Read kumam Jeremías 2 Bible Online

Jeremías 2 - kumam bible

Jeremías 2

¹Tzajtzun yolin Qman wuk'ile ex tma:

²Txi'ya, tjaw tq'ajq'ajel twi'ya kyuw tu'ntzun tb'injtza kyu'n aj Jerusalén, ex q'manxa kye: Chi Qman in tma'n: —Na'nx wu'ne tej matoq q'apojxtoqa, o'kx wi'je tok tk'u'ja tej tb'ant ti'j qyol tuk'ila; in tk'ujlaya ex ok lpe'ya wi'je tuj lugar tzqij tx'otx', aju tx'otx' minti' nno'k awal tuj.

³Sk'o'maj Israel wu'ne tu'n tok te weye, ex ik ok te weye ik tza'n nej twitz awal. Qa at jun ok tok b'inchante mya b'a'n ti'j, in tzaj tcastiw wu'ne ex in tzaj nsama'ne mya b'a'n tib'aj.

⁴Aqeye tiyjil Jacob ex kykyaqil k'loj aj Israel, kyb'inxe tyol Qman.

⁵Chi Qman, in tma'n kyeye: —¿Alkye mya b'a'n knet wi'je kyu'n qe kyxe'chele tej tel kypa'n kyib' wi'je? E ok lpe' kyi'j qe dios minti' kyajb'en, ax ikx kye e ok te minti' kyajb'en.

⁶Minti' e jyon wi'je maske aqine in etz q'inte kye tuj Egipto, ex e tzaj nẍaqlu'ne tuj lugar tzqij tx'otx' nim tqan xaq tuj, minti' a' tuj, puro xob'ajilxix, minti' jun xjal najl tuj ex minti' jun in b'et tuj.

⁷Wu'ne e ul wi'ne tuj tx'otx' tb'anil, tu'ntzun kynik'b'ene ti'j twitz awal in tzaj tq'o'n, ex tu'n kyachine ti'j tkyaqil tb'anil at tuj. Ex tej kyule, ma tz'ok kyq'o'ne ntx'otx'e te mya b'a'n, ex tu'n tlaj il, ma tz'el wik'une ntx'otx'e etzan wu'ne.

⁸Qe pal minti' kyma: ¿Jatum ta' Qman? che chiwt; ex qeju at nleye tuj kyq'ab', minti' ma tz'el kynik' wi'je; qe nejenel minti' xi kyniman nyole, qeju nno'k kyq'on kyib' te nsanjele ma che pakb'an ti'j tb'i Baal, ex ma che ok lpe' kyi'j qe tilb'ilal minti' kyajb'en.

⁹Kyja'tzun aqine Dios in chin q'mante jlu: Che okele tuj xtis wu'ne, kyuk'ix qe tal kychmane che ul itz'j te tib'ajxi.

¹⁰Kyxi'ye tuj tx'otx' Quitim ttzi'yile mar ex kyke'yin b'aje; kysamanxe jun xjal tuj tx'otx' Cedar, tu'n tok tq'o'n tkwent ti'j

¹¹qa at jun nasyon ma che b'aj tch'expu'n qe tdios, maske mya ax tok dios qe. Atzun qe xjal etzan wu'ne, noq tu'n kylaj qe dios minti' kyajb'en ma tz'el kypa'n kyib' wi'je, aqine Kydios ma'xix woklene.

¹²Aya kya'j, tzajx t-xob'il ti'ja tu'n tlaj jlu, tzaj lu'luna tu'n jun nintz xob'ajil. Aqine Dios in chin q'mante jlu.

¹³Qe xjal etzan wu'ne kab'e il ma kyb'incha: Ma tz'el kypa'n kyib' wi'je, aqine ik ntene ik tza'n jun twi' a' itz', ex mer ik tza'n ma b'aj kyb'incha'n txqan jul tu'n tchmet a' kyuj, ex minti' in ten a' kyuj, jurat nna'j tzqij tu'nju pa'x qe.

¹⁴Qe aj Israel mya majen qe, ex mya te majen minti' tzoqpib'l te ma che ul itz'j. ¿Tiqu'ntzun ma tz'el q'i'n tkyaqilju at kye kyu'n aj q'oj?

¹⁵¿Tiqu'ntzun nno'k q'oj kyi'j, mer ik tza'n kyu'n b'alun in che tzanun kyuw wen? Aju kytx'otx' ma b'aj naj, qe kytanmi ma che b'aj tz'e'y tu'n q'aq', ex mi jun ma kyaj ten kyuj.

¹⁶Qe xjal aj Menfis ex qe aj Tafnes ma tz'el b'aj kyi'n tkyaqilju at kyeye.

¹⁷Atzun jlu ma b'aj kyi'je tu'nju el kypa'n kyib'e wi'je, aqine Kymane aju Kydiose, ex atoq qine uk'il kyeye tuj kyb'eye.

¹⁸Atzun ja'lo, ¿ti kykamb'ab'le ti'j tu'n kyxi'ye tuj Egipto ex tu'n kyk'ane a' tuj nima Nilo? Ex ¿ti kykamb'ab'le ti'j tu'n kyxi'ye tuj Asiria tu'n kyk'ane a' tuj nima Éufrates?

¹⁹Ax kyb'inchb'ene mya b'a'n kb'el q'onte kycastiwoye, ex tu'nju ma tz'el kypa'n kyib'e wi'je kb'el kysentense. Che ximane ti'j ex tz'elx kynik'e ti'j, nim mya b'a'n ex yajb'il ma tzaj kyib'aje tu'nju ma tz'el kypa'n kyib'e wi'je, ex tu'nju minti' ma chinx kynimane, aqine Kymane ex Kydiose. Aqine Dios Tajaw Tkyaqil in chin q'mante jlu.

²⁰Ma b'et-xi q'ij tjawlen kyi'n kyib'e wi'je, ma kub' kyxk'ayin kyib'e tu'n mi'n t-xi kynimane nyole ex ma kymaye: Mi'n qaje tu'n qajb'ene teya, che chiye. Kyib'aj kykyaqil tal witz ex kyjaq' kykyaqil tze' nim kyxaq o'kx ma tz'ok b'aj kywi'ye ti'j tu'n kyk'ulune kywitz junxitl dios, ik tza'n jun xu'j jawni twitz kyuk'il xinaq.

²¹Ik e ok nq'o'ne ik tza'n jun wi' tqan uva tb'anil, e ku'x wawa'ne ik tza'n tqan uva tzajni ti'j tb'anil iyaj, pero ma b'aj kych'expu'n kyib'e, ex ik ma che oke ik tza'n tqan uva at tuj k'ul minti' tajb'en.

²²Maske tz'el kyjaqu'n kyi'je tu'n ta'l tza'j ex maske tz'ajb'en nim jabón kyu'ne, pero tuj nwitze ttenx kyile, mlay tz'el tx'jet.

²³¿Tza'n tten in kyma'ne: Baqa ma b'aj qtz'ilsan qib'e ex baqa ma qo k'ulune kywitz tilb'ilal Baal? Che ximane ti'j tza'n tten e b'ete tuj chq'ajlaj, kyq'o'nke kwent ti'j tkyaqilju o kyb'inchaye. Ik kytene ik tza'n jun ttxu camey ok in pon t-saqch in b'et tik' tuj tkyaqil part.

²⁴Ik kytene ik tza'n jun ttxu bur te tjaq' k'ul ax o ch'iy tuj lugar minti' kynajb'il xjal tuj, ok te'lel t-saqch mlay tzyet, in xi t-sqo'n kyq'iq' tu'n tknet jun tman bur tu'n. Qa ma jyon jun tman chej ti'j, mya il ti'j tu'n t-sikt, jurat in knet tu'n tu'nju otoq tz'e'l t-saqch.

²⁵Aqeye aj Israel, mi'n kyk'ixb'isaye kyqane tu'nju in che ojqelane okxi tb'aj kyxajb'iye tok, mi'n kyaq'e amb'il tu'n ttzqij tuj kyqule tu'nju in che jyone ti'j junxitl dios. Ex che chiye in kyma'ne: Mi'n, mlay txi qnimane tyola; mas k'ujla'n qe junxitl dios qu'ne ex qo xel lpe'ye kyi'j, che chiye.

²⁶Ik tza'n te eleq' in kub' tch'ixwi ok tel tuj q'ancha'l, ikxtzun kb'el kych'ixwi kykyaqil aj Israel, kyuk'ix qe kyrey, qe nejenel kye, qe pal ex qe nsanjele ate' kyxol;

²⁷porke in kyma'n te jun piẍ tze': Aya qmane, ex in kyma'n te jun ab'j: Aya qtxu'ye. Atzun weye noq ttzal kyi'j in tzaj kyq'o'n nwitze, ex ok in tzaj mya b'a'n kyi'j, jurat naj in tzaj kyma'n weye: Tzaja kolol qi'je.

²⁸¿Jatum ate' qe kydiose e b'aj kyb'inchane? aqeye aj Judá. E kytzaj qa jaku che klete kyu'n ok ttzaj mya b'a'n kyib'aje. Nimku kyajlal kydiose at. Ik tza'n kyajlal kytanmiye, iktzun kyajlal kydiose.

²⁹¿Tiqu'n in che yoline mya b'a'n wi'je? Kykyaqile mib'an che nimane weye. Aqine Dios in chin q'mante jlu.

³⁰Noq gan kub' kycastiwoye wu'ne, minti' o tz'ajb'en jlu te xnaq'tzb'il kyeye. E kub' kyb'yo'ne qe nsanjele ik tza'n jun b'alun in b'aj ttzaqun tkanb'.

³¹Aqeye aj Israel ate'ye tuj tq'ijlalil ja'lo, kyb'intze nyole, aqine Dios. ¿Ikpetzun qine te kyeye ik tza'n jun tzqij tx'otx' ex qa ik tza'n jun lugar puro qlolj tuj? Aqeye xjal etzan wu'ne, ¿tiqu'n in kyma'ne: Tzoqpi'n qo'ye ex mlay qo aje juntl maj tuk'ila? Che chiye.

³²¿Jakupe tzik' tna'l xmulq'ab'aj ex qa uwj tu'n jun xu'j, aju otoq tk'am tu'n tchmil, tuk'ix t-xb'alun tej tmoje'? Atzun kyeye, aqeye etzan wu'ne, ma tz'el nim q'ij tik'len nna'njtze kyu'ne.

³³Ojtzqimaj b'e kyu'ne tu'n kyjyonteye junxitl kydiose. Ma che oke te xnaq'tzal ti'j mya b'a'n.

³⁴Nojni ti'j kyxb'alune tu'n kychk'el qe meb'a xjal ex tu'n kychk'el qe xjal minti' kypaltil, aqeju minti' jun kyil o knet kyu'ne.

³⁵Ex maske in kyb'incha'ne tkyaqil jlu, in kyma'ne: Minti' qe qil ex minti' in q'ojin Dios quk'ile, che chiye. Che okele tuj xjel wu'ne tu'n tkub' kycastiwoye, porke in kyma'ne qa minti' kyile.

³⁶¿Tiqu'n jurat naj in ch'expaj kynab'le tu'nju noq jachaq in che'xe jyolte juntl kolol kyi'je? K'elel kych'ixwiye kyu'n aj Egipto, ik tza'n el kych'ixwiye kyu'n aj Asiria.

³⁷Che ajetz meltz'aje tuj Egipto in che ch'ixwiye wen, porke aqeju q'uql kyk'u'je kyi'j ik'un qe wu'ne, ex minti' jun ok kykamb'a'ye tu'nju q'uql kyk'u'je kyi'j.