Read kumam Levítico 17 Bible Online

Levítico 17 - kumam bible

Levítico 17

¹Tzaj yolin Qman tuk'il Moisés ex tma:

²Q'manxa te Aarón ex kye tky'ajal ex kye kykyaqil aj Israel kyja': Atzun orden lu ma tzaj tma'n Qman, chikuya:

³Noq alkye jun aj Israel ma kub' b'yonte jun tor, ex qa jun tal tman ẍne'l, ex qa jun chip tuj campament ex qa ti'jxi,

⁴ex qa minti' ma tzul ti'n alumaj ttzi ja xb'alun te mojb'ab'l tib'il tu'n ttzaj tq'o'n te jun oyaj weye twitz njaye, at til ti'j chik' otoq tz'el tu'n, ex b'i'x k'elex lajet tu'ntzun mi'n ttentl kyxol t-xjalil.

⁵Aju til ley lu, tu'n mi'n tkub' kyb'yo'n aj Israel alumaj tuj kojb'il, noq o'kx ktzajel kyq'o'n te jun chojb'il weye, ex tu'n t-xi kyi'n tuk'il pal ttzi ja xb'alun te mojb'ab'l tib'il, tu'ntzun ttzaj tq'o'n weye te jun chojb'il te mojb'ab'l tib'il.

⁶Atzunte pal kxel ttx'ito'n chik' tib'aj altar tkub' nwitze, ttzi ja xb'alun te mojb'ab'l tib'il, ex kb'el tpatun t-sebyil alumaj te jun oyaj at tk'ok'jal in chin tzalaje ti'j.

⁷Ex mi'ntl txi kyq'o'n qe chojb'il kye ju'ẍ, aju o che k'ulun kywitz ex o che el tzpet kyu'n. Atzun ley lu kyjel ten kyuk'ile te jumajx tu'n tajb'en kyeye ex wiqinwiq kyjel kyma'ne kye kyk'wa'le.

⁸Ax ikx q'manxa kye kyja': Qa at jun aj Israel ex qa jun stranjer xjal najl kyxole ma txi tq'o'n jun oyaj patun in kub' ex qa noq alkyexku juntl chojb'il,

⁹ex qa mi'n ma pon ti'n ttzi ja xb'alun te mojb'ab'l tib'il tu'n ttzaj tq'o'n weye, b'i'x k'elex lajet tu'ntzun mi'n ttentl kyxol t-xjalil.

¹⁰Qa at jun aj Israel ex qa jun stranjer xjal najl kyxole ma txi kychyo'n tchk'el noq alkyexku jun alumaj, ktzajel nq'oje ti'j; kb'el tcastiw wu'ne, ex b'i'x k'elex lajet tu'ntzun mi'n ttentl kyxol t-xjalil,

¹¹ex atzun ta' kychwinqlal kykyaqil alumaj tuj kychk'el, ex o txi nq'o'ne jlu kyeye tu'n tkub' tx'itet tib'aj altar tu'n tchjet kyile, tu'ntzun tklet kychwinqlale; porke aju chik' in chjet til xjal tu'n.

¹²Kyja'tzun in xi nma'ne kye aj Israel: Mi jun kyeye ex mi jun stranjer xjal najl kyxole b'a'n t-xi tchyo'n chik'.

¹³Noq alkyexku jun aj Israel ex qa jun stranjer xjal najl kyxole ma kub' tb'yo'n jun jil ex qa jun chyu'j b'a'n kychyo'njtz, il ti'j tu'n tel kyqo'n tchk'el ex tu'n tik'x kymaqu'n tib'aj tu'n tx'otx',

¹⁴porke aju chik', atzunju in q'onte kychwinqlal kykyaqil qeju itz'qe. Kyja'tzun ma txi nma'ne kyeye tu'n mi'n t-xi kychyo'ne chik', ex atzunju in q'onte kychwinqlal kykyaqil qeju itz'qe, ex noq alkye jun ma txi chyo'nte, b'i'x k'elex lajet tu'ntzun mi'n ttentl kyxol t-xjalil.

¹⁵Noq alkye jun aj Israel ex qa jun stranjer xjal ma txi chyo'nte tchib'jal jun jil tajx otoq kyim, ex qa tu'n jun txkup te tjaq' k'ul otoq b'aj tzaqin, k'okel kyq'o'ne te tz'il, ex il ti'j tu'n tjatz ttx'jo'n ti'j t-xb'alun ex tu'n tchin, ex max k'okel te saq okxi ttzaj qlolj.

¹⁶Qatzun mi ma jatz ttx'jo'n ti'j t-xb'alun ex qa mi ma chin, axte kxel iqante til.