Read kumam Jeremías 15 Bible Online

Jeremías 15 - kumam bible

Jeremías 15

¹Chi Qman tma weye: Maske che kub'san Moisés ex Samuel nwitze, pero mlayx tzaj tz'e'y nk'u'je kyi'j qe xjal lu. Q'manxa kye tu'n kyel laq'e' nwitze ex e kyxi'.

²Qa ma tzaj kyqanin teya tza'n tu'n kyxi', q'manxa nyole lu kye: Aqeju b'anin kyi'j tu'n kykyim, il ti'j tu'n kykyim, aqeju b'anin kyi'j tu'n kykyim tuj q'oj, il ti'j tuj q'oj tu'n kykyim, aqeju b'anin kyi'j tu'n kykyim tu'n we'yaj, il ti'j tu'n we'yaj che kymel, ex aqeju b'anin kyi'j tu'n kyxi q'i'n najchaq, il ti'j che xel q'i'n najchaq.

³Aqine Dios in chin q'mante jlu: Kxel nsama'ne kyaje txkaj castiw kyib'aj: Che b'el b'yo'n tuj q'oj, che xel jawo'n kyu'n tx'yan, che xel chyo'n kyu'n k'utz ex che b'ajel tzaqin kyu'n txkup.

⁴Ktzajel t-xob'il kyi'j kykyaqil nasyon twitz tx'otx' ti'j ju kb'antel wu'ne kyi'j, tu'n tlaj mya b'a'n ma tb'incha Manasés tuj Jerusalén, aju rey te Judá, aju tky'ajal Ezequías.

⁵¿Alkye ktzajel q'aq'an tk'u'j kyi'je, aqeye aj Jerusalén? ¿Alkye kb'isal kyi'je? ¿Alkye jun ktzajel tqanin kyi'je qa b'a'n ate'ye?

⁶Ma tz'el kypa'n kyib'e wi'je ex noq ttzal kyi'je ma tz'ajtz kyq'o'ne nwitze; tu'ntzun jlu ma chin ok tzoqpaje kyi'je tu'n kynaje wu'ne, porke ma b'aj npasense tu'n tq'aq'an nk'u'je kyi'je. Aqine Dios in chin q'mante jlu.

⁷Ma che b'aj nsputune qe xjal najl tuj Jerusalén ik tza'n ttxa triw, ex ma che ex wi'ne kyuj qe tnam tuj tx'otx' lu; ma che kyaj nq'one qe xjal etzan wu'ne minti' kyk'wa'l, ex ma che naj wu'ne porke minti' ma kyaj kykolin tu'n kyb'inchante mya b'a'n.

⁸Mas nim meb'a xu'j ma che kyaj nq'o'ne kyxol ik tza'n ttxa tz'a'n at ttzi mar. Mer te chilkuq'ij tzaj kamik wu'ne kyib'aj qe txuyb'aj ex qe kyal ku'xun; noq minab'en tzaj b'is kyib'aj wu'ne, tuk'ix xob'ajil.

⁹Ma b'aj tipun txuyb'aj at wuq tal, ya minti'tl in jatz t-xew; in ch'ixwi ex b'i'x ma naj tnab'l; aju t-spik'umal q'ij ma meltz'aj te qlolj. Alkye qeju ma che kyaj anq'in, kxel nma'ne tu'n kykub' b'yo'n kyu'n aj q'oj kyi'j. Aqine Dios in chin q'mante jlu.

¹⁰Ay b'ek'b'il nwitze, aya ntxu'ye in ul talina noq tu'n ntene tuj q'oj kyuk'il kykyaqil xjal. Mi jun ma tz'el nch'exo'ne pwaq te, ex mi jun ma tzaj tqanin tch'ex weye, ex kykyaqil in che qanin tu'n ttzaj mya b'a'n wib'aje.

¹¹O tma Qman kyja': Ax tok kkletela wu'ne tu'n ttena b'a'n. Ax tok, wu'ne che ul aj q'oj ti'ja tu'n kykub'san twitza tuj tq'ijlalil ok tul k'ixb'isab'l ex b'is.

¹²¿Alkye jun jaku toqj tb'anil k'uxb'il tu'n ex q'an k'uxb'il in tzaj tuj tx'otx' tuj tb'anq'ab' q'ij?

¹³Aqeye aj Israel, kxel nq'o'ne kyq'inumab'le ex kypwaqe kye aj q'oj kyi'je, tu'n t-xi kyi'n noq kukx tu'n tlaj tkyaqil il ma kyb'inchaye tuj tkyaqil kytx'otx'e.

¹⁴Che okel nq'o'ne te kymajen qe aj q'oj kyi'je tuj jun tx'otx' minti' ojtzqi'n kyu'ne, ex nimxix nq'oje ma tzaj kyi'je, mer ik tza'n q'aq' b'i'x che b'ajel tz'e'ye tu'n, chi Dios.

¹⁵Nman Dios, tkyaqil b'a'n tu'na, chin tna'ntza ex tzaja onil weye. Q'o'nka t-xel kyi'j qeju in che jyon wi'je tu'n nkub'e kyu'n. Mi'n ten tpasensa kyi'j ex mi'n chinx ttzoqpi'na tu'n nkyime kyu'n. B'a'n tu'na qa tu'n tlaja in chin ok yaso'ne kyu'n.

¹⁶Tej ttzaj yolina weye, kyaj wawa'ne tyola tuj wanmiye, nim o chin tzalaje kyi'j ex e ok te jun tzalajb'il tuj wanmiye, porke etzan qine tu'na, aya Nman Dios Tajaw Tkyaqil.

¹⁷Minti' ma chin tene junx kyuk'il qeju in che achin, ex atxix tej woke tuj tkwenta njunalxe in chin b'ete, ex nim ma tzaj nq'oje tu'n tlaj kyil xjal.

¹⁸¿Tiqu'n minti'x in b'aj ta'w k'ixk'oj wi'je? ¿Tiqu'n minti' q'anb'il ti'j k'ixb'isab'l weye ex minti'x in q'anit tu'n q'anb'il? ¿Maj ik k'okela te weye ik tza'n jun xoch nna'j tzqij a' tuj? Chi Jeremías.

¹⁹In tzajtzun tzaq'we'ne tu'n Qman ex tma: Qa ma tz'ajtz meltz'aja wuk'ile, jakutzun nk'ama juntl maj ex jaku tz'ajb'entla te weye. Qa mi'n ma yolina ti'j yol noqx gan ex qa o'kx ma yolina ti'j yol at tajb'en, tu'n jlu aya k-yolil te nxele, porke aqeju xjal lu il ti'j tu'n kyajtz meltz'aj tuk'ila, ex mya aya tu'n taj meltz'aj kyuk'il.

²⁰Ik k'okela wu'ne kye xjal lu ik tza'n jun muro q'an k'uxb'il tok ti'j jun tnam ex kyuw tu'n tkub' ti'j. Che q'ojel ti'ja, ex mlay kub' ti'ja kyu'n, porke aqine chin tel tuk'ila te kolol ti'ja.

²¹Kletela wu'ne tuj kyq'ab' qe xjal mya b'a'n, ex kletela wu'ne tuj kyq'ab' xjal tx'u'j kywi'. Aqine Dios in chin q'mante jlu.