenxi tyatz'o'n tchk'el ti'j tk'u'j altar.

¹⁶K'eletz ti'n twab'l chyu'j tuk'ix tkyaqil ttz'ilil at tuj, ex k'elex t-xo'n tumlal tjawitz q'ij te altar, tuj lugar jatum nne'x qet tza'j;

¹⁷ex kb'el tpik'chu'n ttzi t-xu'k chyu'j ex ktzajel ttzyu'n kyi'j qe tq'ab', ex mi'n kub' ti'n tmij, ex te mankb'ilxitzun kb'el tpatun chyu'j te oyaj tib'aj si' in k'ant tu'n q'aq' tjax tib'aj altar, te jun oyaj patun in kub' at tk'ok'jal in chin tzalaje ti'j.