Read kumam Levítico 16 Bible Online

Levítico 16 - kumam bible

Levítico 16

¹Tzaj yolin Qman tuk'il Moisés kykyimlenxi kab'e tky'ajal Aarón, aqeju e kyim tu'nju e pon laq'e' niqayin twitz Qman,

²ex tzaj tma'n te kyja': —Q'manxa te termaniya Aarón: Mya noq alkyex or b'a'n tokx tuj Lugar Xjanxix ti'jxi xb'alun tkub' tuj tmij njaye, twitz tlamel kax, tu'ntzun mi'n tkyim; porke kb'el nyek'un wib'e tuj jun muj tib'aj tmaqsil kax.

³Noq o'kx b'a'n tokx Aarón tuj Lugar Xjanxix ok kyb'ant qe jlu tu'n: Ok ttzaj ti'n jun tal tor te chojb'il til ex jun tman ẍne'l te chojb'il patun in kub'.

⁴Aju t-xb'alun k'okel atzun qe jlu: T-ẍjo'w tuk'ix tcalsonsiy, tuk'ix k'alb'il tk'u'j ex k'alb'il twi'; kykyaqil xb'alun lu lino qe ex xjansamaj qe, che okel tq'o'n ti'j tb'ajlenxi chin.

⁵Atzun kye aj Israel kxel kyq'o'n kab'e tman chip te Aarón te chojb'il il, ex jun tman ẍne'l te chojb'il patun in kub'.

⁶Ktzajeltzun ti'n Aarón tal tor te chojb'il te til, tu'ntzun tnajset tex til ex kyil qeju ate' tuj tja.

⁷Te tib'ajxi ktzajel ti'n qeju kab'e tman chip ex che b'el tq'o'n nwitze, ttzi ja xb'alun te mojb'ab'l tib'il.

⁸Kjawil ti'n Aarón swert kyi'j kab'e tman chip lu, tu'ntzun tel tnik' ti'j alkye te Qman ex alkye tu'n t-xi tzoqpet tu'n t-xi tiqan kyil xjal.

⁹Aju tman chip kb'el suert tib'aj tu'n tok te Qman, kb'el tb'yo'n Aarón te chojb'il il.

¹⁰Atzun tman chip ma kub' tz'aq suert tib'aj tu'n t-xi tzoqpet, ktzajel ti'n Aarón ex kb'el tq'o'n twitz Qman tu'ntzun tnajset kyil xjal, ex maxitzun kxel tzoqpet, ex kxel samet tuj lugar minti' kynajb'il xjal tuj.

¹¹Te tib'ajxi jlu ktzajel ti'n Aarón tal tor te chojb'il tex til, ex k'okex tqesin tjaq' tqul, tu'ntzun tnajset tex til ex kyil qeju ate' tuj tja.

¹²Maxitzun ktzajel ti'n jun ẍla'k nojni tu'n xq'a'l otoq tzaj ti'n tib'aj altar tkub'sa'n twitz Qman, tuk'ix kab'e jot storak che'majtl, ex k'okex ti'n ti'jxi xb'alun tkub' tuj tmij njaye;

¹³ex k'okex tq'o'n storak tib'aj q'aq' tku'x tuj ẍla'k, tu'ntzun tkub' tq'o'n nwitze, atzun t-sib'el storak kmaqsilte tlamel kax k'ub'l nleye, tu'ntzun mi'n tkyim Aarón.

¹⁴Ktzajel ti'n ch'in tchk'el tal tor, kxel ttx'ito'n ch'in chik' tu'n twi' tal tq'ab' tib'aj kax tuj tumlal tjawitz q'ij. Ax ikx kxel ttx'ito'n ch'in chik' lu wuq maj ti'j tmaqsil kax.

¹⁵Te tib'ajxi jlu, kb'el tb'yo'n Aarón aju tman chip te chojb'il kyil tnam xjal, ex k'okex ti'n tchk'el ti'jxi xb'alun tkub' tuj tmij njaye; ex kxel ttx'ito'n ch'in chik' lu tib'aj tmaqsil kax, tuk'ix ti'j, ik tza'nx otoq tb'incha ti'j tchk'el tal tor.

¹⁶Iktzun tten ksaqsetel lugar xjanxix tu'n tlaj kytz'ilil aj Israel, tu'n tlaj mib'an che niman ex tu'n tlaj kyil. Ax ikx il ti'j tu'n t-saqset ja xb'alun te mojb'ab'l tib'il, aju tkub'sa'n kyxol qe xjal at nim kytz'ilil.

¹⁷Ok tokx Aarón tuj Lugar Xjanxix qanil te Dios tu'n tnajset kyil xjal, mi jun xjal b'a'n tokx ten tuj ja xb'alun te mojb'ab'l tib'il. Maxi b'a'n tokx, okxi tetz Aarón tb'ajlenxi tq'o'n chojb'il ti'j tex til, tuk'ix ti'j kyil qeju ate' tuj tja, ex kye kykyaqil tnam xjal aj Israel.

¹⁸K'eletztzun Aarón tu'n t-saqset altar tkub'sa'n nwitze. Ktzajel ti'n ch'in tchk'el tal tor ex ch'in tchk'el tman chip, ex k'okel t-su'n tkyaqil kyi'jele tkach altar,

¹⁹ex wuq maj kxel ttx'ito'n chik' tu'n twi' tal tq'ab' tib'aj altar te patb'il chojb'il. Iktzun tten ksaqsetel altar tu'n tlaj ttz'ilil kyb'inchb'en aj Israel, ex iktzun tten kxjansetel.

²⁰Oktzun tb'aj saqset Lugar Xjanxix tu'n Aarón, ex ja xb'alun te mojb'ab'l tib'il, tuk'ix altar te patb'il chojb'il, kxel tma'n tu'n ttzaj laq'b'a'n tman chip itz'x;

²¹ex che b'el tq'o'n tq'ab' Aarón tib'aj twi' tman chip, ex kjawitz tpa'n tkyaqil kyb'inchb'en aj Israel mya b'a'n, tuk'ix kypaltil ex kyil. Iktzun tten kb'el tq'o'n kyil xjal tib'aj twi' tman chip, ex aju xjal b'animaj ti'j kxel ti'n tman chip lu tuj lugar minti' kynajb'il xjal tuj.

²²Kyja'tzun tten kxel ti'n tman chip tkyaqil kyil aj Israel tuj tx'otx' minti' kynajb'il xjal tuj, ex kxel ttzoqpi'n xjal tman chip tuj lugar minti' kynajb'il xjal tuj.

²³Te tib'ajxi jlu k'okex Aarón tuj ja xb'alun te mojb'ab'l tib'il, ex k'elel ti'n t-xb'alun lino, aju otoq tz'ok tq'o'n tu'n tokx tuj Lugar Xjanxix; axtzun kyjel tq'o'n

²⁴ex k'okex chil tuj Lugar Xjan. Ex toklenxi t-xb'alun, aju tok tu'n tkyaqil maj, k'eletz tu'n t-xi tq'o'n chojb'il til ex chojb'il kyil aj Israel, tu'ntzun tnajset tex til tuk'ix kyil xjal.

²⁵Atzunju t-sebyil alumaj te chojb'il il kb'el tpatun tib'aj altar te patb'il chojb'il.

²⁶Atzunju xinaq otoq txi q'inte tman chip tu'n t-xi tzoqpet, kb'ajel ttx'jo'n ti'j t-xb'alun; ax ikx te, il ti'j tu'n tchin. Te tib'ajxitzun b'a'n tu'n tokx tuj kycampament aj Israel.

²⁷Atzunju tal tor tuk'ix tman chip otoq che'x q'ot te chojb'il il, ex otoq tz'okx tx'itet ch'in kychk'el tuj Lugar Xjanxix te najsb'il il, che elex q'it ti'jxi campament, ex che b'el patit tuk'ix kytz'umal, kychib'jal ex kytxa'.

²⁸Aju xjal kb'el patunte te, il ti'j tu'n tjatz ttx'jo'n ti'j t-xb'alun ex tu'n tchin, ex te tib'ajxi jlu b'a'n tu'n tokx tuj campament.

²⁹Lu jun ley lu te jumajx kyjel ten te kyeye: Tuj tlajin q'ij te twuqin xjaw kb'el kyyo'ne we'yaj ex mi a'l jun k'aq'nal; tza'nx kyeye, ax ikx qe stranjer xjal ate' kyxole,

³⁰ex atzun q'ij lu knajsetel kyile nwitze, ex che kyjel tene saqxix, ya minti'tl kyile.

³¹Aju q'ij lu k'okel te ojlab'l ex ma' toklen te kyeye. Tuj q'ij lu mi'n che wa'ne, ex a jlu jun ley kyjel ten kyuk'ile te jumajx.

³²Aju pal kyjel ten te nejenel kye pal te t-xel tman kb'antel tkyaqil jlu tu'n, tu'ntzun tnajset tkyaqil il. K'okel tq'o'n t-xb'alun lino aju xjansamaj,

³³ex ksaqsetel Lugar Xjanxix tu'n, tuk'ix ja xb'alun te mojb'ab'l tib'il, tuk'ix altar te patb'il chojb'il, ex kchjetel kyil kykyaqil pal ex kyil kykyaqil aj Israel tu'n.

³⁴A jlu jun ley kyjel ten te kyeye te jumajx: Jun maj kb'antel jlu tuj tkyaqil ab'q'i, tu'n tnajset kyil aj Israel, chi Dios te Moisés. Ex o b'ant tkyaqil jlu ik tza'nx otoq kyaj tma'n Qman te Moisés.