Read kumam Levítico 20 Bible Online

Levítico 20 - kumam bible

Levítico 20

¹Tzaj yolin Qman tuk'il Moisés ex tma:

²Q'manxa kye aj Israel kyja': Qa at jun aj Israel ex qa jun stranjer xjal najl kyxole ma txi tq'o'n jun tk'wa'l tu'n tkub' patit te jun oyaj te Moloc aju tilb'ilal nno'k kydiosin xjal, il ti'j tu'n tkyim; k'okel xo't tu'n ab'j kyu'n tnam xjal.

³Ktzajel nq'oje ti'j xjal lu, ex b'i'x kymel wu'ne tu'ntzun mi'n ttentl kyxol t-xjalil, tu'nju otoq b'aj ttz'ilsa'n Njaye ex otoq tz'ok tq'o'n Nb'iye Xjan te minti' tajb'en, tu'nju tkub'len tpatun jun tk'wa'l twitz Moloc aju tilb'ilal nno'k kydiosin xjal.

⁴Qa minti' ma che q'ajt xjal ti'j jlu ex minti' otoq kub' kyq'o'n t-sentens xjal tu'n tkyim,

⁵ktzajeltzun nq'oje ti'j xjal lu ex kyi'j qeju ate' tuj tja, ex b'i'x kymel wu'ne junx kyuk'il qeju otoq che'x lpe' ti'j tu'n kyk'ulun twitz Moloc, tu'ntzun mi'n kytentl kyxol kyxjalil.

⁶Qa at jun xjal ma txi tqanin jun t-xjel kye qe xjal b'a'n che txokon kyi'j kyanmi kyimni, ex qa ma txi' kyuk'il chman, ktzajel nq'oje ti'j xjal lu ex b'i'x kymel wu'ne tu'ntzun mi'n ttentl kyxol t-xjalil.

⁷Kyxjansamxix kyib'e nwitze, ex che oke xjan, porke aqine Kymane ex Kydiose.

⁸Kynimanxe qe nleye ex japunxix kyu'ne. Aqine Kymane aju xjansalte kyeye.

⁹Alkye jun ma yolin mya b'a'n ti'j tman ex qa ti'j ttxu', kb'el t-sentens tu'n tkyim tu'nju otoq yolin mya b'a'n ti'j tman ex qa ti'j ttxu'. Ax te at til ti'j tkamik.

¹⁰Qa at jun xinaq ma tb'incha aj pajil tuk'il t-xu'jil tuk'il, kykab'il kb'el kysentens tu'n kykyim, tza'nx te xinaq ax ikx te xu'j.

¹¹Qa at jun xinaq ma kub' tan tuk'il juntl t-xu'jil tman, kb'el tq'o'n tch'ixwi tman tu'n jlu. Kyja'tzun kb'el t-sentens xinaq tu'n tkyim tuk'ix xu'j, ex ax qe at kyil ti'j kykamik.

¹²Qa at jun xinaq ma kub' tan tuk'il tlib', kykab'il kb'el kysentens tu'n kykyim, ex ax qe at kyil ti'j kykamik porke ik'b'ilxix aju otoq kyb'incha.

¹³Qa at jun xinaq ma kub' tan tuk'il juntl xinaq ik tza'nx in kub' tan tuk'il jun xu'j, kykab'il kb'el kysentens tu'n kykyim, ex ax qe at kyil ti'j kykamik porke ik'b'ilxix aju otoq kyb'incha.

¹⁴Qa at jun xinaq ma jaw xu'jlante jun xu'j ex tuk'ix ttxu' xu'j ma jaw t-xu'jla'n, tu'n jlu in kyb'incha'n jun mya b'a'n ik'b'ilxix; kyja'tzun kyoxil che b'el patit tu'ntzun mi'n tten mya b'a'n ik'b'ilxix kyxole.

¹⁵Qa at jun xinaq ma kub' tan tuk'il jun alumaj, kb'el t-sentens tu'n tkyim. Ax ikx alumaj b'i'x kb'el b'yet.

¹⁶Qa at jun xu'j ma txi tq'on tib' te jun alumaj, kykab'il che b'el b'yet; tza'nx te xu'j ax ikx te alumaj. Ax qe at kyil ti'j kykamik.

¹⁷Qa at jun xinaq ma jaw t-xu'jla'n tanb', qa o'kx kyman junx ex qa o'kx kytxu', ex qa ma kub' kymojb'an kyib', kykab'il che b'el b'yet kywitz qe kyxjalil, porke aju tu'n tjaw tmojb'an tib' jun tuk'ilx tanb', jun ch'ixb'il jlu, ex alkye ma tb'incha ikju ax te at til ti'j tkamik.

¹⁸Qa at jun xinaq ma kub' tan tuk'il jun xu'j otoq tzul ẍwo'j ti'j, kykab'il che elex lajet tu'ntzun mi'n kytentl kyxol kyxjalil, porke minti' otoq txi kyniman aju in tma'n ley tu'n mi'n tkub' tan xinaq tuk'il xu'j ok nnu'l ẍwo'j ti'j.

¹⁹Mi'n kub' tana tuk'il jun xu'j terman ttxu'ya mi tuk'il tanb' tmana, porke at t-xilena kyuk'il ex kykab'ile at kyile ti'j jlu.

²⁰Qa at jun ma kub' tan tuk'il t-xu'jil terman tman, tu'n jlu in kub' tq'o'n tch'ixwi terman tman; kykab'il at kyil ti'j jlu ex oktzun kykyim, minti'x kyk'wa'l otoq tzaj.

²¹Qa at jun ma jaw t-xu'jla'n t-xu'jil terman, tu'n jlu in kub' tq'o'n tch'ixwi terman. Ik'b'ilxix b'inchb'en lu, ex minti'x kyk'wa'l ktzajel.

²²Kynimanxe qe nleye ex qe nmandamyente; japunx tkyaqil kyu'ne tu'ntzun mi'n kyetz nlajo'ne tuj tx'otx' jatum che pol wi'ne tu'n kynajane tuj.

²³Mi'n che ok lpe'ye ti'j kycostumr xjal che elex nlajo'ne kywitze; porke o kyb'incha kykyaqil qe jlu, ex tu'ntzunju o che el wik'une.

²⁴O txi ntziyane kyeye tu'n kyoke tajwil kytx'otx'; ax qine chin xel q'onte tx'otx' lu kyeye te kyetzb'ile, aju tx'otx' lu q'inun tx'otx'xix ex tb'anilxix. Aqine Kymane ex Kydiose ma chin el pa'nte kyeye kyi'j txqantl nasyon.

²⁵Kyja'tzun, ax ikx kyeye b'a'n tu'n tel kynik'e kyi'j qe jil saq ex kyi'j qe jil tz'il, ex kyi'j qe chyu'j saq ex qe chyu'j tz'il. Mi'n b'aj kytz'ilsan kyib'e kyu'n qe jil, qe chyu'j ex qeju in xi kyjaqu'n kyk'u'j twitz tx'otx', aqeju ma che ok nq'o'ne te tz'il.

²⁶Che okxe xjan nwitze, porke aqine Kymane xjan qine, ex ma che el npa'ne kyi'j qe txqantl nasyon tu'ntzun kyoke te weye.

²⁷Qa at jun xinaq ex qa jun xu'j b'a'n txokon ti'j kyanmi kyimni, ex qa b'a'n q'ijin, il ti'j tu'n tkyim. K'okel kyxo'ne tu'n ab'j ex ax te at til ti'j tkamik.