Read kumam Levítico 25 Bible Online

Levítico 25 - kumam bible

Levítico 25

¹Tzaj yolin Qman tuk'il Moisés twi witz Sinaí ex tma:

²Q'manxa kye aj Israel kyja': Ok kyokxe tuj tx'otx' kxel nq'o'ne kyeye, aju tx'otx' k'ojlal junjun maj te jun nimb'il weye.

³Qaq ab'q'i che awale kyuj kykojb'ile ex qaq ab'q'i b'a'n tu'n tb'aj kypodarine qe tqan ky-uvaye ex tu'n tjaw kychmo'ne twitz,

⁴atzun tuj twuqin ab'q'i k'ojlal tx'otx' kyu'ne te jun nimb'il weye. Mi'n che awane kyuj kykojb'ile tuj ab'q'i lu, mi'n b'aj kypodarine qe tqan ky-uvaye

⁵ex mi'n jaw kychmo'ne t-xpoq'l triw tajx ktzajel ch'iy, ax ikx twitz uva mya podarimaj, tu'ntzun tojlan tx'otx' jun ab'q'i.

⁶Aju twitz awal tzul tq'o'n tx'otx' tu'nx tib' tuj ab'q'i te ojlab'l, atzunju k'ajb'el te kywaye, te kywa qe kymajene xinaq ex kymajene xu'j, te kywa qe aq'nal ex te kywa qe stranjer xjal najl kyxole,

⁷te kywa kywakẍe ex te kywa qe txkup te tjaq' k'ul ate' tuj kytx'otx'e. Tkyaqil twitz awal ktzajel tq'o'n tx'otx' tu'nx tib' k'ajb'el te kywaye.

⁸Aju wuq ab'q'i, b'a'n tu'n t-xi kyajla'ne wuq maj, tu'ntzun tjapun jun tajlal te 49 ab'q'i,

⁹ex tuj tlajin tajlal twuqin xjaw, atzunju q'ij te najsb'il il; k'okeltzun kyq'ajtza'ne tkach ẍne'l kyuj kykyaqil kytanmiye.

¹⁰Aju ab'q'i 50 k'okel kyq'o'ne te xjan, ex tujtzun ab'q'i lu k'elex tqanil tu'n kytzoqpet kykyaqil qeju najl tuj tx'otx'; atzunju ab'q'i te tzoqpib'l. Kykyaqil xjal che okel te tajwil kytx'otx' juntl maj ex che ajel meltz'aj tu'n kypon kyxol qe xjal at kyxilen kyuk'il.

¹¹Aju ab'q'i 50, atzun jun ab'q'i te tzoqpib'l, ex tuj ab'q'i lu mi'n ku'x kyawane awal, mi'n jaw kychmo'ne t-xpoq'l triw tajx ktzajel ch'iy tuj kykojb'ile ex mi'n jaw kychmo'ne twitz uva mya podarimaj,

¹²ex atzun ab'q'i lu te tzoqpib'l kyeye ex k'okel kyq'o'ne te xjan. O'kx kxel kywa'ne aju tu'nx tib' tx'otx' ktzajel tq'o'n.

¹³Tuj ab'q'i te tzoqpib'l, kykyaqile che etzale juntl maj ti'j kytx'otx'e.

¹⁴Qa at jun xjal ma tzaj tlaq'o'n ex qa ma txi tk'ayin jun piẍ tx'otx' te jun tuk'il, mi'n kub' t-sb'u'n tuk'il ti'j jlu.

¹⁵Ok ttzaj kylaq'o'ne tx'otx', kxel kychjo'ne ik tza'nx tajlal ab'q'i tb'ajlen ab'q'i te tzoqpib'l, ex ok t-xi kyk'ayine tx'otx' kye kyuk'ile, kxel kyqanine tu'n ttzaj kychjo'n ik tza'nx tajlal ab'q'i tu'n tjaw chmet twitz awal.

¹⁶Qa mas nim ab'q'i tu'n tjaw chmet twitz awal, ax mas nim twi'; ex qa nik'xi ab'q'i taj, ax ikx noq nik'xi twi', porke tza'nx tajlal ab'q'i tu'n tjaw kychmo'ne twitz awal tuj tx'otx', ikxtzun twi' kxel kyq'o'ne.

¹⁷Mi'n kub' kysb'u'ne jun kyuk'ile. Che xob'e nwitze porke aqine Kymane ex Kydiose.

¹⁸Japunx qe nleye kyu'ne, kynimanxe qe nmandamyente ex japunx kyu'ne tu'ntzun kyanq'ine tuj tzalajb'il tuj tx'otx' kxel nq'o'ne kyeye,

¹⁹ex ktzajeltzun tq'o'n tx'otx' tu'n kywa'ne ti'j okxi tnoj kyk'u'je, ex che anq'ile tuj tx'otx' tuj tzalajb'il.

²⁰Ex qa ma kymaye kyja': ¿Titzun kxel qwa'n tuj twuqin ab'q'i, qa mi'n ku'x qawa'n qawal ex qa mi'n jaw qchmo'n twitz?, qa che chiye,

²¹ktzajel nsama'ne nky'iwb'ile kyib'aje tuj tqaqin ab'q'i, ex aju twitz kyawale kjawil kychmo'ne tuj ab'q'i lu, kkanitel te ox ab'q'i.

²²Kyja'tzun che wa'le ti'j twitz awal otoq b'aj kyk'u'ne, akux nnu'l kanun tu'n kyawane ti'j ak'aj twitz awal tuj twajxaqin ab'q'i, ex kukx che wa'le tuj tb'elaji'n ab'q'i ti'j twitz awal otoq b'aj kyk'u'ne, akuxtzun nnu'l tq'ijlalil tu'n tjaw kychmo'ne twitz kyawale tuj tb'elaji'n ab'q'i.

²³Aju tx'otx' mlay txi k'ayit te jumajx porke weye tx'otx', atzun kyeye noq b'etin xjal qeye ex stranjer xjal qeye.

²⁴Kyja'tzun, noq alkyex tx'otx' ma tz'ok te kyetzb'ile, il ti'j tu'n taj kyq'o'ne kye tnejel tajwil, tu'ntzun kyk'monte juntl maj kytx'otx'.

²⁵Qa at jun kyxole ma tz'ok te meb'a ex qa ma txi tk'ayin jun piẍ ttx'otx', aju terman mas at t-xilen tuk'il, atzunju b'a'n tkyaj ko'pinte tx'otx' otoq txi tk'ayin terman te juntl xjal.

²⁶Qatzun at jun kyxjalile minti' jun terman tu'n tkyaj ko'pinte tetzb'il ex qa ma chmet twi' tu'n tu'n tkyaj tko'pin tu'nx,

²⁷kxe'ltzun tajla'n jte'xi ab'q'i t-xilen tk'ayin ex k'ajel tq'o'n te loq'ol aju tajlal pwaq jte' ab'q'i atx taj tu'n tjapun ab'q'i te tzoqpib'l, ex k'okeltzun juntl maj te tajwil tetzb'il.

²⁸Qatzun minti' ma knet pwaq tu'n tu'n tkyaj tko'pin tetzb'il, kyjeltzun ten tx'otx' lu tuj tkwent loq'ol max tuj ab'q'i te tzoqpib'l; maxitzun ktzoqpetel tetzb'il, ex aju xi k'ayinte etzb'il k'okel juntl maj te tajwil.

²⁹Qa at jun ma txi tk'ayin jun ja tuj tnam toksa'n muro ti'j, o'kx jun ab'q'i at toklen ti'j tu'n tkyaj tlaq'o'n juntl maj; o'kx jun ab'q'i at toklen ti'j tu'n tkyaj tko'pin.

³⁰Qatzun minti' ma kyaj ko'pin ja at tuj tnam toksa'n muro ti'j ok tel jun ab'q'i, kyjeltzun ten te jumajx tuj tkwent laq'olte ex tuj kykwent qe tiyjil in che ul itz'j te tib'ajxi. Mlayx tz'aj q'ot te tnejel tajwil tuj ab'q'i te tzoqpib'l.

³¹Atzun qe ja ate' tuj tnam minti' muro toksa'n kyi'j, ax kb'antel kyi'j ik tza'n in b'ant kyi'j qe kojb'il, jaku b'ant tu'n kykyaj ko'pit, ex che ajel q'ot juntl maj kye tnejel kyajwil tuj ab'q'i te tzoqpib'l.

³²Atzun kye aj Leví kukx ktel kyoklen tu'n tkyaj kyko'pin qe ja ate' kyujx kye kytanmi.

³³B'a'n tu'n tkyaj kyko'pin aj Leví kyja; ex qa mi'n, il ti'j tu'n tkyaj tkolin loq'ol ja tuj ab'q'i te tzoqpib'l, tu'n taj tq'o'n ja kye aj Leví, porke aju kyetzb'il aj Leví at kyxol aj Israel, atzunju kyja at tuj kyex kytanmi.

³⁴Qe kojb'il ate' kyi'jele kytanmi aj Leví mlay che'x k'ayit, ex atzun kyetzb'il ex kukx ktel te kye te jumajx.

³⁵Qa at jun kyxjalile ma tz'ok te meb'a ex qa minti' tza'n tten tu'n tanq'in, ex qa ma pon kyuk'ile, il ti'j tu'n t-xi kyonine, ik tza'n jun stranjer xjal ex b'etin xjal, ex ax b'a'n tu'n tkyaj ten kyuk'ile.

³⁶Mi'n tz'el kyqanine ta'l kypwaqe kxel kyq'o'ne te tch'ex, noq o'kx che xob'e twitz Dios ex kyk'mome tu'n tten kyxjalile kyuk'ile.

³⁷Mi'n tz'el kyi'ne ta'l kypwaqe kxel kyq'o'ne te tch'ex ex mi'n jax kylaq'b'a'ne twi' twa.

³⁸Aqine Kymane ex Kydiose aju etz q'inte kyeye tuj Egipto tu'n t-xi nq'o'ne tx'otx' Canaán kyeye ex tu'n woke te Kydiose.

³⁹Qa at jun kyxjalile ma tz'ok te meb'a ex qa ma tzaj tk'ayin tib' kyeye tu'nju at nim tk'as kyuk'ile, mi'n kub' kyq'o'ne aq'untl kyuwxix tib'aj, ik tza'n jun majen tk'ayin tib';

⁴⁰noq o'kx k'okel kyq'o'ne ik tza'n jun aq'nal chjo'n tq'ij ex qa ik tza'n jun b'etin xjal, ex max tuj ab'q'i te tzoqpib'l kxel tkolin tu'n taq'nan kyuk'ile.

⁴¹K'elextzun tuj kyjaye junx kyuk'il qe tk'wa'l, tu'ntzun taj juntl maj kyxol qe tiyjil ex tuj kyetzb'il qeju at kyxilen tuk'il.

⁴²Porke weye nmajen qe aj Israel; wu'ne e je'tz wi'ne tuj Egipto ex mlay b'ant tu'n kyxi k'ayit te majen;

⁴³mi'n che b'aj kyyajla'ne; noq o'kx che xob'e nwitze.

⁴⁴Qa kyajb'ile tu'n tten kymajene xinaq ex qa kymajene xu'j, b'a'n tu'n ttzaj kylaq'o'ne kyuj qe nasyon ate' kyi'jeleye.

⁴⁵Ax ikx b'a'n tu'n ttzaj kylaq'o'ne te kymajene qe stranjer xjal ax najl kyxole, ex qe kyk'wa'l che ul itz'j akux ate' tuj kytx'otx'e. Atzun qe b'a'n tu'n ttzaj kylaq'o'ne tu'n kyok te kyeye,

⁴⁶ex tu'n tkyaj kyq'o'ne kye kyk'wa'le ok kykyime, ex kukx che ajb'el te kye. Atzun kyeye, aqeye aj Israel, mi jun kyeye kkawil tib'aj jun terman, ex mi'n che kub' kyyajla'ne kyermaniye junx kyiyjile kyuk'il.

⁴⁷Qa at jun stranjer xjal najl tuj kytx'otx'e ma tz'ok te q'inun, ex qa at jun kyxjalile tvesin tib' tuk'il ju xjal lu ma tz'ok te meb'a, ex qa ma txi tk'ayin tib' te xjal lu ex qa te juntl xjal at t-xilen tuk'il,

⁴⁸at oklenj te tu'n tchjet tzoqpib'l te t-xilenxi tk'ayin tib'. Jaku ko'pj tu'n jun terman;

⁴⁹qa tu'n jun terman tman, qa tu'n jun tky'ajal terman tman ex qa tu'n juntl xjal at t-xilen tuk'il. Ax ikx jaku ko'pj tu'nx tib', qa ma knet pwaq tu'n.

⁵⁰Ex kjawil ti'n jun tajlal tuk'il xjal xi laq'onte te, atxix tuj ab'q'i tej t-xi tk'ayin tib' okxi tpon tuj ab'q'i te tzoqpib'l; aju twi' kxel q'it, ik tza'nx kyajlal ab'q'i ex aju tyemp otoq tz'aq'nan, kjawil q'it tajlal ik tza'nx chojb'il te jun aq'nal.

⁵¹Qa nim ab'q'i atx taj, k'ajel tq'o'n twi' ik tza'nx t-xilen tk'ayin tib', tu'ntzun tkyaj tko'pin tib' tza'nx tajlal ab'q'i atx taj;

⁵²qatzun nik'xi taj tu'n tul kanun ab'q'i te tzoqpib'l, kxel tq'o'n te ko'pb'ilte jun tajlal ik tza'nx tajlal ab'q'i atx taj.

⁵³K'okel kyq'o'ne ik tza'n jun aq'nal tuj ab'q'iyin; mi'n kyaq'e amb'il tu'n kyb'aj yajla'n.

⁵⁴Qatzun minti' tumel tu'n tetz tko'pin tib' tu'nx ex qa tu'n juntl, maxitzun ktzoqpetel tuj ab'q'i te tzoqpib'l junx kyuk'il qe tk'wa'l,

⁵⁵porke weye nmajen qe aj Israel, wexixe nmajen qe; wu'ne e je'tz wi'ne tuj Egipto. Aqine Kymane ex Kydiose.