Read kumam Jeremías 19 Bible Online

Jeremías 19 - kumam bible

Jeremías 19

¹Chi Qman weye: Txi'ya laq'ol jun ẍoq' xkab' tx'otx' ttx'otx'il, ex che tuk'inxa tuk'ila junjun kytijil xjal te tnam ex junjun kytijil pal,

²texa tuj tnam tu'n tpona tuj chq'ajlaj Ben-hinom tb'i, tkub' tena twitz tlamel tnam jatum in che ex xo'n ttx'aqan k'il, ex atzun q'manxa qe yol kxel nma'ne teya.

³Q'manxa kyja': Aqeye rey kye aj Judá ex aqeye aj Jerusalén, kyb'intze tyol Qman aju Tajaw Tkyaqil ex Kydios aj Israel: Ktzajel nsama'ne jun nintz yajb'il tib'aj lugar lu ex kykyaqil qeju che b'il ti'j tqanil lu, b'i'x k'elel twinqil kyẍkyin tu'n.

⁴Porke ma tz'el kypa'n kyib' aj Israel wi'je, ma tz'ajb'en lugar lu kyu'n tu'n kyk'ulun kywitz tilb'ilal nno'k kydiosin txqantl nasyon, ex ma kub' kypatun storak kywitz junxitl dios minti' ojtzqi'n kyu'n, mi kyu'n qe kyxe'chel ex mi kyu'n qe rey kye aj Judá. Ax ikx ma che kub' kyb'yo'n nim xjal minti' kyil tuj lugar lu.

⁵Ax ikx ma jaw kyb'incha'n qe altar tu'n tkub' kypatun qe kyk'wa'l tib'aj te jun chojb'il te Baal, ex baqa o txi nma'ne tu'n tb'ant jlu kyu'n. Minti' ma kub' nximane tu'n tb'ant ikju.

⁶Kyja'tzun tzul tq'ijlalil mya ax Tofet tb'i lugar lu k'okel ex mya ax Ben-hinom, noq o'kx Chq'ajlaj te B'iyb'il k'okel tb'i. Aqine Dios in chin q'mante jlu.

⁷Tuj lugar lu kb'ajel ntzpet-sa'ne kyximb'etz aj Judá ex aj Jerusalén. Ok nb'incha'ye tu'n kykub' tz'aq tuj kyq'ab' qeju in che jyon tumel tu'n kynaj, ex tu'n kykub' b'yo'n tu'n spad kyu'n aj q'oj kyi'j, tu'ntzun tajb'en ju kyximlal te kychi' k'utz ex te kychi' txkup.

⁸K'okel nq'o'ne tnam lu te jun xob'ajil ex che xmayil xjal ti'j; kykyaqil qeju che ik'el b'et tuj che jawil lab'in ti'j ex che okel ten xmayil ti'j tu'nju otoq kub' xitj.

⁹Ok nb'incha'ye tu'n t-xi kychyo'n xjal qe tal kyk'wa'l, ex kxel kychyo'n qe kyuk'il tu'n tlaj minti' kywa, tu'nju kytxolb'an kyib' aj q'oj ti'jele tnam, aqeju in che jyon tumel kyi'j tu'n kynaj kyu'n, chikuya kye, chi Qman.

¹⁰Tb'ajlenxi tma'na jlu, pa'n kub'tzuna aju ẍoq' kywitzx qe xjal uk'in tu'na,

¹¹ex q'manxa kye: Chi Qman aju Tajaw Tkyaqil: Kyja'tzun che telb'a qe xjal wu'ne tuj tnam lu ex tuj nasyon lu, ik tza'n ma tenb'a aju ẍoq' ma kub' pax ex mlay b'ant tu'n tb'aj b'inchet juntl maj. Che b'elex kymaqu'n qe kyimni tzalu tuj Tofet tu'n tlaj minti' txqantl lugar jatum tu'n kyku'x maqut.

¹²Atzun jlu kb'antel wu'ne ti'j tnam lu ex kyi'j qeju najl tuj. K'okel nq'o'ne tnam lu ik tza'n lugar Tofet. Aqine Dios in chin q'mante jlu.

¹³Qe ja tuj Jerusalén che okel nq'o'ne te tz'il, kyuk'ix qe kyja qe rey kye aj Judá, ex qe twi ja jatum in kub' kypatun storak kywitz che'w, twitz q'ij ex twitz xjaw, ex jatum in kub' kyqo'n ta'l twitz uva te jun oyaj te junxitl dios. Ik k'okel tkyaqil jlu ik tza'n lugar Tofet, chi Dios tzaj tma'n te Jeremías.

¹⁴Tb'ajlenxi jlu, ajtz Jeremías tuj lugar Tofet jatum otoq txi t-sama'n Qman tu'n tyolin te t-xel, kub' we' twitz tja Dios ex xi tma'n kye xjal kyja':

¹⁵Ate Qman aju Tajaw Tkyaqil ex Kydios aj Israel chi kyja': Ktzajel nsama'ne castiw tib'aj tnam lu ex kyib'aj tnam kyvesin kyib' tuk'il ik tza'n o nmaye, porke ma kub' kytzaksin kynab'l tu'n mi'n t-xi kyniman nyole.