Read kumam Jeremías 17 Bible Online

Jeremías 17 - kumam bible

Jeremías 17

¹Aqeye aj Judá, tz'ib'amaj kyile twitz kyanmiye ex kyi'j qe kycach ky-altare tu'n tz'qab' k'uxb'il ttx'otx'il ex tu'n jun tal ab'j kyuwxix wen diamante tb'i.

²Qe kyk'wa'le in tzaj kyna'n qe ky-altare ex qe tze' in che k'ulune kywitz, aqeju junx kykub' kyuk'il qe tze' nimxix kyxaq kywi' qe witz ma' kyjaw,

³ex kywi' qe tal witz kyuj kojb'il. Tu'n tlaj kyile ok nb'incha'ye tu'n t-xi kyelq'a'n xjal kyq'inumab'le ex tu'n tel kyetzan qe tal witz in che ajb'en kyu'ne tu'n kyk'ulune kywitz tilb'ilal tuj tkyaqil kytanmiye.

⁴K'elel q'i'n tx'otx' kyeye, aju xi nq'o'ne te kyetzb'ile, ex che okele te kymajen qe aj q'oj kyi'je tuj tx'otx' minti' ojtzqi'n kyu'ne, porke ma tzaj nim ntx'u'jile kyu'ne, ik tza'n jun q'aq' in julin wen ex mlay yupj.

⁵Chi Qman kyja': Tzajxwit mya b'a'n tib'aj ju xjal nno'k qe' tk'u'j ti'j juntl xjal, ex nno'k ten qanil onb'il te, ex nne'l tpa'n tib' wi'je.

⁶Ik k'okel ik tza'n jun wi' tal tze' tuj tzqij tx'otx' minti' in pon kanun jb'al ti'j, in ch'iy tuj tzqij tx'otx' at atz'an tuj jatum mi a'l jun xjal najl.

⁷Ex ky'iwla'n te xjal q'uql tk'u'j wi'je ex o'kx q'uql tk'u'j wi'je.

⁸Ik k'okel ik tza'n jun wi' tze' awa'n ttzi nima, ponin tlok' max ttzi a', minti' in tna'n ok in tzaj ta'w kyaq ex puro cha'x ktel t-xaq tkyaqil maj. Qa minti' ma tzaj jb'al, minti' in b'aj tk'u'j ex minti' in xi tkolin tu'n ttzaj tq'o'n twitz.

⁹Puro sb'ul kyanmi xjal twitz tkyaqil ti'xti ex jumajx mya b'a'n. ¿Alkye jun jaku tz'el tnik' ti'j?.

¹⁰Aqine Dios in b'aj nke'yine tuj kyanmi xjal ex in b'aj nxpich'une tuj kyximb'etz tu'n t-xi nq'o'ne chojb'il teyle junjun ik tza'nx tb'inchb'en ex ik tza'nx taq'unb'en, chi Qman.

¹¹Aju xjal in knet tq'inumab'l mya tuj tumel, ik tten ik tza'n jun tzchin nno'kx paqe' kyib'aj jos mya te; tuj tmij tab'q'iyil kb'el naj tq'inumab'l ex te mankb'il k'okel te jun xjal minti' tnab'l.

¹²Aju tja Dios at qxol, atzun tq'uqb'il tb'anilxix ok q'o'n te ma' toklen atxix t-xe tnejel.

¹³Nman, aya oyb'il kye aj Israel, ktzajel nim kych'ixwi kykyaqil qeju ma kyaj kolina kyu'n. Kykyaqil qeju ma tz'el kypa'n kyib' ti'ja che b'el naj ik tza'n jun b'iyb'aj tz'ib'an tuj quq, tu'nju tkyajlen kolina kyu'n, aya twi a' itz'.

¹⁴Chin tq'anin oka Nman ex chin b'antele; chin tkloma Nman ex chin kletele, porke o'kx aya in jaw nnimsa'ne tb'iya.

¹⁵In tzaj kyma'n xjal weye kyja': ¿Ti ma b'aj ti'j tyol Qman? ¿Jat ma japun? E tjapun b'i'x ja'lo.

¹⁶Maske ik kyyol, pero minti' ma txi nqanine teya tu'n ttzaj t-sama'na castiw kyib'aj ex minti' in wajb'e'ne tu'n ttzaj k'ixb'isab'l kyib'aj. B'a'n tu'na alkye o txi nma'ne kye.

¹⁷Mi'n tz'oka te xob'tzal weye Nman, porke aya kolol weye ok ttzaj mya b'a'n.

¹⁸E tkub' kych'ixwi qe aj q'oj wi'je ex mya weye nch'ixwi tu'n tkub'. Aqe e kyjaw sek'paj ex mya a qine; e ttzaj mya b'a'n kyib'aj, ex q'ontza yajb'il kyuwxix kyi'j.

¹⁹Tzaj tma'n Qman weye kyja': Txi'ya ex we'kuya ttzi tlamel tnam Jerusalén jatum in che okx ex in che etz qe rey kye aj Judá; ax ikx kb'antel tu'na kytzi' txqantl tlamel tnam.

²⁰Q'manxa kye xjal kyja': Aqeye aj Judá, kyuk'ix qe kyreye ex kykyaqile najl qeye tuj Jerusalén, aqeye in che okxi ttzi tlamel, kyb'intze tyol Qman:

²¹Chi Qman kyja': Ten kykwente ti'j tu'n tjapun q'ij te ojlab'l kyu'ne, mi'n tzaj kyi'ne iqtz ex mi'n tz'oktz kyq'o'ne tuj tnam Jerusalén tuj q'ij te ojlab'l.

²²Ax ikx mi'n tz'etz kyi'ne mi jun iqtz tuj kyjaye tuj q'ij te ojlab'l ex mi tu'n tok kymako'ne jun aq'untl, kypa'mile q'ij te ojlab'l tu'n kyajb'ene weye, ik tza'n xi nma'ne kye qtzan kyxe'chele ojtxi.

²³Atzun kye minti' inx kyb'i'n ex minti' inx kyniman, noq o'kx kub' kykyuwsa'n kyanmi ex minti' xi kyniman nkawb'ile.

²⁴Ex qa axix tok ma chinx kynimane, qa mi'n ma tzul kyi'ne iqtz ttzi tlamel tnam tuj q'ij te ojlab'l, qa ma tz'el kypa'ne q'ij lu tu'n kyajb'ene o'kx weye, ex qa mi'n tz'ok kymako'ne mi jun aq'untl tuj q'ij lu,

²⁵ex kukx che oketz qe rey kytzi tlamel tnam lu. Aqeju in che kub' qe' tuj tq'uqb'il David che oketz kyuj carwaj ex kyjax kyib'aj chej, kyuk'in kyib' kyuk'il qe nejenel, kyuk'ix qe xjal aj Judá ex qe xjal najl tuj Jerusalén ex kukx che tel xjal tuj tnam Jerusalén.

²⁶Che ul qe xjal najl kyuj qe tnam ate' tuj Judá, kyuk'ix qeju ate' ti'jele tnam Jerusalén, qeju najl tuj kytx'otx' tiyjil Benjamín, qeju najl tuj chq'ajlaj t-xe witz, qeju najl tuj tiwitz tx'otx' ex qeju najl tuj tx'otx' Néguev. Ktzajel kyi'n kyoyaj tu'n tul tuj tja Dios, ex atzun qe jlu; qe alumaj patun in che kub' ex qe txqantl chojb'il, qe oyaj ti'j twitz awal, storak ex qe oyaj te aq'b'il chjonte.

²⁷Qatzun minti' ma txi kynimane nleye tu'n tel kypa'ne ju q'ij te ojlab'l, tu'n kyajb'ene o'kx weye ex tu'n mi'n tokx kyq'o'ne iqtz tuj Jerusalén tuj q'ij te ojlab'l, tu'n jlu k'okel nq'o'ne kyq'aq'al tlamel tnam, che b'ajel tz'ey qe tja rey tu'n, ex aju q'aq' lu mi a'l jun jaku yupj tu'n.