Read kumam Levítico 4 Bible Online

Levítico 4 - kumam bible

Levítico 4

¹Tzaj yolin Qman tuk'il Moisés ex tma:

²Q'manxa jlu kye aj Israel: Qa at jun xjal ma b'inchan il, ex qa ma tzik' kyib'aj qe nmandamyente tu'nju minti' b'a'n tu'n qa mya b'a'n, ex qa otoq tb'incha jun ti'xti q'ma'maj tu'n mi'n tb'inchante, atzun jlu kb'antel tu'n:

³Qa a tnejel pal ma b'inchan il, ex tu'n jlu in tzaj ti'n mya b'a'n kyib'aj tnam xjal, il ti'j tu'n ttzaj tq'o'n weye jun tal tor minti' tpaltil, te chojb'il il otoq tb'incha.

⁴Ktzajel ti'n nwitze ttzi ja xb'alun te mojb'ab'l tib'il; atzun kb'el tq'o'n tq'ab' tib'aj twi' tal tor, ex k'okex tqesin tjaq' tqul alumaj nwitze.

⁵Te tib'ajxi, axju tnejel pal kxel q'inte ch'in tchk'el tal tor tu'n tpon ti'n tuj ja xb'alun te mojb'ab'l tib'il;

⁶atzun kb'elex tmu'n twi' tal tq'ab' tuj chik' ex kb'el ttx'ito'n wuq maj nwitze tumlal xb'alun tkub' tuj tmij njaye.

⁷Ax ikx k'okel t-su'n ch'in chik' kyi'j qe tkach altar te patb'il storak at tk'ok'jal, aju tkub'sa'n nwitze tuj ja xb'alun te mojb'ab'l tib'il, ex tkyaqiltzunju chik' kyjel ten kb'elex tqo'n t-xe tqan altar te patb'il chojb'il, aju tkub'sa'n twitz ja xb'alun te mojb'ab'l tib'il.

⁸K'elel ti'n ti'j tal tor te chojb'il il tkyaqil sebo toksa'n kyi'j qe tuj tk'u'j,

⁹kyuk'ix qe kab'e tchenaq', tuk'ix sebo toksa'n ttzal ti'j ex sebo toksa'n ti'j ttx'otx'; a jlu k'elel ti'n junx kyuk'il qe tchenaq',

¹⁰ik tza'nx nne'l q'it ti'j tal tor, in xi q'ot te oyaj te mojb'ab'l tib'il wuk'ile. Ex ax te pal kb'el patunte tib'aj altar te patb'il chojb'il.

¹¹Atzunju ttz'umal tal tor tuk'ix tkyaqil tchib'jal, tuk'ix twi', kyuk'ix qe tqan, kyuk'ix qe tuj tk'u'j ex ttxa',

¹²ex qa tkyaqilku t-ximlal tal tor, k'elex ti'n tuj jun lugar saq ti'jxi campament, tuj lugar jatum nne'x qet tza'j, ex tib'ajtzun tza'j lu, kb'el tq'o'n si' ex k'okel tq'o'n tq'aq'al.

¹³Qatzun kykyaqil aj Israel ma che b'inchan il ex qa ma che ik' kyib'aj qe nmandamyente, tu'nju minti' b'a'n kyu'n qa mya b'a'n aju otoq kyb'incha, ex qa ma kyb'incha jun ti'xti q'ma'maj tu'n mi'n kyb'inchante, ex qa mi jun ma tz'el tnik' ti'j qa otoq che b'inchan il; maske ikju, at kyil ti'j.

¹⁴Oktzun tel kynik' ti'j il otoq kyb'incha, il ti'j tu'n t-xi kyq'o'n jun tal tor te chojb'il kyil. Kxel kyi'n twitz ja xb'alun te mojb'ab'l tib'il,

¹⁵atzun qe kytijil xjal te tnam kb'el kyq'o'n kyq'ab' tib'aj twi' tal tor nwitze, ex axtzun k'okex kyqesin tjaq' tqul alumaj.

¹⁶Atzunte tnejel pal kxel ti'n ch'in tchk'el tal tor tuj ja xb'alun te mojb'ab'l tib'il,

¹⁷kb'elex tmu'n tal tq'ab' tuj chik' ex kxel ttx'ito'n wuq maj nwitze tumlal xb'alun tkub' tuj tmij njaye.

¹⁸Ax ikx k'okel t-su'n ch'in chik' kyi'j qe tkach altar tkub'sa'n nwitze tuj ja xb'alun te mojb'ab'l tib'il. Ex tkyaqil chik' kyjel ten, kb'elex tqo'n t-xe tqan altar te patb'il chojb'il, aju tkub'sa'n twitz ja xb'alun te mojb'ab'l tib'il.

¹⁹Ax ikx k'elel ti'n tkyaqil t-sebyil tal tor, ex kb'el tpatun tib'aj altar.

²⁰Ax kb'antel ti'j tal tor lu ik tza'n in b'ant ti'j tal tor in xi q'ot te chojb'il il; kyja'tzun tten kchjetel kyil xjal tu'n pal, ex knajsetel kyil.

²¹K'elex ti'n tal tor ti'jxi campament ex kb'el tpatun, ikx ktemb'il tu'n ik tza'nx otoq tb'incha ti'j tnejel tal tor, porke chojb'il kyil tnam xjal alumaj lu.

²²Qatzun jun nejenel ma b'inchan il, ex qa ma tzik' kyib'aj qe nmandamyente, aqine Tdios, tu'nju minti' b'a'n tu'n qa mya b'a'n, ex otoq tb'incha jun ti'xti q'ma'maj tu'n mi'n tb'inchante, at til ti'j jlu.

²³Oktzun tel tnik' ti'j aju il otoq tb'incha, il ti'j tu'n t-xi ti'n jun tman chip minti' tpaltil te chojb'il til.

²⁴Kb'el tq'o'n tq'ab' tib'aj twi' tman chip, ex k'okex tqesin tjaq' tqul alumaj nwitze tuj lugar jatum in che kub' b'yo'n qe alumaj patun in che kub', porke chojb'il il jlu.

²⁵Atzunte pal ktzajel ti'n tu'n twi' tal tq'ab' ch'in tchk'el alumaj otoq txi q'ot te chojb'il il, ex k'okel t-su'n kyi'j qe tkach altar te patb'il chojb'il, ex tkyaqilju chik' kjel ten kb'elex tqo'n t-xe tqan altar,

²⁶ex kb'el tpatun pal tkyaqil t-sebyil alumaj tib'aj altar, ik tza'n in tenb'a t-sebyil alumaj in xi q'ot te chojb'il te mojb'ab'l tib'il wuk'ile. Kyja'tzun kchjetel til nejenel tu'n pal, ex knajseteltzun til.

²⁷Qatzun noq elajx jun xjal ma b'inchan il, ex qa ma tzik' kyib'aj qe nmandamyente tu'nju minti' b'a'n tu'n qa otoq tb'incha jun ti'xti q'ma'maj tu'n mi'n tb'inchante, ax at til ti'j.

²⁸Oktzun tel tnik' ti'j il otoq tb'incha, il ti'j tu'n ttzaj ti'n jun ttxu chip minti' tpaltil te chojb'il il otoq tb'incha.

²⁹Kb'eltzun tq'o'n tq'ab' tib'aj twi' ttxu chip, aju kxel tq'o'n te chojb'il til, ex k'okex tqesin tjaq' tqul alumaj tuj lugar jatum in kub' patit chojb'il.

³⁰Atzunte pal ktzajel ti'n ch'in chik' tu'n twi' tal tq'ab' ex k'okel t-su'n kyi'j qe tkach altar te patb'il chojb'il, ex tkyaqil chik' kjel ten kb'elex tqo'n t-xe tqan altar.

³¹Ax ikx k'elel ti'n tkyaqil t-sebyil, ik tza'nx nne'l q'it ti'j alumaj in xi q'ot te chojb'il te mojb'ab'l tib'il wuk'ile, ex kb'el tpatun tib'aj altar te jun oyaj at tk'ok'jal in chin tzalaje ti'j. Kyja'tzun kchjetel til xjal tu'n pal, ex knajseteltzun til.

³²Qatzun jun ẍne'l ma tzaj ti'n xjal te chojb'il til, il ti'j tu'n ttzaj ti'n jun ttxu ẍne'l minti' tpaltil.

³³Kb'el tq'o'n tq'ab' tib'aj twi' ttxu ẍne'l, ex k'okex tqesin tjaq' tqul alumaj te chojb'il il, tuj lugar jatum in che kub' b'yo'n qe alumaj patun in che kub'.

³⁴Atzunte pal ktzajel ti'n tu'n twi' tal tq'ab' ch'in tchk'el alumaj otoq txi q'ot te chojb'il il, ex k'okel t-su'n kyi'j qe tkach altar te patb'il chojb'il, ex tkyaqil chik' kjel ten kb'elex tqo'n t-xe' tqan altar,

³⁵ex k'elel ti'n tkyaqil t-sebyil, ik tza'nx nne'l q'it ti'j tal tman ẍne'l in xi q'ot te jun chojb'il te mojb'ab'l tib'il wuk'ile, ex kb'el tpatun t-sebyil tib'aj altar, junx kyuk'il qe oyaj patun in che kub' nwitze. Kyja'tzun kchjetel til xjal tu'n pal, ex knajseteltzun til.