Read kumam Levítico 18 Bible Online

Levítico 18 - kumam bible

Levítico 18

¹Tzaj yolin Qman tuk'il Moisés ex tma:

²Q'manxa kye aj Israel kyja': Aqine Kymane ex Kydiose.

³Mi'n che'x lpe'ye kyi'j kycostumr aj Egipto, tuj tx'otx' jatum e najane nej. Mi'n che ok lpe'ye kyi'j kycostumr aj Canaán, tuj tx'otx' jatum che pol wi'ne, ex mi'n kyb'inchaye ik tza'nx kye kyley.

⁴Japunx qe nmandamyente ex qe nleye kyu'ne ex che anq'ine ik tza'nx in kyma'n. Aqine Kymane ex Kydiose.

⁵Kyb'inchame tkyaqilju in kyma'n qe nleye ex qe nmandamyente. Aju xjal kjapunel tu'n, k'anq'il. Aqine Kymane.

⁶Mi jun xinaq b'a'n tu'n tkub' tan tuk'il jun xu'j at t-xilen tuk'il. Aqine Kymane.

⁷Mi'n kub' tq'o'na tch'ixwi tmana tu'n tkub' tana tuk'il ttxu'ya. Mya b'a'n tu'n tb'inchanteya ikju, porke ttxu'ya jlu.

⁸Mi'n kub' tq'o'na tch'ixwi tmana tu'n tkub' tana tuk'il juntl t-xu'jil tmana.

⁹Mi'n kub' tana tuk'il tanb'a. Qa jun tanb'a o'kx tmana junx tuk'il ex qa noq o'kx ttxu'ya junx tuk'il, qa ax otoq tzul itz'j tuj ja ex qa ti'jxi, pero mi'n kub' tana tuk'il.

¹⁰Mi'n kub' tq'o'na tch'ixwiya tu'nx tib'a tu'n tkub' tana tuk'il jun tchmana xu'j, qa tme'jel jun tky'ajala ex qa tal jun tme'jela. Pero mi'n kub' tana tuk'il.

¹¹Mi'n kub' tana tuk'il jun tal juntl t-xu'jil tmana, porke a tmana otoq tzaj k'wa'linte te, ex tanb'a jlu. Mi'n kub' tana tuk'il.

¹²Mi'n kub' tana tuk'il tanb' tmana; porke terman tmana jlu.

¹³Mi'n kub' tana tuk'il jun xu'j terman ttxu'ya; porke terman ttxu'ya jlu.

¹⁴Mi'n kub' tq'o'na tch'ixwi terman tmana tu'n tkub' tana tuk'il t-xu'jil, porke t-xu'jil terman tmana jlu.

¹⁵Mi'n kub' tana tuk'il tlib'a, porke t-xu'jil tky'ajala jlu; kyja'tzun mi'n kub' tana tuk'il.

¹⁶Mi'n kub' tq'o'na tch'ixwi termaniya tu'n tkub' tana tuk'il t-xu'jil.

¹⁷Mi'n kub' tana tuk'il jun xu'j ex tuk'il jun tal ax xu'j, ex mi'n kub' tana tuk'il jun tal tchman xu'j lu, qa tme'jel jun tal ex qa tal jun tal xu'j lu. Aju b'inchb'en lu jumajx mya b'a'n, porke kypamili kyib' qe jlu.

¹⁸Mi'n jaw t-xu'jla'na jun terman t-xu'jila, ex mi'n kub' tana tuk'il akux itz'x t-xu'jila, tu'ntzun mi'n tkub' ten q'oj kyxol.

¹⁹Mi'n kub' tana tuk'il jun xu'j ok tul ẍwo'j ti'j.

²⁰Mi'n kub' tana tuk'il t-xu'jil jun tuk'ila, tu'ntzun mi'n ttz'ilixa tu'n jlu.

²¹Mi'n txi tq'o'na jun tk'wa'la tu'n tkub' patit te jun oyaj te Moloc aju tilb'ilal nno'k kydiosin xjal. Mi'n tb'inchaya jlu tu'ntzun mi'n kyyolin xjal mya b'a'n ti'j Nb'iye. Aqine Kymane.

²²Mi'n kub' tana tuk'il jun xinaq ik tza'n in kub' tana tuk'il xu'j, porke ik'b'ilxix jlu.

²³Mi'n kub' tana tuk'il jun alumaj, tu'ntzun mi'n ttz'ilixa. Ax ikx mya b'a'n tu'n t-xi tq'on tib' jun xu'j te jun alumaj, porke ik'b'ilxix jlu.

²⁴Mi'n b'aj kytz'ilsan kyib'e kyu'n qe jlu, porke kyu'ntzun qe jlu ma b'aj kytz'ilsan kyib' qe xjal, aqeju che elex nlajo'ne kywitze,

²⁵ex tuk'ix kytx'otx' ma tz'ilix; kyja'tzun ma kub' kycastiw wu'ne ti'j kyb'inchb'en mya b'a'n ex ma che ex nlajo'ne tuj kytx'otx'.

²⁶Atzun kyeye, aqeye aj Israel ex qe stranjer xjal najl kyxole, japunx qe nleye ex qe nmandamyente kyu'ne, ex mi'n kyb'inchaye qe b'inchb'en lu, aqeju ik'b'ilxix,

²⁷porke tkyaqil aju mya b'a'n lu o kyb'incha' qe xjal najlqetoq tuj tx'otx' nej, ex aju tx'otx' b'i'x o tz'ilix kyu'n.

²⁸Mi'n kyb'inchaye qe jlu tu'ntzun mi'n kyex nlajo'ne tuj tx'otx' lu, ik tza'nx ma che ex nlajo'ne qe xjal najlqetoq tuj nej.

²⁹Alkye jun xjal ma tb'incha noq alkyexku jun kyxol qeju mya b'a'n lu, aqeju ik'b'ilxix, b'i'x k'elex lajet tu'ntzun mi'n ttentl kyxol t-xjalil.

³⁰Kyja'tzun, japunx qe nmandamyente kyu'ne ex mi'n kyb'inchaye mya b'a'n lu, aqeju ik'b'ilxix in kyb'incha'n xjal tuj tx'otx' jatum che pole, ex mi'n b'aj kytz'ilsan kyib'e kyu'n qe jlu. Aqine Kymane ex Kydiose.