Read kumam Levítico 6 Bible Online

Levítico 6 - kumam bible

Levítico 6

¹Tzaj yolin Qman tuk'il Moisés ex tma kyja':

²Qa at jun xjal ma b'inchan il nwitze tu'nju otoq kub' t-sb'u'n jun tuk'il ti'j jun ti'xti otoq kyaj oqxenan te, ex qa ma tz'el telq'a'n jun ti'xti te, ex qa otoq tz'el ti'n jun ti'xti lajwers te,

³ex qa ma tz'ok noj ti'j jun ti'xti otoq kyaj tz'aq ex qa ma kub' tewan, ex qa ma txi tma'n tzqan Dios ex noq tten tu'n, ex qa ma b'ant juntl mya b'a'n tu'n, aju in b'ant kyu'n xjal,

⁴at til ti'j jlu. Kyja'tzun il ti'j tu'n taj tq'o'n aju otoq tz'el telq'a'n, ex qa aju otoq tz'el ti'n lajwers, ex qa aju otoq kyaj oqxenan te, ex qa aju ti'xti otoq tz'ok noj ti'j,

⁵ex qa aju otoq txi tma'n tzqan Dios ti'j ex noq tten tu'n. Ok t-xi tq'o'n chojb'il til, il ti'j tu'n taj tq'o'n tkyaqil te tajwil, ex mya o'kx jlu; ax ikx kxel tq'o'n tjwe'yin tib'aj twi ti'xti otoq tz'el telq'a'n.

⁶Aju chojb'il ktzajel tq'o'n weye; kyxol qe t-ẍne'l k'eletz ti'n jun tman ẍne'l minti' tpaltil, ex aya k'okel malonte te jte' twi', ex kxel ti'n tuk'il pal te jun chojb'il ti'j til.

⁷Kchjeteltzun til xjal tu'n pal nwitze, noq alkyexku il otoq tb'incha, ex knajseteltzun til.

⁸Tzaj yolin Qman tuk'il Moisés ex tma:

⁹Q'manxa te Aarón ex kye tky'ajal aju ley kyi'j qe chojb'il patun in che kub': Aju alumaj kxel q'ot te chojb'il, tuj enter qonik'an il ti'j tu'n tkyaj kyq'o'n tib'aj xq'a'l tkub'sa'n tib'aj altar, okxi tjawil q'ij, ex il ti'j tu'n mi'n tyupj q'aq'.

¹⁰Atzunte pal k'okel tq'o'n t-xb'alun tuk'ix tcalsonsiy b'animaj ti'j noq' lino; ex ktzajel ti'n ttza'jil alumaj, aju otoq kub' tz'e'y tib'aj altar, ex kb'el tq'o'n ttxlaj altar.

¹¹Te tib'ajxi k'elel tch'expu'n t-xb'alun ex k'elex ti'n tza'j tuj jun lugar saq ti'jxi campament.

¹²Mi'nx ku'x yupit q'aq' in k'ant tib'aj altar. Tkyaqil prim kb'el tq'o'n pal si' tib'aj, ex kb'el tq'o'n pal alumaj patun in kub' tib'aj q'aq', ax ikx kb'el tpatun tib'aj altar kysebyil qe chojb'il te mojb'ab'l tib'il wuk'ile.

¹³Kukx kk'antel q'aq' tib'aj altar. Mi'nx ku'x yupit.

¹⁴Atzun qe ley lu kyi'j qe oyaj ti'j twitz awal: Aqe pal che tzajel oyinte nwitze, twitz altar.

¹⁵Ex atzun jun kye ktzajel ti'n jun yub' arin tuk'ix ch'in aseyt, junx tuk'il tkyaqil storak otoq pon q'i'n te oyaj, ex kb'el tpatun tib'aj altar, te jun oyaj kukx tu'n ttzaj na't xjal ti'j, jun oyaj patun in kub' at tk'ok'jal in chin tzalaje ti'j.

¹⁶Ex atzunju kjel ten ti'j oyaj lu kxel twa'n Aarón kyuk'ix qe tky'ajal, ex mi'n txi kyq'o'n t-samel tuj tu'n tjaw mal tk'u'j. Atzun che wa'l ti'j tuj jun lugar xjansamaj, ttxa'n tpe'n ja xb'alun te mojb'ab'l tib'il.

¹⁷Mi'n b'aj kytzq'ajsa'n tuk'il t-samel tuj tu'n tjaw mal tk'u'j. O txi nq'o'ne ch'in kye kyi'j oyaj patun in che kub' in tzaj q'o'n weye. Ex a jlu xjanxix ik tza'nx qe chojb'il ti'j il ex ti'j kypaltil xjal.

¹⁸Kykyaqil qe xinaq tiyjil Aarón che ul itz'j te tib'ajxi, at kyoklen tu'n kywa'n ti'j oyaj in kub' patit te weye, ex a jlu jun ley kukx ktel te jumajx. Noq alkyexku jun ti'xti ma tz'ok takl kyi'j qe oyaj lu, b'i'x kxjansetel.

¹⁹Tzaj yolin Qman tuk'il Moisés ex tma:

²⁰Atzun qe toyaj Aarón jlu, ex qe kyoyaj tiyjil, aju tu'n ttzaj kyq'o'n weye ok kyxjanset tu'n kyok te pal: Kab'e libr arin mas tb'anil, te oyaj ti'j twitz awal; mij kxel kyq'o'n te prim ex mijtl te qale; aju oyaj lu tkyaqil q'ij kxel kyq'o'n.

²¹Il ti'j tu'n tb'aj kyb'incha'n oyaj lu tuj jun sartén, otoq b'aj xyoq'it wen tuk'il aseyt, ex ktzajeltzun kyq'o'n paẍu'majtl, te jun oyaj at tk'ok'jal in chin tzalaje ti'j.

²²Iktzun ktemb'il tu'nju tnejel pal tiyjil Aarón, aju kxjansetel tu'n tok te t-xel Aarón; a jlu jun ley wu'ne kukx ktel, ex aju oyaj lu b'i'x kb'el patit te jumajx.

²³Tkyaqil kyoyaj qe pal ti'j twitz awal b'i'x che b'el patit te jumajx; mi jun b'a'n tu'n t-xi wa'nte te.

²⁴Tzaj yolin Qman tuk'il Moisés ex tma:

²⁵Q'manxa te Aarón ex kye qe tky'ajal aju ley kyi'j qe chojb'il il: Il ti'j tu'n tkub' kyb'yo'n alumaj kxel q'ot te chojb'il nwitze tujx lugar jatum in che kub' b'yet qe alumaj patun in che kub'; aju chojb'il lu xjanxix te.

²⁶Aju pal kxel q'onte chojb'il il, b'a'n tu'n tchyo'n ti'j, ex il ti'j tu'n t-xi tchyo'n tuj jun lugar xjan ttxa'n tpe'n ja xb'alun te mojb'al tib'il.

²⁷Noq alkyexku jun ti'xti k'okel takl ti'j tchib'jal alumaj lu, b'i'x kxjansetel, ex qa ma tz'ok tx'itj ch'in chik' ti'j jun xb'alun, b'a'n tu'n tjatz tx'jo'n ti'j tuj jun lugar xjan.

²⁸Qa tx'otx' ttx'otx'il k'il jatum kjawix txket ta'l chib'j te oyaj lu, il ti'j b'i'x kb'el pa't k'il; qatzun q'an k'uxb'il ttx'otx'il k'il, o'kxtzun tu'n tb'aj jaqut twitz ex tu'n ttx'jet tu'n a'.

²⁹Aju chojb'il il xjanxix te. O'kx qe pal kyuk'ix qe kyky'ajal b'a'n tu'n kychyo'n ti'j.

³⁰Ex mlay txi kychyo'n jun alumaj in xi q'it tchk'el tuj ja xb'alun te mojb'ab'l tib'il tu'n tnajset il. Aju chojb'il lu, il ti'j tu'n tokx patit tuj q'aq'.