Read kumam Levítico 3 Bible Online

Levítico 3 - kumam bible

Levítico 3

¹Qa at jun ma tz'etz q'inte jun vac ex qa jun tor kyxol qe twakẍ tu'n ttzaj tq'o'n weye te jun chojb'il te mojb'ab'l tib'il wuk'ile, aju alumaj ktzajel tq'o'n il ti'j minti' tpaltil.

²Aju xjal kxel q'onte oyaj kb'el tq'o'n tq'ab' tib'aj twi alumaj, ex k'okex tqesin tjaq' tqul twitz ja xb'alun te mojb'ab'l tib'il. Atzun kye pal, aqeju tiyjil Aarón, k'okel kytx'ito'n chik' ti'jele tk'u'j altar.

³Ex aju sebo toksa'n kyi'j qe tuj tk'u'j alumaj ktzajel tq'o'n xjal te jun chojb'il te mojb'ab'l tib'il wuk'ile, te jun oyaj patun in kub',

⁴kyuk'ix qe tchenaq' tuk'ix sebo toksa'n kyi'j, tuk'ix sebo toksa'n ttzal ti'j, tuk'ix sebo tok ti'j ttx'otx'; a jlu k'elel ti'n junx kyuk'il qe tchenaq'.

⁵Atzun kye pal aqeju tiyjil Aarón, kb'el kypatun tkyaqil jlu tib'aj altar, tib'aj chojb'il tkub' tib'aj si' in k'ant tu'n q'aq' te jun oyaj patun in kub', at tk'ok'jal in chin tzalaje ti'j.

⁶Qatzun ẍne'l toyaj xjal ktzajel tq'o'n te jun chojb'il te mojb'ab'l tib'il wuk'ile, b'a'n tu'n ttzaj tq'o'n jun tman ẍne'l ex qa jun ttxu', ex il ti'j minti' tpaltil.

⁷Qatzun tal ẍne'l toyaj ktzajel tq'o'n ok tpon ti'n nwitze,

⁸kb'el tq'o'n tq'ab' tib'aj twi' tal ẍne'l, ex te tib'ajxi k'okex tqesin tjaq' tqul twitz ja xb'alun te mojb'ab'l tib'il. Atzun kye pal aqeju tiyjil Aarón, k'okel kytx'ito'n chik' ti'jele tk'u'j altar.

⁹Ax ikx kxel tq'o'n xjal t-sebyil alumaj, tuk'ix tje' ktzajelx tqesin max t-xe tq'uqb'il, tuk'ix sebo toksa'n kyi'j qe tuj tk'u'j, te jun chojb'il te mojb'ab'l tib'il wuk'ile, ex te jun oyaj patun in kub',

¹⁰kyuk'ix qe tchenaq' tuk'ix sebo toksa'n kyi'j, tuk'ix sebo toksa'n ttzal ti'j, tuk'ix sebo tok ti'j ttx'otx'; a jlu k'elel ti'n junx kyuk'il qe tchenaq'.

¹¹Atzun kye pal kb'el kypatun tkyaqil jlu tib'aj altar, ik tza'n wab'j patun in kub' te jun oyaj te nimb'il weye.

¹²Qatzun chip toyaj xjal ktzajel tq'o'n, ok tpon ti'n nwitze

¹³kb'el tq'o'n tq'ab' tib'aj twi chip, ex te tib'ajxi k'okex tqesin tjaq' tqul twitz ja xb'alun te mojb'ab'l tib'il; atzun kye pal aqeju tiyjil Aarón, k'okel kytx'ito'n chik' ti'jele tk'u'j altar.

¹⁴Kxel tq'o'n xjal tkyaqil sebo toksa'n kyi'j qe tuj tk'u'j chip te jun oyaj patun in kub' te nimb'il weye,

¹⁵kyuk'ix qe tchenaq' tuk'ix sebo toksa'n kyi'j, tuk'ix sebo tok ttzal ti'j, tuk'ix sebo tok ti'j ttx'otx'; a jlu k'elel ti'n junx kyuk'il qe tchenaq'.

¹⁶Atzunte pal kb'el tpatun tkyaqil jlu tib'aj altar, ik tza'n wab'j patun in kub' te jun oyaj at tk'ok'jal in chin tzalaje ti'j. Porke weye tkyaqil kysebyil alumaj, il ti'j tu'n ttzaj q'ot weye.

¹⁷Kyjel ten ju ley lu kyuk'ile te jumajx, tu'n tajb'en te kyeye ex kye kyiyjile noq alkyex lugar che tele: Mi'n txi kychyo'ne sebo ex mi chik'.