Read kumam Jeremías 25 Bible Online

Jeremías 25 - kumam bible

Jeremías 25

¹Tuj tkyajin ab'q'i ttzyetlen tkawin rey Joacim aju tky'ajal Josías, ex tuj tnejel ab'q'i ttzyetlen tkawin Nabucodonosor tuj Babilonia, tzaj tma'n Qman jun tqanil te Jeremías kyi'j kykyaqil aj Judá.

²Xitzun tma'n Jeremías aju t-sanjel Dios tqanil lu kye kykyaqil tnam xjal tuj Judá, ax ikx kye qe xjal najl tuj tnam Jerusalén, chi kyja':

³Atxix tuj toxlajin ab'q'i ttzyetlen tkawin Josías aju tky'ajal Amón ex rey te Judá ex kukx ja'lo, ma b'ant-xi 23 ab'q'i, kukx in tzaj yolin Qman wuk'ile ex ela' maj in xi nma'ne kyeye, pero minti' in chinx kyb'ine.

⁴Ex maske kok'x in che tzaj t-sama'n Qman qe tmajen, aqeju t-sanjel, atzun kyeye minti' in xi kyb'i'ne ex minti' in xi kyq'o'ne kywi'ye kyi'j

⁵tej ttzaj kyma'n kyeye kyja': Kykolin kyaje kyb'eye ex kyb'inchb'ene mya b'a'n, ex oktzun che anq'ile twitz tx'otx' aju tzaj tq'o'n Qman te jumajx te kyeye ex te kye qtzan kyxe'chele.

⁶Mi'n che ok lpe'ye kyi'j junxitl dios, mi'n che ajb'ene kye, mi'n che k'ulune kywitz ex mi'n kyb'inchaye tu'n ttzaj tq'oj Qman kyi'je, tu'n tlaj kydiose kyu'nxe in b'aj kyb'incha'ne. Qa ma txi kynimane jlu, mlay tzaj t-sama'n Qman mya b'a'n kyib'aje, che chi t-sanjel.

⁷Chi Qman: Tu'nju minti' ma chinx kyb'i'ne, ma tzaj nq'oje kyi'je tu'n kylaj tilb'ilal kydiose kyu'nxe in che b'ant, ex tu'n jlu tzul mya b'a'n kyib'aje.

⁸Kyja'tzun chi Qman aju Tajaw Tkyaqil: Tu'nju minti' ma txi kyb'ine nyole,

⁹che tzajel ntxko'ne kykyaqil tnam ate' tuj tb'anq'ab' q'ij, tuk'ix Nabucodonosor aju ajb'el weye ex rey te Babilonia, tu'n kyok tzoqpaj ti'j tnam lu, kyi'j kykyaqil xjal najl tuj ex kyi'j qe nasyon kyvesin kyib' tuk'il. Che b'ajel nxitune ex te jumajx noq kytx'aqan kyjel ten wu'ne, tu'ntzun kyjaw sek'paj xjal ex tu'n kyxmayin kyi'j.

¹⁰Ok nb'inchaye tu'n mi'n kyb'injtz b'itz te ninq'ij, mi qe b'itz te tzalajb'il, mi qe b'itz te mejeb'le'n, mi tq'ajq'ajel twi kya' ex mi tu'n tilwaj t-spik'umal tqan lampr.

¹¹Tkyaqil nasyon lu kb'ajel xitj ex noq ttx'aqan kyjel ten. 70 ab'q'i che tel qe nasyon lu tjaq' tkawb'il rey te Babilonia.

¹²Ex oktzun tjapun b'aj 70 ab'q'i, kb'eltzun tcastiw rey te Babilonia wu'ne tuk'ix ju nasyon in kawin rey tib'aj, tu'n tlaj kyb'inchb'en xjal mya b'a'n; ax ikx qe tnam kye aj Caldeo che b'el nxitune te jumajx. Aqine Dios in chin q'mante jlu.

¹³Kb'el nq'o'ne tcastiw ju nasyon lu ik tza'nx tkyaqil q'mamaj wu'ne ex tz'ib'amaj tuj libro lu, ik tza'nx o tma Jeremías kyi'j kykyaqil nasyon.

¹⁴Che okex aj Caldeo tjaq' kykawb'il nimku nasyon ex tjaq' kykawb'il qe rey nim kyipumal. Wu'ne kchjetel kyu'n ik tza'nx kyb'inchb'en, chi Qman.

¹⁵Ate Qman aju Kydios aj Israel tzaj tma'n weye kyja': Q'inxa tal copa lu nojni tu'n nq'oje, ex q'onxa te kyk'a' xjal najlqe kyuj kykyaqil nasyon jatum kxel nsama'na.

¹⁶Oktzun t-xi kyk'a'n, che ẍokpajeb'el ex che okel loc, tu'n kylaj qe xjal q'ojlel che xel nsama'ne kyxol, chi Qman.

¹⁷Tzajtzun wi'ne aju tal copa tuj tq'ab' Qman ex xi nq'o'ne te kyk'a' xjal najl kyuj nasyon jatum inx sama'ne tu'n Qman.

¹⁸Xi nq'o'ne te kyk'a' aj Jerusalén ex kye qeju najl kyuj qe tnam te Judá, tuk'ix kye kyrey ex kye nejenel kye, tu'ntzun tb'aj xitj kytanmi, tu'n kylab'in xjal ti'j, tu'n tok te kyxmayb'il ex tu'n ttzaj kyqanin mya b'a'n tib'aj, ik tza'n in b'ant ja'lo.

¹⁹Ax ikx xi nq'o'ne te tk'a' Faraón aju rey te Egipto, tuk'ix kye xjal at kyoklen ttxlaj ex kye nejenel ex kye kykyaqil xjal ate' tuj ttanmi,

²⁰tuk'ix kye xjal junxitl kyiyjil najl tuj tnam Egipto. Ax ikx xi nq'o'ne kye kykyaqil rey tuj tx'otx' Uz, ex kye kykyaqil rey ate' tuj kytx'otx' aj Filisteo, aqeju ate' tuj Ascalón, Gaza, Ecrón ex kye ch'intl xjal ate'xtoq tuj tnam Asdod.

²¹Xi nq'o'ne kye aj Edom, kye aj Moab ex kye aj Amón,

²²kye kykyaqil rey te Tiro, kye kykyaqil rey te Sidón, kye kykyaqil rey in che kawin kyuj qe tnam ttzi'yile nintz mar,

²³kye aj Dedán, kye aj Tema, kye aj Buz ex kye kykyaqil xjal nne'l kymatzo'n ttzmal kywi' ttxlaj kyẍkyin,

²⁴kye kykyaqil rey te Arabia, kye rey junxilchaq kyiyjil najlqe tuj tzqij tx'otx',

²⁵kye kykyaqil rey te Zimri, te Elam ex te Media,

²⁶kye kykyaqil rey ate' tuj tb'anq'ab' q'ij, qa niqayin ex qa najchaq kyxol kyuk'il txqantl tnam, ex kye kykyaqil rey ate' tuj tkyaqil twitz tx'otx'. Ex te b'ajsb'il kxel tk'a'n rey te Babilonia.

²⁷Ex tzaj tma'n Qman weye: Q'manxa kye kyja': Chi Qman aju Tajaw Tkyaqil ex Kydios aj Israel: Kyk'anxe aju tku'x tuj copa tu'n tchyo'n kywi'ye, tu'n ttzaj xab' kyk'u'je ex tu'n kykub' tz'aqe twitz tx'otx' tu'ntzun mi'n kyjaw we'ye, tu'n kylaj qe xjal che xel nsama'ne q'ojlel kyi'je.

²⁸Ex qatzun kyk'i' tzik' kyi'n copa tuj tq'ab'a ex kyk'i' txi kyk'a'n aju tku'x tuj, q'manxa kye kyja': Chi Dios aju Tajaw Tkyaqil, il ti'j kxel kyk'a'ne.

²⁹Porke ma tzyet tu'n t-xi nq'o'ne castiw tuj tnam in na'njtz nb'iye tuj, yajtzun kyeye, ¿tuj kywitze qape mi'n kub' kycastiwoye? Mlayx tzik'x ti'j tu'n mi'n tkub' kycastiwoye, ok che xel nsama'ne qe xjal q'ojlel kyi'j kykyaqil xjal najl twitz tx'otx'. Aqine Dios Tajaw Tkyaqil in chin q'mante jlu.

³⁰Q'manxa tkyaqil yol lu kye: Max tuj kya'j ktzajel tq'ajq'ajel twi' Qman kyuwxix wen, max tuj lugar xjan jatum najl ktzajel q'ajt; ktzajel q'ajt kyuwxix wen kyi'j xjal etzan tu'n, in sch'in ik tza'n qe xjal nne'l kypatz'u'n ta'l twitz uva tjaq' kyqan, ax ikx in sch'in tuk'il tq'oj kyi'j kykyaqil xjal najl twitz tx'otx'.

³¹Aju tq'ajq'ajel twi' kpol max ttxa'npun tx'otx', ex kykyaqil nasyon che okel tuj xjel tu'n Qman, kb'el kysentens kykyaqil xjal tu'n ex ok tb'incha' tu'n kykub' b'yo'n qeju b'inchal mya b'a'n. Ate Qman in q'mante jlu.

³²Ate Qman aju Tajaw Tkyaqil in tma'n kyja': Kpol b'aj k'ixb'isab'l kyuj kykyaqil nasyon; jun nintz kyq'iq' ktzajel qe' max ttxa'npun tx'otx'.

³³Aqeju che kymel tu'n Qman tuj q'ij lu che kyjel pale' tuj tkyaqil twitz tx'otx'. Mi jun k-oq'el kyi'j ex mi jun kjawil q'inte kyximlal tu'n kyku'x maqu'n; ax che kyjel pale' twitz tx'otx' ik tza'n kytxa' alumaj.

³⁴Che wuyine aqeye kawil ex che sch'ine tu'n ta'w k'ixk'oj, ex aqeye nejenel kye xjal kytolin b'aj kyib'e tuj quq, porke ma tzul tq'ijlalil tu'n kykub' b'yete ex tu'n kyb'aj sputje, ex che b'el b'uchje ik tza'n jun vas tb'anilxix.

³⁵Mlayx b'ant tu'n kyel oq qe kawil ex mlayx che tzoqpaj qe nejenel kye xjal.

³⁶In b'injtz tq'ajq'ajel kywi' qe kawil ex in che wuyin qe nejenel porke ma naj kytanmi tu'n Qman,

³⁷ex ma che b'aj naj qe kojb'il tb'anilxix tu'n tq'oj.

³⁸Ma tz'etz Qman ik tza'n jun b'alun nne'tz tuj tjul ex aju kytanmi noq ttx'aqan ma kyaj ten tu'n, porke ma tzaj nimxix tq'oj Qman ex ma tzaj t-sama'n jun q'oj xob'ajilxix kyi'j.