Read kumam Levítico 22 Bible Online

Levítico 22 - kumam bible

Levítico 22

¹Tzaj yolin Qman tuk'il Moisés ex tma:

²Q'manxa te Aarón ex kye qe tky'ajal tu'n tten kykwent kyi'j qe ti'xti xjan, aju in tzaj kyq'o'n aj Israel weye, tu'ntzun mi'n tok tq'o'n nb'iye xjan te minti' tajb'en. Aqine Kymane.

³Q'manxa kye: Ik tza'nx ja'lo ax ikx tuj tq'ijlalil tzul, qa at jun tiyjil Aarón ttz'ilsan tib' ma pon laq'e' kyi'j qe ti'xti xjan aju ktzajel kyq'o'n qe aj Israel weye, b'i'x k'elel toklen te pal, tu'n mi'n tajb'en weye. Aqine Kymane.

⁴Qa at jun xinaq tiyjil Aarón yab' tu'n tx'a'k minti' q'anb'il ti'j, ex qa in jaw poj twi ttz'a'lb'il, mya b'a'n tu'n twa'n kyi'j qe ti'xti xjansamaj; max kwa'l ti'j okxi t-saqix. Ax ikx qa at jun ma tz'ok makonte jun ti'xti tz'il, aju otoq tz'ok takl t-ximlal jun kyimni ti'j, ex qa ma tz'ok tmako'n jun xjal yab' tu'n poj in jaw twi ttz'a'lb'il,

⁵ex qa ma b'aj ttz'ilsan tib' tu'nju toklen tmako'n jun jil jaqu'n in xi' tk'u'j twitz tx'otx', ex qa ma tz'ok tmako'n jun xinaq ttz'ilsan tib' tu'n noq alkyexku ttz'ilil,

⁶b'i'x ktz'ilixtel ex max k'okel te saq juntl maj okxi ttzaj qlolj; mlay wa'n kyi'j qe ti'xti xjan qa na'nxtoq tb'aj chin.

⁷Ksaqixtel max okxi tex q'ij. Te tib'ajxi b'a'n tu'n twa'n kyi'j qe ti'xti xjansamaj, ex atzun twa.

⁸Mi'n txi tchyo'n tchib'jal jun jil tajx otoq kyim, ex qa tu'n jun txkup te tjaq' k'ul otoq kub' b'yo'n, tu'ntzun mi'n ttz'ilix tu'n jlu. Aqine Kymane.

⁹Il ti'j tu'n kyjapun qe nmandamyente kyu'n pal, tu'ntzun mi'n kyb'incha'n il ex tu'n mi'n kykyim tu'nju otoq tz'ok kyq'o'n nmandamyente te minti' tajb'en, porke aqine aju Kymane ma b'aj xjansante kye.

¹⁰Mi jun xjal mya tiyjil pal jaku wa'n kyi'j qe ti'xti xjansamaj, mi ju xjal kpol b'etzalte pal ex mi ju xjal in aq'nan tuk'il; mi jun b'a'n tu'n twa'n kyi'j qe ti'xti xjansamaj.

¹¹Ex qa at jun pal ma tloq' jun tmajen tu'n pwaq, aju majen lu b'a'n tu'n twa'n kyi'j qe ti'xti xjansamaj; ax ikx qe majen ax otoq che itz'j tuj tja pal, b'a'n tu'n kywa'n ti'j wab'j lu.

¹²Ok tmoje' jun kyme'jel pal tuk'il jun xjal mya pal, minti'tl toklen tu'n twa'n kyi'j qe oyaj in xi q'ot kye pal.

¹³Ex qa ma kyaj ten txin lu te meb'a xu'j ex qa ma kub' tpa'n tib' tuk'il tchmil ex minti' tal otoq tzaj, qa ma pon meltz'aj tja tman juntl maj tjunalxte, ik tza'nx tten nej tej minti'toq tchmil, jaku wa'n ti'j wab'j in xi' tu'n tman. Atzun qe xjal mya tiyjil pal, minti' kyoklen tu'n kywa'n ti'j.

¹⁴Qatzun at jun xjal ma txi twa'n qe wab'j xjansamaj ex minti' b'i'n tu'n qa xjansamaj, kxel tq'o'n t-xel te pal, ex te tib'ajxi jlu kxel tq'o'n tjwe'yin tib'aj;

¹⁵ex mi'n txi kyq'o'n pal amb'il kye aj Israel tu'n tok kyq'o'n qe ti'xti xjansamaj te noq alkyex nik'b'eb'l, aju ktzajel kyq'o'n xjal weye,

¹⁶tu'ntzun mi'n ttzaj mya b'a'n kyib'aj tu'n tlaj kyil qa ma txi kywa'n qe ti'xti xjansamaj. Aqine aju Kymane ma b'aj xjansante kye.

¹⁷Tzaj yolin Qman tuk'il Moisés ex tma:

¹⁸Q'manxa te Aarón ex kye tky'ajal ex kye kykyaqil aj Israel kyja': Qa at jun aj Israel ex qa jun stranjer xjal najl kyxol ktzajel tq'o'n jun alumaj te oyaj patun in kub' nwitze, qa te jun oyaj ok tjapun jun yol tu'n aju otoq txi ttziyan ti'j, ex qa jun oyaj tu'n tex tgan ktzajel tq'o'n,

¹⁹b'a'n tu'n ttzaj tq'o'n jun tor ex qa jun tman ẍne'l ex qa jun tman chip minti' tpaltil, tu'ntzun tk'met wu'ne.

²⁰Mi'n tzaj kyq'o'ne jun alumaj at tpaltil, porke a jlu mlay k'met wu'ne kyeye.

²¹Noq alkye jun taj tu'n ttzaj tq'o'n weye jun chojb'il te mojb'ab'l tib'il wuk'ile, qa te jun oyaj ok tjapun jun yol tu'n aju otoq txi ttziyan, ex qa jun oyaj tu'n tex tgan, il ti'j tu'n ttzaj tq'o'n jun wakẍ ex qa jun ẍne'l minti' tpaltil, tu'ntzun tk'met wu'ne.

²²Mi'n tzaj kyq'o'ne weye jun alumaj moẍ twitz ex qa at k'ixb'len ti'j, qa kox, qa at tx'a'k ti'j ex qa sal ti'j ex qa at juntl tyab'il ttz'umal, ex mi'n txi kyq'o'ne tu'n tkub' patit te jun oyaj tib'aj n-altare.

²³Te kyoyaje tu'n kyexe kygan, b'a'n tu'n ttzaj kyq'o'ne qa jun wakẍ ex qa jun ẍne'l, ichaq ẍtij, ex qa noq otoq tzaj swek'j twitz tqan, ex mi'n tzaj kyq'o'ne te jun oyaj ok tjapun jun yol kyu'ne aju otoq txi kytziyane, ex mlay k'met jlu.

²⁴Ax ikx mi'n tzaj kyq'o'ne weye aqeju alumaj at ẍil ti'j kyb'aq' ex qa at k'ixb'len kyi'j ex qa o che el tzaqin ex qa o che el qesin. Mi'n kyb'inchaye jlu tuj kytanmiye.

²⁵Ax ikx mi'n tzaj kyi'ne qe alumaj lu te jun stranjer xjal tu'n ttzaj kyq'o'ne weye, tu'nju at kypaltil ex mlay che k'met wu'ne kyeye.

²⁶Tzaj yolin Qman tuk'il Moisés ex tma:

²⁷Ok tul itz'j jun tal wakẍ ex qa jun tal ẍne'l ex qa jun tal chip, il ti'j tu'n tkyaj ten wuq q'ij ti'j ttxu' tu'n tch'u'n; max tuj twajxaqin q'ij jaku k'met wu'ne tu'n tkub' patit te jun oyaj weye.

²⁸Mi'n kub' kyb'yo'ne jun vac ex qa jun ttxu ẍne'l tuj junx q'ij junx tuk'il tal.

²⁹Ok ttzaj kyq'o'ne jun kyoyaje te aq'b'il chjonte weye, kyb'inchame tujxix tumel tu'ntzun tk'met wu'ne,

³⁰ex b'i'x kb'ajel kychyo'ne tuj junx q'ij; mi'n kyaj kyq'o'ne ch'intl tuj juntl q'ij. Aqine Kymane.

³¹Kynimanxe qe nmandamyente ex japunx kyu'ne. Aqine Kymane.

³²Mi'n tz'ok kyq'o'ne nb'iye xjan te minti' tajb'en, noq o'kx chin okel kyq'o'ne te xjan. Aqine Kymane aju ma b'aj xjansante kyeye,

³³ex ma che etz wi'ne tuj Egipto tu'ntzun woke te Kydiose. Aqine Kymane.