Read kumam Levítico 14 Bible Online

Levítico 14 - kumam bible

Levítico 14

²Atzun qe ley lu tu'n t-saqset jun xjal yab' tu'nju tx'a'k minti' q'anb'il ti'j: Kxel q'it xjal yab' tuk'il pal,

³atzunte pal k'elex ti'jxi campament tu'ntzun tb'aj tke'yin. Qa ma til pal otoq b'anix xjal tu'n tx'a'k minti' q'anb'il ti'j,

⁴kxel t-sama'n jun xjal lolte kab'e tal chyu'j itz'x qe, kyxol qeju mya tz'il qe, tuk'ix jun piẍ tze' wi'ten, tuk'ix jun piẍ xb'alun kyaq ke'yin ex jun wiq tal k'ul hisopo, tu'ntzun t-saqset xjal yab'.

⁵Kxel tma'n pal tu'n tkub' b'yet jun tal chyu'j tib'aj jun k'il tx'otx' ttx'otx'il at a' tuj, ex aju a' lu ktzajel q'it max ti'j a' saq in b'et.

⁶Ktzajeltzun ti'n pal aju tal chyu'j itz'x, tuk'ix tze' wi'ten, tuk'ix xb'alun kyaq ke'yin ex tuk'ix tal k'ul hisopo, ex che b'elex tmu'n tuj tchk'el tal chyu'j otoq kub' b'yo'n tib'aj a' otoq tzaj q'i'n ti'j a' in b'et.

⁷Wuq maj kxel ttx'ito'n pal chik' lu tib'aj xjal ksaqsetel te tx'a'k minti' q'anb'il ti'j, ex kxe'ltzun tma'n qa otoq saqix xjal lu. Atzunju tal chyu'j itz'x kxel ttzoqpi'n tuj kojb'il.

⁸Aju xjal ksaqsetel, kjawitz ttx'jo'n ti'j t-xb'alun, ax ikx te kchil ex k'elel tmatzo'n tkyaqil t-xmatz tu'ntzun t-saqix. Te tib'ajxitzun, b'a'n tu'n tokx tuj campament, ex il ti'j tu'n tkyaj ten wuq q'ij ti'jxi tja.

⁹Tujtzun twuqin q'ij k'elel k'oẍit ti'j twi', ex k'elel ti'n t-xmatz kyuk'ix qe t-xi'witz ex tkyaqil xya'n tok ti'j, kjawitz ttx'jo'n kyi'j qe t-xb'alun, ax ikx il ti'j tu'n tchin, ex ksaqseteltzun.

¹⁰Tujtzun twajxaqin q'ij, ktzajel ti'n kab'e tal tman ẍne'l minti' kypaltil, tuk'ix jun tal ttxu ẍne'l ma te jun ab'q'i, ax ikx minti' tpaltil; tuk'ix qaq libr arin tb'anilxix ex kab'e octav tuk' mey chib'j aseyt, te jun oyaj ti'j twitz awal xyoq'amaj tuk'il aseyt.

¹¹Aju pal ksaqsalte xjal kb'el tq'o'n aju xjal twitz Qman, kyuk'ix qe toyaj, ttzi ja xb'alun te mojb'ab'l tib'il.

¹²Ktzajeltzun ti'n pal jun tal tman ẍne'l, ex kxel tq'o'n junx tuk'il kab'e octav tuk' mey aseyt te chojb'il tpaltil xjal, ex kxel tyukun te jun oyaj yukun in xi' twitz Qman.

¹³Atzun kb'el tb'yo'n tal tman ẍne'l tuj lugar xjansamaj jatum in che kub' b'yo'n qe alumaj te chojb'il il ex qe oyaj patun in che kub'. Aju chojb'il ti'j tpaltil xjal, te pal k'ajb'el, ik tza'nx in tenb'a ju chojb'il ti'j il. A jlu xjanxix qe.

¹⁴Te tib'ajxi ktzajel ti'n pal ch'in tchk'el tal tman ẍne'l, aju otoq txi q'ot te chojb'il tpaltil xjal, ex k'okel t-su'n ch'in ti'j tje' t-ẍkyin xjal tuj tb'anq'ab', aju ksaqsetel, tuk'ix ti'j tal tman tb'anq'ab' ex ti'j tal tman tqan tuj tb'anq'ab'.

¹⁵Ktzajel ti'n pal ch'in aseyt ex kb'el tq'o'n tuj tlaqil tq'ab' tuj tnayaj;

¹⁶ex kb'elex tmu'n twi' tal tb'anq'ab' tuj aseyt at tuj tlaqil tq'ab' tuj tnayaj, ex tu'nx twi' tal tq'ab' kxel ttx'ito'n aseyt wuq maj twitz Qman.

¹⁷Ti'j aseyt kyjel tentl tuj tq'ab' pal, k'okel t-su'n ch'in ti'j tje' t-ẍkyin xjal tuj tb'anq'ab', aju ksaqsetel, tuk'ix ti'j tal tman tb'anq'ab' ex ti'j tal tman tqan tuj tb'anq'ab', ax jatum otoq tz'ok q'ot tchk'el alumaj, aju otoq txi q'ot te chojb'il ti'j tpaltil xjal,

¹⁸ex aju aseyt kjel ten tuj tlaqil tq'ab' pal, kb'el tqo'n tuj twi' xjal ksaqsetel. Kyja'tzun kchjetel til xjal twitz Qman tu'n pal.

¹⁹Ex kb'el tb'yo'n pal aju tal tman ẍne'l te chojb'il il, tu'ntzun t-saqset xjal tz'iltoq ta'; ex te tib'ajxi kb'el tb'yo'n aju alumaj te oyaj patun in kub',

²⁰ex kb'el tq'o'n tib'aj altar, junx tuk'il oyaj ti'j twitz awal. Kyja'tzun kchjetel til xjal tu'n pal twitz Qman, ex ksaqseteltzun.

²¹Qatzun meb'a te xjal yab' ex minti' tumel tu'n ttzaj tq'o'n tkyaqil jlu, ktzajeltzun ti'n junx tal tman ẍne'l te chojb'il tpaltil, ex kxel toyin te Qman te jun oyaj yukun in xi' tu'ntzun tchjet til, tuk'ix kab'e libr arin aju mas tb'anil xyoq'amaj tuk'il aseyt, te jun oyaj ti'j twitz awal, tuk'ix kab'e oktav tuk' mey aseyt,

²²kyuk'ix kab'e ẍpo'q ex qa kab'e tal paloma, noq alkye jaku laq'et tu'n, jun te chojb'il il ex juntl te oyaj patun in kub'.

²³Tuj twajxaqin q'ij kxel ti'n tkyaqil jlu tuk'il pal, te saqsab'l te; ex kxel tq'o'n twitz Qman ttzi ja xb'alun te mojb'ab'l tib'il.

²⁴Atzunte pal ktzajel ti'n tal tman ẍne'l te chojb'il tpaltil xjal, tuk'ix kab'e oktav tuk' mey aseyt, ex kxel tyukun twitz Qman te jun oyaj yukun in xi'.

²⁵K'okex tqesin tjaq' tqul tal tman ẍne'l te chojb'il tpaltil xjal, ktzajel ti'n ch'in tchk'el tal tman ẍne'l, ex k'okel t-su'n ch'in ti'j tje' t-ẍkyin xjal tuj tb'anq'ab', aju ksaqsetel, tuk'ix ti'j tal tman tb'anq'ab' ex ti'j tal tman tqan tuj tb'anq'ab';

²⁶ex ktzajel ti'n pal ch'in aseyt ex kb'el tq'o'n tuj tlaqil tq'ab' tuj tnayaj,

²⁷ex wuq maj kxel ttx'ito'n twitz Qman tu'nju tal tb'anq'ab' aju aseyt tkub' tuj tlaqil tq'ab' tuj tnayaj.

²⁸Ax ikx aju xjal ksaqsetel, k'okel t-su'n pal ch'in aseyt ti'j tje' t-ẍkyin tuj tb'anq'ab' ex ti'j tal tman tb'anq'ab' ex ti'j tal tman tqan tuj tb'anq'ab', ax jatum otoq tz'ok su'n tchk'el alumaj te chojb'il ti'j tpaltil xjal.

²⁹Atzunju aseyt kyjel ten tuj tlaqil tq'ab' pal, kb'el tqo'n pal tuj twi' xjal ksaqsetel. Kyja'tzun kchjetel til xjal twitz Qman tu'n pal.

³⁰Kxe'ltzun tq'o'n pal aju ẍpo'q ex qa paloma noq alkye otoq knet tu'n xjal ksaqsetel,

³¹jun kxel tq'o'n te chojb'il il, atzun juntl te oyaj patun in kub', ex part oyaj ti'j twitz awal. Kyja'tzun kchjetel til xjal twitz Qman tu'n pal ex ksaqsetel.

³²Atzun qe ley lu kyi'j qe xjal yab' tu'n tx'a'k minti' q'anb'il ti'j, aqeju minti' tumel tu'n t-xi kyq'o'n jun kyoyaj matij te saqsab'l kye.

³³Tzaj yolin Qman tuk'il Moisés ex tuk'il Aarón, chi kyja':

³⁴Ok kyokxe tuj tx'otx' Canaán, aju kxel nq'o'ne te kyetzb'ile, qa ma txi nq'o'ne amb'il tu'n tjaw jlet q'ux tuj kyjaye tuj tx'otx' jatum che najalaye,

³⁵aju xjal tajaw ja kxe'l tuk'il pal, ex kxel tma'n te kyja': Mer ik tza'n nib'an tjaw jlet q'ux tuj njaye.

³⁶Atzunte pal kxel tma'n tu'n tetz q'i'n tkyaqilju at tuj ja na'nxtoq tokx pal tuj, tu'ntzun mi'n kytz'ilix kykyaqil ti'xti at tuj. Te tib'ajxitzun k'okex pal ke'yilte q'ux.

³⁷Oktzun tb'aj tke'yin pal aju q'ux, ex qa ma til tik'len q'ux twitz ja cha'xyin ke'yin ex qa kyaqyin ke'yin, ex qa otoq tz'okx lo'n twitz ja tu'n,

³⁸k'eletz pal tuj ja ex kyjel tlamo'n ja wuq q'ij.

³⁹Tujtzun twuqin q'ij kxe'l pal ke'yilte juntl maj, ex qatzun otoq tz'el laq'e' q'ux twitz ja,

⁴⁰kxe'ltzun tma'n tu'n kyel q'i'n qe ab'j at q'ux kyi'j, ex tu'n kyex xo't ti'jxi tnam tuj jun lugar tz'il.

⁴¹Ax ikx kxel tma'n tu'n tel jaqut tkyaqil twitz ja te tujxi, ex aju quq k'elel ok tel jaqut twitz ja, k'elex xo't ti'jxi tnam tuj jun lugar tz'il.

⁴²Ktzajeltzun q'it txqantl ab'j te kyxel qeju otoq che el q'i'n, ex ktzajel q'it ak'aj mescla tu'n tok q'ot repey twitz tkajonil ja.

⁴³Qatzun ma jaw jlet juntl maj q'ux tuj ja kyel-lenxi q'it qe ab'j, tel-lenxi jaqut twitz ja ex toklenxi ak'aj repey ti'j,

⁴⁴k'okextzun juntl maj pal ke'yilte. Qatzun otoq tz'el laq'e' q'ux tuj ja, xob'ajiltzun te q'ux lu, ex aju ja lu tz'il ta'.

⁴⁵Kyja'tzun il ti'j tu'n tkub' xitit ja lu, ex kykyaqil ab'j, tkyaqil tze' ex tkyaqil ttx'aqan repey k'elex xo't ti'jxi tnam tuj jun lugar tz'il.

⁴⁶Qa at jun xjal ma tz'okx tuj ja tuj q'ij tej lamo'ntoq tu'n pal, k'okel xjal lu te tz'il, ex max k'okel te saq okxi ttzaj qlolj.

⁴⁷Qa at jun ma wa'n ex qa ma tan tuj ja lu, il ti'j tu'n tjatz ttx'jo'n ti'j t-xb'alun tu'ntzun t-saqix.

⁴⁸Oktzun tokx pal ke'yilte ja, qa ma til minti' otoq tz'el laq'e' q'ux tb'ajlenxi q'ot repey ti'j, kxel tma'n pal qa saq ta' ja, porke aju q'ux otoq kub' naj.

⁴⁹Tu'n t-saqset ja lu, ktzajel ti'n pal kab'e tal chyu'j tuk'ix jun piẍ tze' wi'ten, tuk'ix jun piẍ xb'alun kyaq ke'yin ex jun wiq tal k'ul hisopo.

⁵⁰Kb'el tb'yo'n jun tal chyu'j tib'aj jun k'il tx'otx' ttx'otx'il tku'x a' tuj, aju a' lu ktzajel q'it ti'j a' saq in b'et.

⁵¹Ktzajeltzun ti'n pal tze' wi'ten tuk'ix tal k'ul hisopo, tuk'ix jun piẍ xb'alun kyaq ke'yin ex tal chyu'j itz'x, ex che b'elex tmu'n tuj tchk'el tal chyu'j otoq kub' b'yo'n, ex tuj a' otoq tzaj q'i'n ti'j a' saq in b'et, ex kxel ttx'ito'n wuq maj ti'j ja.

⁵²Kyja'tzun ksaqsetel ja tu'n tchk'el tal chyu'j ex tu'n a' otoq tzaj q'i'n ti'j a' saq in b'et, tu'n tal chyu'j itz'x, tu'n tze' wi'ten, tu'n tal k'ul hisopo ex tu'nju xb'alun kyaq ke'yin.

⁵³Te tib'ajxi kxel ttzoqpi'n pal tal chyu'j itz'x ti'jxi tnam tuj kojb'il, ex kyja'tzun tten kjapunel aju at tu'n tb'ant tu'n t-saqset jun ja.

⁵⁴Atzun qe ley lu kyi'j kykyaqil txkaj tx'a'k minti' q'anb'il kyi'j, ti'j sal,

⁵⁵ti'j sb'ak nno'k ten ti'j xb'alun, ti'j q'ux ti'j ja,

⁵⁶ti'j mal in jaw ti'j xjal, ti'j tx'a'k in jlet poj tuj ex kyi'j manch saq ke'yin;

⁵⁷tu'ntzun tel kynik'e ti'j alkye saq ex alkye tz'il. Atzun qe ley lu ti'j tx'a'k minti' q'anb'il ti'j ex ti'j sb'ak ex q'ux.