Read kumam Jeremías 22 Bible Online

Jeremías 22 - kumam bible

Jeremías 22

¹Tzaj tma'n Qman weye kyja': Txi'ya tuj tja rey ex q'manxa tqanil lu:

²Aya rey te Judá, aya q'uql tokx tuj tq'uqb'il David, kyuk'ix qe xjal at kyoklen ttxlaja ex kykyaqil xjal najl tuj tnam lu, kyb'intze tyol Qman kyja':

³Kyb'inchame aju tz'aqlxix ex aju b'a'n, kyklome qe xjal tuj kyq'ab' qeju in che b'aj yajlan kye, mi'n kyb'inchaye mya b'a'n ex mi'n che elq'ane kyi'j stranjer xjal, mi kyi'j qe k'wa'l minti' kyman, mi kyi'j qe meb'a xu'j ex mi'n kub' kyb'yo'ne qe xjal minti' kyil.

⁴Qa axix tok ma kyb'inchaye aju ma txi nma'ne kyeye, ex qe rey in che okx qe' tuj tq'uqb'il David, kukx che oketz ttzi tlamel tja rey kyjax qe kyuj carwaj ex kyib'aj chej, kyuk'in kyib' kyuk'il qe xjal at kyoklen kytxlaj ex kyuk'ix qe tnam xjal.

⁵Qatzun minti' ma txi kynimane yol lu, kxel nma'ne jun yol axix tok wu'nx wib'e, aju tja rey noq ttx'aqan kyjel ten. Aqine Dios in chin q'mante jlu.

⁶Porke chi Qman ti'j tja rey te Judá: Ik ttena te weye ik tza'n tx'otx' Galaad, ex ik tza'n twi witz Líbano, ex kxel nma'ne jun yol axix tok ti'ja: K'okela wu'ne te jun tzqij tx'otx' ex te jun lugar minti' kynajb'il xjal tuj.

⁷Che xel nsama'ne qe xjal b'anin kyten kyuk'il kymakb'il in che ajb'en tuj q'oj te xitul teya, kb'ajel kytx'emin qe tqan ja wi'ten tb'anilxix che ke'yin ex k'okex kyq'o'n tuj q'aq'.

⁸Tb'ajlenxitzun jlu, ok kyik' b'et xjal te nimku nasyon ttxlaj tnam lu kxel kyqanin kye kyuk'il: ¿Tiqu'n ma tb'incha Qman ikju ti'j nintz tnam lu?

⁹Ex ktzajel tzaq'we'n kye: Tu'nju minti' ma japun kyu'n aju yol kyaj b'ant ti'j tu'n Kydios kyuk'il, ma che ok ten k'ulul kywitz qe tilb'ilal ex ma che ajb'en kye.

¹⁰Mi'n che oq'e ti'j qtzan rey Josías, mi'n che oq'e ti'j tkyimlen; masxix che oq'e ti'j Salum aju tky'ajal; ma txi q'i'n najchaq ex mlay tz'ajtz meltz'aj juntl maj, mlayx tzul meltz'aj tuj tx'otx' jatum ul itz'j.

¹¹Porke chi Qman ti'j Salum aju tky'ajal Josías aju qtzan rey te Judá, aju kyaj ten te kawil tkyimlenxi qtzan tman ex aju ma tz'ex q'i'n tuj lugar lu: Mlayx tzul meltz'aj,

¹²noq o'kx max kymel tuj tnam jatum ma pon q'i'n, ex mlayx tz'ajtz meltz'aj juntl maj ke'yilte tnam lu.

¹³Ay b'ek'b'il twitza, aya in jaw tb'incha'na tjaya ma' twa'l tu'n sb'ub'l ex mya tuj tumel; in che ok tq'o'na qe xjal aq'nal ti'j ex minti' in xi tchjo'na twi kyk'u'j.

¹⁴In tma'na kyja': Kjawil nb'incha'ne jun njaye matijxix wen, ela' kolin tten ex ma' tuj, kyjel nq'o'ne ventan ti'j, k'okel nq'o'ne tz'lom tze' wi'ten tujile ex k'okel nq'o'ne tk'a' kyaq ke'yin.

¹⁵¿Tu'npetzunju in b'aj tb'incha'na tjaya ti'j tb'anil tze' wi'ten k'okela te jun nintz rey tuj twitza? Aju qtzan tmana o tz'anq'in tuj txub'txaj, o tb'incha aju tz'aqlxix ex o b'et tuj tumel, kyja'tzun puro b'a'n ela te te.

¹⁶Tuj tumel xi tb'incha'n kyi'j meb'a ex kyi'j qeju in che b'aj yajla'n, ex kyja'tzun b'a'n ela te te. O b'ant tu'n ikju, tu'nju el tnik' wi'je. Aqine Dios in chin q'mante jlu.

¹⁷Atzun teya, o'kx nno'k tilil tu'na tu'n tkamb'anteya kamb'ab'l mya tuj tumel, in che kub' tb'yo'na qe xjal minti' kyil, in che b'aj tyajla'na qe t-xjalila ex nne'l ti'na aju at kye, chi Qman te Joacim.

¹⁸Kyja'tzun chi Qman ti'j Joacim aju tky'ajal Josías, aju rey te Judá: Mi a'l jun kjawil oq' ti'j ok tkyim, mi a'l jun kxel tma'n tuj oq'el kyja': Ay Wermaniye, ay Wanb'e, ay Nman, ay Tat Rey, che chiwt.

¹⁹Kb'elex maqu'n ik tza'n jun bur, kxel jawo'n ex k'elex xo'n ti'jxi tnam Jerusalén.

²⁰Aqeye aj Jerusalén, kyjaxe twi witz Líbano ex kyjaw sch'ine, tjaw tq'ajq'ajel kywi'ye tuj tx'otx' Basán, kyxi sch'ine max kywi' qe tal witz Abarim, ex kykyaqil qe tnam mojl kyyole kyuk'il ma che naj.

²¹In yoline kyuk'ile tuj tq'ijlalil tej txub'txaj ate'ye, ex minti' inx kyb'ine. Ex kyja'x kyb'inchaye t-xe tnejel, minti' o kyajb'eye tu'n t-xi kyb'ine nyole.

²²Tu'n kyq'iq' che xel jawo'n kykyaqil qe nejenel kyeye ex aqeju tnam mojl kyyole kyuk'il che xel q'i'n pres tuj juntl tnam najchaq. Ex kb'el kych'ixwiye ex knajel kynab'le tu'n tlaj tkyaqil kyb'inchb'ene mya b'a'n.

²³Aqeye txub'txaj ate'ye tuj kyjaye b'inchamaj ti'j tze' wi'ten tzajni q'i'n twi witz Líbano, che jawil ayayane ok ttzaj k'ixk'oj kyi'je, ik tza'n k'ixk'oj in tzaj ti'j jun xu'j ok nnu'l itz'j tal.

²⁴Chi Qman o tma te Jeconías aju tky'ajal Joacim aju rey te Judá: Kxel nma'ne jun yol axix tok wu'nx wib'e: Maske ikwit ttena ik tza'n jun xmulq'ab'aj in ajb'en te seyarb'il tok ti'j tal nb'anq'ab'e, pero k'elel wi'ne,

²⁵ex kxel nq'o'ne tuj kyq'ab' aj q'oj ti'ja, aqeju in che ximan ti'j tu'n tkub' b'yo'na kyu'n, aqeju nimxix in xob'a kywitz. Kxel nq'o'ne tuj tq'ab' Nabucodonosor aju rey te Babilonia, ex tuj kyq'ab' aj Caldeo.

²⁶K'elex nlajo'na tuk'ix ttxu'ya ex che xel q'i'ne tuj jun tx'otx' jatum mya a e ul itz'je, ex maxtzun che kymele kykab'ile.

²⁷Kyja'tzun mlayx che ul meltz'aje tuj tx'otx' nimxix kyganiye tu'n kyul meltz'aje tuj, chi Qman te Jeremías.

²⁸¿Ikpe tten Jeconías ik tza'n jun tal xar pa'x mi jun in tzalaj ti'j? ¿Tiqu'n ma tz'ex lajo'n kyuk'ix qe tk'wa'l tu'n kyxi q'i'n tuj tx'otx' minti' ojtzqi'n kyu'n?

²⁹Aya tx'otx', aya tx'otx', aya tx'otx', b'intza tyol Qman:

³⁰Chi Qman kyja': Kytz'ib'an ku'xe tb'i xinaq lu kyuj qe libro, mer ik tza'n minti' tk'wa'l, ex tkyaqil mya b'a'n ma tz'el te te. Porke minti' jun tiyjil k'okex qe' tuj tq'uqb'il David tu'n tkawin juntl maj tuj Judá.