Read kumam Jeremías 24 Bible Online

Jeremías 24 - kumam bible

Jeremías 24

¹T-xilenxi q'i'n Jeconías pres tu'n Nabucodonosor aju rey te Babilonia, kyuk'ix qe nejenel tuj Judá, qe calpinter ex qe tx'inol k'uxb'il, tzaj tyek'un Qman weye kab'e chi'l twitz higo kykub' qe twitz tja Dios. Ate Jeconías tky'ajal Joacim ex rey te Judá.

²Tb'anilxix twitz higo tku'x tuj jun chi'l ik tza'n tnejel twitz higo in che q'anix, atzun juntl chi'l mya b'a'n qe twitz higo tku'x tuj ex jumajx mya b'a'n qe, mlay b'ant kylonjtz.

³Ex tzaj tqanin Qman weye kyja': ¿Ti ma tila Jeremías? Atzun weye xi ntzaq'we'ne: Ma wile twitz higo; aqeju b'a'n, puro tb'anil qe, atzun qeju mya b'a'n, jumajx mya b'a'n qe, mlayx b'ant kylonjtz.

⁴Tzajtzun tma'n Qman weye:

⁵Aqine aju Kydios aj Israel in nma'ne jlu: Ik tza'n qe twitz higo tb'anilxix, kyja'xtzun che elel aj Judá nwitze, aqeju o che ex nlajo'ne tzalu ex o che'x q'i'n kyu'n aj Caldeo; ok nb'inchaye b'a'n kye.

⁶Aqine chin okel tene kwentil kye ex che ul meltz'aj juntl maj wu'ne tuj tnam lu; che tel b'a'n wu'ne ex mlay che naj juntl maj wu'ne; ik che okel ik tza'n jun tze' awa'n ex mlay che jatz nb'aqo'ntle.

⁷Kxel nq'o'ne kynab'l tu'n tel kynik' ti'j qa aqine Kyman; che okel te jun tnam etzan wu'ne, atzun weye chin okele te Kydios, ok che ajetz meltz'aj wuk'ile tu'n tkyaqil kyanmi.

⁸Atzunte Sedequías aju rey te Judá, kyuk'ix qe nejenel ex txqantl xjal najl tuj Jerusalén, aqeju otoq che kyaj ten ex qeju otoq che'x q'i'n tuj Egipto, che okel wu'ne ik tza'n qe twitz higo mya b'a'n ex jumajx mya b'a'n qe, mlayx b'ant kylonjtz.

⁹Che okel yaso'n ex che elel ik'un kyu'n xjal kyuj kykyaqil nasyon twitz tx'otx', che okel q'o'n te mya b'a'n, te tzeb'l ex te xmayb'il kyu'n xjal, ex ktzajel qanin mya b'a'n kyib'aj kyuj kykyaqil lugar jatum che b'ajel nsputune.

¹⁰Che tzajel nsama'ne xjal q'ojlel kyi'j, ax ikx ktzajel nsama'ne we'yaj ex tx'u'j yab'il kyi'j, okxi mi jun tu'n tkyaj ten tuj tx'otx' xi nq'o'ne kye ex kye qtzan kyxe'chel.