Read kumam Levítico 11 Bible Online

Levítico 11 - kumam bible

Levítico 11

¹Tzaj yolin Qman tuk'il Moisés ex tuk'il Aarón, chi kyja':

²Kymanxe kye aj Israel alkye qe jil b'a'n tu'n t-xi kychyo'n kyxol kykyaqil qe jil ate' twitz tx'otx':

³B'a'n tu'n t-xi kychyo'n aqeju b'a'n che kok'san kywa ex pa'n tten t-xol t-xpak'il kyqan;

⁴pero kyxol qeju b'a'n che kok'san kywa ex qa pa'n tten kyxol tpas kyqan, mi'n txi kychyo'n qe jlu: Aju chej camey, maske b'a'n kok'san twa, pero mya pa'n tten kyxol tpas tqan. B'a'n tu'n tok kyq'o'ne te tz'il.

⁵Ikx jil cuatusa, maske b'a'n kok'san twa, pero minti' t-xpak'il tqan pa'n tten. B'a'n tu'n tok kyq'o'ne te tz'il.

⁶Ikx ẍik, maske b'a'n kok'san twa, pero minti' t-xpak'il tqan pa'n tten. B'a'n tu'n tok kyq'o'ne te tz'il.

⁷Ikx b'och, maske at t-xpak'il tqan pa'n tten kyxol, pero mib'an kok'san twa. B'a'n tu'n tok kyq'o'ne te tz'il.

⁸Mi'n txi kychyo'ne kychib'jal qe jil lu, ex mi'n tz'ok kymako'ne kyximlal qa otoq che kyim. B'a'n tu'n tok kyq'o'ne te tz'il qe jil lu.

⁹Kyxol qe jil najl tuj a', qa tuj mar ex qa tuj nima, o'kx b'a'n tu'n t-xi kychyo'ne aqeju at kyq'ab' ex at tpwaqil kyi'j.

¹⁰Atzun qeju minti' kyq'ab' ex minti' tpwaqil kyi'j, b'a'n tu'n tel kyik'une, maske ate' tuj mar ex qa tuj nima, tza'nx qe kok' ax ikx qe nmaq.

¹¹Mi'n txi kychyo'ne kychib'jal; b'a'n tu'n tel kyik'une qe jil lu, ax ikx b'a'n tu'n tel kyik'une kyximlal ok kykyim.

¹²Kykyaqil txkup ate' tuj a', qa minti' kyq'ab' ex minti' tpwaqil kyi'j, b'a'n tu'n tel kyik'une.

¹³Kyxol qe jil in che lipan twitz kya'j, aqeju mya b'a'n tu'n t-xi kychyo'ne ex b'a'n tu'n tel kyik'une, atzun qe jlu: qe t'iw, qe quebrantahuesos, qe k'utz,

¹⁴qe milano, tkyaqil txkaj halcones,

¹⁵tkyaqil txkaj joj,

¹⁶qe avestrúz, qe xitx', qe gaviota, tkyaqil txkaj q'anjan,

¹⁷qe tol, qe cormorán, qe ibis,

¹⁸qe cisne, qe pelícano, qe azor,

¹⁹qe cigüeña, tkyaqil txkaj garza, qe tal chyu'j abubilla ex qe sotz'.

²⁰Ex tkyaqil tal jil b'a'n che lipan ex b'a'n che b'et tu'n kyaje kyqan, b'a'n tu'n tel kyik'une,

²¹ex b'a'n tu'n t-xi kychyo'ne junjun kyxol qe tal jil b'a'n che lipan ex b'a'n che b'et tu'n kyaje kyqan, ex qa at kykux ex qa at kyqan tu'n tb'ant kyt'ikpaj twitz tx'otx'.

²²Ex atzun qe jlu b'a'n tu'n t-xi kychyo'ne: Tkyaqil txkaj ẍplon, qe kok' ex qe nmaq, qe ch'i'l, kyuk'ix qe xtxil.

²³Ex tkyaqil txqantl tal jil b'a'n che lipan ex b'a'n che b'et tu'n kyaje kyqan, b'a'n tu'n tel kyik'une.

²⁴Ax ikx jaku che tz'ilixe kyu'n qe jlu: Noq alkye jun ma tz'ok makonte t-ximlal jun tal jil kyimni, b'i'x ktz'ilixtel ex k'okel juntl maj te saq okxi ttzaj qlolj.

²⁵Noq alkye jun ma jaw q'inte t-ximlal jun tal jil kyimni, ktz'ilixtel; b'a'n tu'n tb'aj ttx'jo'n ti'j t-xb'alun ex k'okel juntl maj te saq okxi ttzaj qlolj.

²⁶Kykyaqil qe jil at tpas kyqan, ex qa mya pa'n tten kyxol tpas kyqan ex qa mib'an che kok'san kywa, b'a'n tu'n tok kyq'o'ne te tz'il, ex qa at jun ma tz'ok makonte kyximlal ok kykyim, b'i'x k'okel te tz'il.

²⁷Kykyaqil jil at kyaje kyqan ex in che b'et tib'aj tlaqil kyqan, b'a'n tu'n tok kyq'o'ne te tz'il, ex noq alkye jun ma tz'ok makonte t-ximlal jun jil lu kyimni, b'i'x ktz'ilixtel tu'n; ex k'okel te saq juntl maj okxi ttzaj qlolj.

²⁸Ax ikx qa at jun ma jaw q'inte t-ximlal jun jil lu, ktel tuj ttz'ilil; b'a'n tu'n tjatz ttx'jo'n ti'j t-xb'alun ex k'okel juntl maj te saq okxi ttzaj qlolj. B'a'n tu'n tok kyq'o'ne qe jil lu te tz'il.

²⁹Ex kyxol qe jil in xi kyjaqu'n kyk'u'j twitz tx'otx', b'a'n tu'n tok kyq'o'ne te tz'il qe jlu: Qe saqb'in, qe ich', tkyaqil txkaj ẍal,

³⁰qe xmatx ex tkyaqil txkaj ẍula, qe lagarto, qe cocodrilo ex qe camaleón.

³¹K'okel kyq'o'ne qe jil lu te tz'il; noq alkye jun ma tz'ok makonte kyximlal kyimni qe, b'i'x ktz'ilixtel kyu'n ex max k'okel te saq juntl maj okxi ttzaj qlolj.

³²Ax ikx qa ma kub' tz'aq t-ximlal jun jil lu kyimni tib'aj jun tze' at tajb'en, jun xb'alun, jun tz'u'm, jun sac, ex qa noq alkyex jun makb'il in ajb'en tuj aq'untl, b'i'x ktz'ilixtel tu'n. Kb'elex q'ot tuj a', tu'nju otoq tz'ilix, ex max k'okel te saq juntl maj okxi ttzaj qlolj.

³³Qa ma txi tz'aq t-ximlal jun jil lu kyimni tuj jun k'il tx'otx' ttx'otx'il, b'i'x ktz'ilixtel tuk'ix tkyaqilju at tuj, ex aju k'il lu, b'i'x kb'el pa't.

³⁴Qa ma ku'x tz'aq jun jil tuj a' ex qa ma tz'ajb'en ch'in a' lu ti'j chib'j ex qa ti'j k'ab'j, b'i'x ktz'ilixtel chib'j ex qa k'ab'j tu'n.

³⁵Qa ma kub' tz'aq t-ximlal jun jil lu kyimni tib'aj noq alkyex jun ti'xti, b'i'x ktz'ilixtel; qa tib'aj jun jorni ex qa tib'aj jun tkub'il q'aq', il ti'j tu'n tkub' xitit tu'nju otoq tz'ilix.

³⁶Qatzun ma txi tz'aq t-ximlal jun jil lu kyimni tuj jun twi a', ex qa jatum in chmet a', ate a' mlay tz'ilix, atzunte xjal kjawitz q'inte t-ximlal jil tuj a', b'i'x ktz'ilixtel.

³⁷Qa ma kub' tz'aq t-ximlal jun jil lu kyimni tib'aj iyaj tu'n tku'x awat, ate iyaj kukx ktel saq;

³⁸ex qatzun otoq ak'set iyaj ok tkub' tz'aq t-ximlal jil lu kyimni tib'aj, tu'n jlu ktz'ilixtel iyaj tu'n.

³⁹Qa ma kyim jun jil b'a'n tchyo'njtz ex qa at jun xjal ma tz'ok makonte t-ximlal, b'i'x ktz'ilixtel tu'n, max k'okel te saq juntl maj okxi ttzaj qlolj.

⁴⁰Qa at jun xjal ma txi chyo'nte tchib'jal jil otoq kyim, ktz'ilixtel tu'n; kjawitz ttx'jo'n ti'j t-xb'alun ex k'okel te saq juntl maj okxi ttzaj qlolj. Ex alkye jun ma jaw q'inte t-ximlal jil kyimni, ax ikx ktz'ilixtel tu'n, kjawitz ttx'jo'n ti'j t-xb'alun ex max k'okel juntl maj te saq okxi ttzaj qlolj.

⁴¹Mi'n txi kychyo'ne qe jil jaqu'n in xi' kyk'u'j twitz tx'otx', ik'b'il qe jlu.

⁴²Mi'n txi kychyo'ne kykyaqil txkaj jil jaqu'n in xi' kyk'u'j twitz tx'otx' ex qa in che b'et tu'n kyaje kyqan ex qa mas, porke ik'b'il qe jlu.

⁴³Mi'n tz'ok kyq'on kyib'e te ik'b'il ex te tz'il kyu'n qe jil jaqu'n in xi' kyk'u'j twitz tx'otx', ex mi'n txi kyq'o'ne amb'il tu'n kyoke te tz'il kyu'n.

⁴⁴Aqine Kymane ex Kydiose, kyja'tzun il ti'j tu'n kyoke saq ex xjan, porke xjan qine. Mi'n b'aj kytz'ilsan kyib'e kyu'n qe jil jaqu'n in xi' kyk'u'j twitz tx'otx'.

⁴⁵Aqine Kymane etz q'inte kyeye tuj Egipto tu'ntzun woke te Kydiose. Kyja'tzun b'a'n tu'n kyoke te xjan, porke xjan qine, chi Dios.

⁴⁶Atzun qe ley lu kyi'j qe jil, qe chyu'j in che lipan twitz kya'j, kykyaqil jil in che yukch tuj a', ex kykyaqil jil jaqu'n in xi' kyk'u'j twitz tx'otx',

⁴⁷tu'ntzun tel kynik'e ti'j alkye saq ex alkye tz'il, ex tu'n tel kynik'e kyi'j alkye qe jil b'a'n kychyo'njtz ex alkye qe mib'an kychyo'njtz.