Read kumam Jeremías 10 Bible Online

Jeremías 10 - kumam bible

Jeremías 10

¹Kyb'intze aqeye aj Israel aju yol in tma'n Qman kyeye:

²Chi kyja': Mi'n tz'el kykano'ne kyi'j txqantl nasyon, ex mi'n che jaw sek'paje kyi'j qe techal at twitz kya'j, ik tza'n in b'ant kyu'n txqantl nasyon.

³Aju kyokslab'l qe xjal lu minti' tajb'en. In jaw kytx'emin jun tze' tjaq' chk'ul ex in b'aj xpe'lin tu'n tz'qab' tu'n jun calpinter,

⁴nno'k kylo'tzin saq pwaq ex q'an pwaq ti'j, in b'aj kykyuwsa'n tu'n clavo ex tu'n martiy tu'ntzun mi tik' tz'aq.

⁵Aqeju tilb'ilal kydios xjal lu ik kyten ik tza'n poẍ in xi kyq'a'kj xjal tuj tqan sandiy, mib'an che yolin, ex il ti'j tu'n kyxi iqet porke mib'an che b'et. Mi'n che xob'e kywitz qe tilb'ilal lu, porke minti' kyipumal tu'n kyb'inchante jun mya b'a'n ex qa jun b'a'n kyi'je.

⁶Aya Nman, minti' juntl ik tza'n teya ma'xix toklena, aju tb'iya ma'xix toklen ex nimxix tipumal.

⁷¿Atpe jun mya il ti'j tu'n t-xob' twitza, aya rey kye kykyaqil nasyon? Il ti'j tu'n tten tchiylala kye kykyaqil xjal, ex kyxol kykyaqil xjal at kynab'l kyuj kykyaqil kawb'il tuj tkyaqil twitz tx'otx', minti' juntl ik tza'n teya.

⁸Kykyaqil xjal lu minti' kynab'l, minti' ch'in in pon tuj kyximb'etz, minti' ch'in xnaq'tzb'il in tzaj q'o'n kye tu'n jun piẍ tze'.

⁹Tuj tnam Tarsis in tzaj q'i'n saq pwaq tx'ino'maj, ex tuj tnam Ufaz in tzaj q'an pwaq. Ti'jtzun jlu in che b'aj b'incha'n qe tilb'ilal kyu'n qe xjal b'a'n che aq'nan ti'j q'an pwaq ex saq pwaq; nno'k q'o'n kyxb'alun ẍq'ilin ke'yin, tuk'ix juntl wiq xb'alun ẍjulin ke'yin tb'anilxix wen. Tkyaqil jlu in b'aj b'incha'n kyu'n qe xjal at kynab'l tu'n kyb'inchante.

¹⁰Atzunte Qman axix tok Dioste, ate Dios itz' ex ate Rey te jumajx; ok in tzaj tq'oj, b'i'x in tzaj lu'lun tx'otx' tu'n, ex aju tq'oj mlay tzik'x kyu'n qe nasyon.

¹¹Q'manxa kye xjal kyja': Che b'el naj twitz tx'otx' aqeju dios mya kyu'n o b'ant kya'j ex tx'otx', mi jun kyjel ten tuj tkyaqil twitz tx'otx'.

¹²Tu'n tipumal Qman o b'ant tx'otx'; tu'n tnab'l kub' tq'uqb'a'n, ex tu'n tojtzqib'l xi tlik'pu'n kya'j.

¹³Ok tq'ajt Dios in tzaj julin a' twitz kya'j, ex in tzaj ti'n muj ttxa'npun twitz tx'otx' tu'n tjapun twitz kya'j, in tzaj qoptz'aj tqan q'ankyoq tu'n tuj tmijil tqan jb'al, ex nne'tz ti'n kyq'iq' jatum k'u'n tu'n.

¹⁴Kykyaqil xjal minti' kynab'l ex minti' nne'l kynik' ti'j. Ktzajel kych'ixwi qeju in che kub' b'inchante tilb'ilal, tu'nju puro sb'ul qe tilb'ilal ex mya itz' qe.

¹⁵Noqx gan qe ex minti' kyajb'en; ok tpon tq'ijlalil tu'n ttzaj jwisi tu'n Qman, che najel.

¹⁶Mya ik tten aju Tdios Jacob, aju b'inchante tkyaqil aju at. Aku jaw sk'onte kye aj Israel te jun tetzb'il, ex atzun tb'i jlu: Qman aju Tajaw Tkyaqil.

¹⁷Aqeye aj Jerusalén, kychmo'n b'aje qe ti'xti at kyeye tu'ntzun kyexe, porke txolin kyi'je kyu'n aj q'oj.

¹⁸Porke chi Qman kyja': Ja'lo che elex nlajo'ne qe xjal najlqe tuj tnam lu tu'n kypon najchaq, ex che okel nq'o'ne tuj yajb'il kye okxi tpon ta'w kyi'j.

¹⁹Che chi aj Jerusalén in kyma'n: Ay b'ek'b'il qwitz, ma qo naj. Minti' q'anb'il ti'j ẍil tok qi'j. Atzun qcastiw jlu il ti'j tu'n tik'x qu'n.

²⁰Ma kub' xitj qtanmi ik tza'n in kub' xitj jun ja lon, ex kykyaqil ky'jaj k'alob'l te ma che b'aj tzaqj. Ya mi a'l qe k'wa'lb'aj ate'toq tuj, ma che b'aj naj, mi a'l jun b'a'n tjaw b'inchante juntl maj ja lon, ex mi a'l jun b'a'n t-xi lik'punte juntl maj aju lon in ajb'en te xmuj.

²¹Qe nejenel kye tnam xjal lu minti' kynab'l, minti' in che jyon ti'j Qman, kyja'tzun mya b'a'n ma tz'ela te kye, ex kykyaqil xjal at tuj kykwent ma che el sputj.

²²Kyb'intze tqanil lu: Tzul jun tq'ajq'ajel kyuwxix wen kyu'n xjal tuj tx'otx' tuj tb'anq'ab' q'ij, ex aqeju tnam ate' tuj Judá che kyjel ten kyu'n te minti' xjal kyuj, o'kx qe xo'j che anq'il kyuj.

²³Nman, b'a'n wu'ne, mya ax te xjal tajaw tchwinqlal, ex mlay tz'el tnik' xjal ti'j alkye b'e b'a'n tu'n tb'et tuj.

²⁴Qo tkawin kub'a tuj cheb'a ex mya tu'n nim tq'oja, porke b'i'x jaku qo naje tu'na ikju.

²⁵Chituntz tq'oja kyib'aj qe nasyon minti' in xi kyniman qa aya Dios, ex kyib'aj tnam xjal minti' in che kub'san twitza, porke ma che b'aj naj qe tiyjil Jacob kyu'n, b'i'x ma che naj kykyaqil kyu'n, ex tkyaqil kytx'otx' ma b'aj naj kyu'n.