Read kumam Jeremías 16 Bible Online

Jeremías 16 - kumam bible

Jeremías 16

¹Tzaj yolin Qman wuk'ile ex tma kyja':

²Mi'n txi tjyo'n t-xu'jila ex mi'n tzaj tk'wa'la tuj tx'otx' lu,

³ex kxel nma'ne teya alkye kb'ajel kyi'j qe k'wa'l che ul itz'j tuj tx'otx' lu, ex alkye kb'ajel kyi'j kytxu' ex kyman.

⁴Che kymel tu'n yab'il xob'ajilxix ex mi jun k-oq'el kyi'j ex mi jun kb'elex maqunte kye; kukx che kyjel pale' twitz tx'otx' ik tza'n kytxa' alumaj. Che b'el b'yo'n tu'n spad ex che kymel tu'n we'yaj, kxel chyo'n kyximlal kyu'n qe jil in che lipan twitz kya'j ex qe txkup te tjaq' k'ul.

⁵Ax ikx tzaj tma'n Qman weye: Mi'n tz'okxa tuj jun ja jatum in che b'isun xjal ti'j jun kyimni, mi'n oq'a kyuk'il ex mi'n txi tq'uqb'a'na kyk'u'j, porke ma tz'el nlaq'b'a'ne nxtalb'ile, nk'ujlalile ex tq'aq'b'il nk'u'je kyi'j qe xjal lu. Aqine Dios in chin q'mante jlu.

⁶Che kymel qe tij xjal ex qe k'wa'l tuj tx'otx' lu, mi jun kb'elex maqunte kye, mi jun k-oq'el kyi'j, mi jun kb'ajel tqesin t-ximlal ex mi jun k'elel tk'o'ẍin ti'j twi' tu'n tlaj tb'is kyi'j.

⁷Mi jun kxel q'inte wab'j mi k'ab'j kye qeju at kyxilen tuk'il qtzan kyimni tu'n tq'uqb'anjtz kyk'u'j, maske a qtzan kyman ex qa qtzan kytxu' otoq kyim.

⁸Ax ikx mi'n tz'okxa tuj jun ja jatum nno'k jun nintz wa'n, mi'n kub' qe'ya wa'l ex k'al kyuk'il.

⁹Porke aqine Dios, aju Tajaw Tkyaqil ex Kydios aj Israel, kxel nma'ne jlu: Che b'el naj qe b'itz te ninq'ij wu'ne tuj tnam lu, ex b'itz te tzalajb'il ex qe b'itz te mejeb'le'n; a jlu kb'antel wu'ne itz'x qeye, ex axqeye che ke'yilte.

¹⁰Ok t-xi tma'na tqanil lu kye tnam xjal, tzul kyqanin teya: ¿Tiqu'n ma tzaj tma'n Qman tu'n ttzaj mya b'a'n matijxix lu qib'aje? ¿Alkyetzun mya b'a'n ma qb'inchaye? ¿Alkye il o qb'inchaye twitz Qman aju Qdios? Che chilo teya.

¹¹Atzun teya kxel ttzaq'we'na: Chi Qman: Tu'nju in kyaj koline kyu'n qtzan kyxe'chele, e ok lpe' kyi'j qe tilb'ilal, e k'ulun kywitz ex e ajb'en kye, atzun weye in kyaj koline kyu'n ex minti' japun nleye kyu'n.

¹²Atzun kyeye masxix ma tzik' kyb'inchb'ene mya b'a'n kywitz qtzan kyxe'chele, ex teyle junjun kyeye ma tz'ok lpe' ti'j ju mya b'a'n in tma'n tanmi ex minti' in chinx kynimane.

¹³Kyja'tzun che elex nlajo'ne tuj tx'otx' lu, ex che xel nlajo'ne tuj jun tnam minti' ojtzqi'n kyu'ne ex mi kyu'n qtzan kyxe'chele; atzun che ajb'ele q'ijl ex qonik'an kye txqantl dios ex mlayx tzaj q'aq'an nk'u'je kyi'je.

¹⁴Aqine Dios in chin q'mante jlu: Tzul tq'ijlalil tu'n mi'n kymatl kyja': Kxel qtziyan jun yol axix tok twitz Qman aju etz q'inte kye aj Israel tuj Egipto, che chiwt,

¹⁵noq o'kx kxel kyma'n kyja': Kxel qtziyan jun yol axix tok twitz Qman aju etz q'inte kye aj Israel tuj tx'otx' tuj tb'anq'ab' q'ij, ex kyuj kykyaqil txqantl tnam jatum otoq che b'aj t-sputun, che chilo. Che ajetz meltz'aj wu'ne tu'n kyul tuj kytx'otx' aju xi nq'o'ne kye qtzan kyxe'chel ojtxi.

¹⁶Aqine Dios in chin q'mante jlu: Che xel nsama'ne nim xjal tu'ntzun kytzyet aj Israel kyu'n ik tza'n in che tzyet kyiẍ. Ax ikx che xel nsama'ne nim xjal tu'ntzun kytzyet aj Israel kyu'n ik tza'n in che tzyet jil kyu'n kamb'al, ex che tzyetel kyu'n kywi' kykyaqil nmaq witz ex kywi' kykyaqil tal witz, ax ikxpe tuj tpaxil pik jatum kyewan kyib'.

¹⁷Porke in wile tkyaqil kyb'inchb'en; minti' jun in kyaj ten tuj ewaj nwitze, ax ikx ju kyil mlayx b'ant txi kyewan nwitze.

¹⁸Kb'el nq'o'ne kycastiw ik tza'nx kyb'inchb'en mya b'a'n ex ik tza'nx kyil, porke ma b'aj kytz'ilsa'n twitz ntx'otx'e kyu'n qe tilb'ilal kydios kyimni qe, ex ma kyb'incha nimku mya b'a'n ik'un wu'ne tuj tkyaqil tx'otx' etzan wu'ne.

¹⁹Aya Nman, aya q'ol wipune ex aya klol weye, ti'ja nno'k nklon wib'e tuj tq'ijlalil xob'ajil; max ttxa'npun tx'otx' che tzajel qe nasyon tu'n kyul tuk'ila ex ok kyma teya kyja': Minti' kyajb'en qe dios o che k'ulun qtzan qxe'chele kywitz ex minti' kyipun, noq o'kx sb'ul qe.

²⁰¿Jakupe b'ant kydios xjal kyu'nx? Jaku, ex mya ax tok Dios qe, chi Jeremías.

²¹Kyja'tzun, ja'lo kxel nyek'une wipumale kye ex k'eleltzun kynik' ti'j qa aqine Dios.