Read kumam Jeremías 26 Bible Online

Jeremías 26 - kumam bible

Jeremías 26

¹Tej ttzyet tkawin Joacim aju tky'ajal Josías tuj Judá, tzaj yolin Qman tuk'il Jeremías,

²ex tzaj tma'n te kyja': We'kuya ttxa'n pe'n twitz tja Dios, ex tkyaqil aju kxel nma'ne teya q'manxa kye xjal aqeju in che tzaj kyuj qe tnam te Judá tu'n kyk'ulun tuj tja Dios, noq tqanx mi txi tma'na tkyaqil nyole kye.

³Mya yajku txi nimana kyu'n ex jaku kyaj kykolin kyb'e mya b'a'n tu'ntzun mi'n tkub' nq'o'ne kycastiw, aju ximamaj wu'ne tu'n tkub' nq'o'ne tu'n tlaj kyb'inchb'en mya b'a'n.

⁴Q'manxa kye, aqine Dios in chin q'mante jlu: Qa mi ma txi kynimane nyole ex qa mi ma che japun qe nleye kyu'ne, aju o txi nma'ne kyeye,

⁵ex qa mi ma txi kynimane aju in kyma'n qe nmajene, aqeju nsanjele, aqeju kukx ma che tzaj nsama'ne ex minti' ma txi kynimane,

⁶ex ik k'okel njaye lu wu'ne, ik tza'n o nb'inchaye ti'j ju attoq tuj Silo, ex ktzajel mya b'a'n tib'aj tnam lu wu'ne, tu'n tok te jun yek'b'il kye kykyaqil nasyon twitz tx'otx', chikuya kye, chi Dios te Jeremías.

⁷Qe pal ex qeju nno'k kyq'on kyib' te t-sanjel Dios ex kykyaqil xjal o kyb'i aju tqanil o tma Jeremías tuj tja Dios.

⁸Tej tb'aj tma'n Jeremías aju yol otoq tzaj q'ma'n te tu'n Qman, tzaj tzyu'n kyu'n qe pal ex kyu'n qeju nno'k kyq'on kyib' te t-sanjel Dios ex kyu'n xjal, ex xi kyma'n te: Il ti'j tu'n tkyima.

⁹¿Tza'n tten ma tmaya qa tu'n Qman ma tzaj sama'na q'malte qeye tu'n tnaj tja Dios lu ik tza'n o naj aju attoq tuj Silo, ex qa tu'n tkub' xitj tnam lu ex tu'n tkyaj ten minti' xjal tuj? Che chi. Ex kykyaqil xjal b'aj kytxolb'an kyib' ti'jele Jeremías tuj tja Dios.

¹⁰Tej kyb'inte qe nejenel kye aj Judá aju in b'aj, kub' b'e kyu'n tuj tja rey tu'n kypon tuj tja Dios ex e kub' qe' ttzi' Ak'aj Tlamel te tja Dios.

¹¹Atzun kye pal ex qeju nno'k kyq'on kyib' te t-sanjel Dios xi kyma'n kye qe nejenel ex kye kykyaqil xjal: Aju xjal lu il ti'j tu'n tkub' t-sentens tu'n tkyim, porke ma tma tu'n ttzaj mya b'a'n ti'j tnam lu, ex ax qeye ma che b'inte te, che chi.

¹²Atzunte Jeremías xi tma'n kye qe nejenel ex kye xjal: Ate Qman saj samante weye tu'n t-xi nma'ne kyeye alkye tu'n tb'aj ti'j tja Dios lu ex ti'j tnam lu, ik tza'nx ma kyb'iye.

¹³Kyja'tzun, kych'expum kyb'eye ex kyb'inchb'ene mya b'a'n ex kynimanxe Qman aju Kydiose, tu'ntzun mi ttzaj t-sama'n mya b'a'n kyib'aje, aju ma tma.

¹⁴Atzun weye, lu qine atine tuj kyq'ab'e; kyb'inchame wi'je alkye b'a'n tuj kywitze.

¹⁵Qatzun ma chin kub' kyb'yo'ne, tz'elx kynik'e ti'j, axix tok kyu'nxe ktzajel castiw kyib'aje ex tib'aj tnam lu ex kyib'aj kykyaqil xjal najl tuj, tu'nju otoq kub' kyb'yo'ne jun xjal minti' til, ex ax tok ate Qman saj samante weye tu'n t-xi nma'ne tkyaqil yol lu kyeye, chi Jeremías.

¹⁶Atzun kye nejenel ex kykyaqil xjal xi kyma'n kye pal ex kye qeju nno'k kyq'on kyib' te t-sanjel Dios: Minti' jun til xjal lu ma knet qu'n tu'n tkyim; aju xjal lu tu'n Qman aju Qdios ma tzaj sama'n tu'n tyolin quk'il, che chi.

¹⁷At junjun tij xjal e jaw we' ex xi kyma'n kye qe xjal kyb'uyin kyib':

¹⁸Tuj tq'ijlalil tej tten Ezequías te rey tuj Judá, ate Miqueas aju aj Moreset o yolin tuj tb'i Qman kye kykyaqil xjal aj Judá kyja': Chi Qman aju Tajaw Tkyaqil: K'okel tnam Sión te jun kojb'il ch'okamaj, atzunju tnam Jerusalén noq ttx'aqan kyjel b'uye' ex kch'iyil nim k'ul twi witz jatum tkub' tja Dios.

¹⁹¿Baqa o kub' b'yo'n Miqueas tu'n rey Ezequías ex kyu'n kykyaqil xjal aj Judá? Noqpe tzaj t-xob'il rey twitz Qman ex ok ten kub'sal twitz Dios tu'n ttzaj tz'e'y tk'u'j ti'j. Kyja'tzun minti' tzaj t-sama'n Qman mya b'a'n kyib'aj, aju otoq tma. ¿Yajtzun qe, maj ktzajel qi'n jun nintz mya b'a'n qib'aj tu'n tkub' qb'yo'n xjal lu? Che chi.

²⁰Ax ikx tzaj t-sama'n Dios t-sanjel, aju Urías tb'i ex tky'ajal Semaías aju aj Quiriat-jearim, tu'n ttzaj tma'n ax tqanil ikx tza'n ma tma Jeremías, qa kyja'toq ttzaj mya b'a'n tib'aj tnam lu ex tib'aj nasyon lu.

²¹Tejtzun tb'inte rey Joacim kyuk'ix qeju at kyoklen ttxlaj ex qe nejenel aju o tma Urías aju t-sanjel Dios, o tajb'e rey tu'n tkub' tb'yo'n, ex tej tb'inte Urías jlu, tzaj t-xob'il ti'j ex xi oq tuj Egipto.

²²Xitzun sama'n Elnatán aju tky'ajal Acbor tu'n rey Joacim, kyuk'ix junjuntl xjal tuk'il, tu'n kyxi' tuj Egipto.

²³Ajtz kyi'n Urías tuj Egipto ex xi kyq'o'n tuj tq'ab' rey Joacim, atzunte rey xi tma'n tu'n tkub' b'yo'n ex tu'n t-xi xo'k t-ximlal tuj camposant jatum in che ku'x maqu'n noq alkye xjal.

²⁴Ax ikx te Ahicam aju tky'ajal Safán o yolin tu'n tklet Jeremías tuj kyq'ab' xjal, ex minti' kub' b'yo'n.