Read kumam Levítico 7 Bible Online

Levítico 7 - kumam bible

Levítico 7

¹Qe chojb'il ti'j kypaltil xjal xjanxix qe, ex atzun qe ley kyi'j jlu:

²Aju alumaj kxel q'ot te chojb'il ti'j kypaltil xjal, il ti'j tu'n tkub' b'yet tujx lugar jatum in che kub' b'yet alumaj patun in che kub', ex aju tchk'el k'okel tx'itet ti'jele tk'u'j altar.

³Il ti'j tu'n t-xi q'ot tkyaqil t-sebyil alumaj: Aju sebo tok ti'j tje' tuk'ix ju toksa'n kyi'j qe tuj tk'u'j,

⁴kyuk'ix kykab'il tchenaq' tuk'ix sebo toksa'n kyi'j, tuk'ix sebo toksa'n ttzal ti'j, tuk'ix sebo toksa'n ti'j ttx'otx'; a jlu junx k'elel q'it kyuk'il qe tchenaq'.

⁵Atzunte pal kb'el patunte jlu tib'aj altar te jun oyaj patun in kub' te weye. Jun chojb'il jlu ti'j kypaltil xjal.

⁶Aju chojb'il lu xjanxix te, o'kx kye pal b'a'n tu'n kychyo'n ti'j, ex kxel kychyo'n tuj jun lugar xjan porke ate jlu xjanxix te.

⁷Aju chojb'il ti'j kypaltil xjal junx ta' tuk'il chojb'il ti'j il, ex aju ley junx ta' kyi'j kykab'il: aju pal kxel q'onte chojb'il til xjal, b'a'n tu'n tchyo'n ti'j.

⁸Ax ikx aju ttz'umal alumaj, te pal kxel q'ot, aju kb'el patunte alumaj otoq pon ti'n jun xjal te chojb'il patun in kub'.

⁹Ax ikx kykyaqil oyaj ti'j twitz awal tzq'ajsamaj tuj jorni, ex tkyaqilju tzq'ajsamaj tuj k'il ex qa tzq'ajsamaj tuj sartén, tex pal kxel q'ot, aju otoq txi oyinte oyaj.

¹⁰Ax ikx ktemb'il kykyaqil oyaj ti'j twitz awal mya tzq'ajsamaj, tza'nxix ju xyoq'amaj tuk'il aseyt ex ju tzqijsamaj, k'ajb'el kye kykyaqil tiyjil Aarón, ex parej kxel q'ot kye.

¹¹Atzun qe ley lu kyi'j qe chojb'il te mojb'ab'l tib'il ktzajel kyq'o'ne weye:

¹²Qa ma tzaj kyq'o'n xjal jun chojb'il te aq'b'il chjonte, ax ikx b'a'n tu'n ttzaj kyq'o'n pan xyoq'amaj tuk'il aseyt, tuk'ix jun wiq tal pan xaxj toksa'n aseyt ti'j, tuk'ix ju pan at aseyt tuj b'inchamaj ti'j arin tb'anil, ex aqeju pan lu mi'n txi kyq'o'n t-samel kyuj tu'n tjaw mal kyk'u'j.

¹³Ax ikx, ok kyxi kyq'o'n chojb'il te aq'b'il chjonte ex te mojb'ab'l tib'il, tuk'ix pan at t-samel tuj tu'n tjaw mal tk'u'j kxel kyq'o'n.

¹⁴Kyi'j kykyaqil oyaj lu k'elel q'it jun pan ti'j junjun txkaj, ex ktzajel toyin weye te jun oyaj; ex te tib'ajxi, tex pal k'ajb'el aju kb'el tx'itonte tchk'el alumaj te chojb'il te mojb'ab'l tib'il.

¹⁵Aju tchib'jal alumaj kxel q'ot te aq'b'il chjonte ex te mojb'ab'l tib'il, b'i'x tu'n tb'aj kychyo'n tujx q'ij ok t-xi oyit; minti' jun piẍ tu'n tkyaj ten te juntl q'ij.

¹⁶Ex qatzun te chojb'il ti'j jun yol otoq japun tu'n xjal aju alumaj kxel q'ot, ex qa jun oyaj noq tu'n tex xjal tgan, b'a'n tu'n t-xi kychyo'n tujx q'ij ok t-xi oyit, atzunju kjel ten b'a'n tu'n t-xi kychyo'n tuj juntl q'ij;

¹⁷ex qatzun atx tchib'jal alumaj kyjel ten tuj toxin q'ij, il ti'j tu'n tkub' patit tkyaqil tuj q'aq'.

¹⁸Qatzun at jun ma txi chyo'nte tchib'jal chojb'il te mojb'ab'l tib'il tuj toxin q'ij, aju chojb'il lu mlay k'met wu'ne ex mlay tz'ajb'en te xjal, porke aju chib'j lu otoq tz'ok te tz'il. Alkye ma txi chyo'nte jlu at til ti'j.

¹⁹Tkyaqil chib'j ma tz'ok takl ti'j jun ti'xti tz'il, mlay txi chyo't, noq o'kx tu'n tkub' patit. Kykyaqil xjal kysaqsan kyib', b'a'n tu'n kychyo'n ti'j chib'j te chojb'il lu.

²⁰Qa at jun xjal ttz'ilsan tib' ma txi chyo'nte chib'j otoq txi q'o'n te chojb'il te mojb'ab'l tib'il, aju otoq tzaj q'o'n weye, b'i'x k'elex lajet tu'ntzun mi'n ttentl kyxol t-xjalil.

²¹Qa at jun xjal ma tz'ok makonte jun ti'xti tz'il, qa t-ximlal jun xjal ttz'ilsan tib' ex qa te jun alumaj tz'il, ex qa noq alkyex juntl ttz'ilil puro ik'b'il, ex qa ma txi tchyo'n chib'j otoq txi q'ot te chojb'il te mojb'ab'l tib'il aju otoq tzaj q'o'n weye, b'i'x k'elex lajet xjal lu tu'ntzun mi'n ttentl kyxol t-xjalil.

²²Tzaj yolin Qman tuk'il Moisés ex tma:

²³Q'manxa kye aj Israel tu'n mi'n t-xi kychyo'n t-sebyil jun tor, mi t-sebyil jun tal ẍne'l ex mi t-sebyil jun chip.

²⁴Aju kysebyil alumaj noq elajx in che kyim ex qa b'yo'n in che kub' kyu'n qe txkup te tjaq' k'ul, b'a'n tu'n tajb'en kyu'n, noq alkyexku tajb'en, ex mi'n txi kychyo'n.

²⁵Noq alkye jun xjal ma txi chyo'nte t-sebyil alumaj aju ktzajel q'o'n weye te jun oyaj patun in kub', b'i'x k'elex lajet tu'ntzun mi'n ttentl kyxol t-xjalil.

²⁶Noq jaxja che najale, mi'n txi kychyo'ne kychk'el qe chyu'j ex mi kychk'el alumaj.

²⁷Aju xjal kxel chyo'nte kychk'el noq alkyex alumaj, b'i'x k'elex lajet tu'ntzun mi'n ttentl kyxol t-xjalil.

²⁸Tzaj yolin Qman tuk'il Moisés ex tma:

²⁹Q'manxa kye aj Israel jlu: Qa at jun xjal ktzajel q'onte jun chojb'il te mojb'ab'l tib'il wuk'ile, il ti'j tu'n ttzaj tq'o'n ch'in weye.

³⁰Tu'nx tq'ab' ktzajel tq'o'n weye aju oyaj patun in kub'. Ktzajel tq'o'n sebo tuk'ix ttzi t-xu'k alumaj. Aju ttzi t-xu'k ktzajel tq'o'n weye, kxel tyukun nwitze; a jlu jun oyaj yukun ktzajel q'ot nwitze.

³¹Atzunte pal kb'el patunte sebo tib'aj altar, atzun ttzi t-xu'k alumaj, a Aarón kxel chyo'nte te kyuk'ix qe tky'ajal.

³²Aju kxel q'ot te pal ti'j chojb'il te mojb'ab'l tib'il, a aju tkux alumaj tuj tb'anq'ab' kxel q'ot te jun oyaj te.

³³Aju tkux alumaj kxel q'ot te chojb'il te mojb'ab'l tib'il, te pal k'okel aju kxel q'onte t-sebyil tuk'ix chik',

³⁴porke kyi'j qe chojb'il te mojb'ab'l tib'il in tzaj kyq'o'n aj Israel weye, o tz'el npa'ne aju ttzi t-xu'k, aju in xi yukun nwitze, ex aju tkux, aju in tzaj kyoyin weye, ex o txi nq'o'ne te Aarón ex kye qe tky'ajal tu'n kyk'monte ti'j kyoyaj aj Israel. Aju ley lu te jumajx tu'n tten.

³⁵Kyi'j qe oyaj in che kub' patit te chojb'il weye, atzun jlu te Aarón k'okel ex kye qe tky'ajal, atxix tuj q'ij tej kyxjanset wu'ne tu'n kyajb'en te pal te weye,

³⁶ex o txi nma'ne kye aj Israel tu'n t-xi kyq'o'n jlu, atxix tuj q'ij tej kyb'aj xjansa'n qe pal, ex a jlu jun ley kukx ktel te jumajx.

³⁷Atzun qe ley lu kyi'j qe chojb'il patun in che kub', kyi'j qe oyaj ti'j twitz awal, kyi'j qe chojb'il il ex qe chojb'il ti'j kypaltil xjal, kyi'j qe oyaj te xjansab'l ex kyi'j qe chojb'il te mojb'ab'l tib'il.

³⁸Aqeju ley lu tu'n Qman tzaj tma'n te Moisés twi witz Sinaí, tej ttzaj tma'n tu'n t-xi kyq'o'n aj Israel kyoyaj te, tuj lugar tzqij tx'otx' Sinaí.