Read kumam Levítico 2 Bible Online

Levítico 2 - kumam bible

Levítico 2

¹Qa at jun ma tzaj q'inte jun oyaj te Qman ti'j twitz awal, b'a'n tu'n ttzaj ti'n aju arin mas tb'anilxix, ex kb'el tqo'n aseyt tib'aj tuk'ix storak;

²ex kxel ti'n kyuk'il qe pal aqeju tky'ajal Aarón, ex atzun jun kye kxel ti'n jun yub' arin tuk'ix aseyt, junx tuk'il tkyaqil storak, ex kb'el tpatun tib'aj altar te jun oyaj kukx tu'n ttzaj na't xjal ti'j; jun oyaj patun in kub' at tk'ok'jal in chin tzalaje ti'j.

³Ex atzunju kyjel ten ti'j oyaj, k'ajb'el te Aarón ex qe tiyjil. Aju oyaj lu xjansamajxix junx kyuk'il qe oyaj patun in che kub' te nimb'il weye.

⁴Qa ma txi kyq'o'ne jun oyaj ti'j twitz awal tzq'ajsamaj tuj jorni, kyb'inchame qe pan ti'j tb'anil arin xyoq'amaj tuk'il aseyt, ex mi'n txi kyq'o'ne t-samel tuj tu'n tjaw mal tk'u'j, ex qa aju pan xaxj minti' t-samel tuj tu'n tjaw mal tk'u'j ex su'n aseyt kyi'j.

⁵Qa ma txi kyq'o'ne kyoyaje twitz awal tzq'ajsamaj tuj sartén, kyq'onxe aju arin mas tb'anil, xyoq'amaj tuk'il aseyt ex minti' t-samel tuj tu'n tjaw mal tk'u'j;

⁶kb'el kypiẍune ex kb'el kyq'o'ne aseyt tib'aj, jun oyaj jlu ti'j twitz awal.

⁷Qa ma txi kyq'o'ne kyoyaje twitz awal tzq'ajsamaj tuj xk'o'n, kyq'onxe aju arin mas tb'anil tuk'ix aseyt tu'n t-xi' tuj.

⁸Oktzun tb'ant tten kyoyaje ktzajel kyq'o'ne weye kyi'j qe ti'xti lu, b'a'n tu'n t-xi kyq'o'ne te pal, atzunte pal kxel q'inte te max twitz altar.

⁹K'eleltzun ti'n pal ch'in ti'j oyaj lu tu'n tkub' tpatun tib'aj altar te jun oyaj kukx tu'n ttzaj na't xjal ti'j, patun in kub', at tk'ok'jal in chin tzalaje ti'j.

¹⁰Ex atzunju kyjel ten ti'j oyaj k'ajb'el te Aarón ex kye tiyjil. Aju oyaj lu xjansamaj kyxol qe oyaj in che kub' patit te nimb'il weye.

¹¹Mi'n txi kyq'o'ne t-samel tu'n tjaw mal tk'u'j tuj oyaj aju ktzajel kyq'o'ne weye ti'j twitz awal, ex mi jun wiq t-samel ex mi ta'l kab' kb'el kypatune te jun oyaj weye.

¹²B'a'n tu'n ttzaj kyq'o'ne weye aju oyaj at t-samel tuj tu'n tjaw mal tk'u'j ex qa ta'l kab', ik tza'n qe oyaj ti'j tnejel twitz awal, ex mlay kub' patit tib'aj altar ik tza'n oyaj at tk'ok'jal.

¹³B'a'n tu'n tok kyq'o'ne atz'an kyi'j kykyaqil kyoyaje twitz awal, ex mi'n tzik' tna'l kyu'ne tu'n tok atz'an ti'j kyoyaje; porke aju atz'an in ajb'en tu'n ttzaj na't aju yol o kyaj b'ant ti'j wu'ne kyuk'ile. Kyi'j kykyaqil kyoyaje b'a'n tu'n tok kyq'o'ne atz'an.

¹⁴Qa ma tzaj kyq'o'ne kyoyaje weye ti'j tnejel twitz kyawale, b'a'n tu'n ttzaj kyq'o'ne jun che'l tx'i'limaj tuj q'aq', ex pa'mx twi'.

¹⁵Kb'el kyq'o'ne aseyt tuk'ix storak tib'aj, tu'nju oyaj ti'j twitz awal jlu.

¹⁶Kb'eltzun tpatun pal ch'in twitz awal otoq b'aj pa'mx twi', tuk'ix ch'in aseyt ex tkyaqil storak, te jun oyaj kukx tu'n ttzaj na't xjal ti'j, patun in kub' te nimb'il weye.