Read kumam Jeremías 30 Bible Online

Jeremías 30 - kumam bible

Jeremías 30

¹Atzun qe yol lu tzaj tma'n Qman te Jeremías:

²Ate Qman aju Kydios aj Israel in tma'n kyja': Tz'ib'an ku'xa tuj jun libro tkyaqilju yol o txi nma'ne teya,

³porke tzul tq'ijlalil tu'n kyajtz meltz'aj qe xjal etzan wu'ne, aqe aj Israel ex qe aj Judá, aqeju o che'x q'i'n pres. Wu'ne kb'antel tu'n kyul meltz'aj tuj tx'otx' xi nq'o'ne te kyetzb'il qtzan kyxe'chel. Aqine Dios in chin q'mante jlu.

⁴Atzun qe yol lu o tma Qman kyi'j aj Israel ex kyi'j aj Judá.

⁵Chitzun Qman kyja': In b'injtz tq'ajq'ajel kywi xjal in che sch'in tu'n kyxob'il, in che jaw sek'paj ex mya tuj txub'txaj ate'.

⁶Kyqaninxe: ¿Atpe jun xinaq jaku tzul itz'j tal? ¿Tiqu'ntzun in wile in jaw kyxqutz'in kyib' qe xinaq mer ik tza'n jun xu'j ok nnu'l itz'j tal? ¿Tiqu'ntzun kykyaqil puro spelin ma che ok?

⁷Ch'ix tul kanun q'ij xob'ajilxix, na'nx ttzaj jun maj ikju. Aju q'ij lu k'okel te jun b'is ma'xix kye tiyjil Jacob, ex che kletel.

⁸Aqine Dios Tajaw Tkyaqil in nma'ne jlu: Che tzoqpetel qe xjal etzan wu'ne tjaq' kykawb'il qe majnil kye, ex mlay che ok juntl maj te kymajen xjal kyuj junxitl nasyon.

⁹Noq o'kx che ajb'el weye aqine Kyman ex Kydios, ex che ajb'el te David aju k'okel nq'o'ne te rey kyxol.

¹⁰Aqine Dios in chin q'mante jlu: Mi'n che xob'e aqeye tiyjil Jacob ex ajb'el weye, mi'n tzaj kyxob'ile aqeye aj Israel, ok che kletele wu'ne kyuk'ix qe kyiyjile, tuj tnam najchaq jatum o che pon q'i'ne. Che anq'ile juntl maj tuj txub'txaj, ex mi jun k'okel xob'tzante kyeye.

¹¹Aqine Dios kxel nma'ne jlu: Lu qine atine kyuk'ile tu'n kyklete. Che b'ajel nxitune kykyaqil nasyon jatum otoq che b'aj nsputune, atzun kyeye mlay che naje wu'ne; noq o'kx kb'el nq'o'ne kycastiwoye ik tza'nx kyb'inchb'ene, ex mlayx tzik'x kyi'je tu'n mi'n tkub' kycastiwoye.

¹²Chi Qman kyja': Aju ẍil tok kyi'je mlayx b'ant ex minti' q'anb'il ti'j k'ixb'len tok kyi'je.

¹³Minti' jun taj onin kyi'je ex minti' q'anb'il tu'n kyb'anixe ti'j ẍil tok kyi'je.

¹⁴Ma tzik' kyna'njtze kyu'n kykyaqil qe nasyon mojl kyyole kyuk'il, ya minti'tl kyaj kyi'je porke ma che k'ixb'iye wu'ne mer ik tza'n tu'n jun aj q'oj kyi'je. Kyuwxix kycastiwoye o kub' wu'ne tu'n tlaj nim kyb'inchb'ene mya b'a'n ex tu'n tlaj kyile nimxix.

¹⁵¿Tiqu'n in che sch'ine tu'n ta'w ẍil tok kyi'je? Minti' q'anb'il ti'j k'ixb'isab'l tok kyi'je. Tu'n tlaj nimxix kyb'inchb'ene mya b'a'n ex tu'n tlaj kyile nimxix, kyja'tzun ma nb'inchaye jlu kyi'je.

¹⁶Ex kykyaqil qeju ma che b'aj naje kyu'n, ax ikx kye che b'ajel naj, kykyaqil aj q'oj kyi'je che xel q'i'n pres tuj juntl tnam, ex qeju in xi kyelq'a'n aju at tuj kytanmiye, ax ikx kye kxel elq'a'n aju at tuj kytanmi; qeju in che el q'inte aju at kyeye, ax ikx kye k'elel q'i'n aju at kye.

¹⁷Che b'anixele wu'ne, k'okel nq'anine ẍil tok kyi'je maske in kyma'n qe aj q'oj kyi'je qa o kyaj kolin tnam Sión ex minti' jun tajb'il ti'j. Aqine Dios in chin q'mante jlu.

¹⁸Chi Qman kyja': Che ul meltz'aj qe tiyjil Jacob wu'ne, aqeju o che'x q'i'n tuj juntl tnam, ktzajel q'aq'an nk'u'je ti'j kytanmi, ax che jawil b'inchet tnam kyib'aj kytx'aqan ex ax kjawil b'inchet tja rey jatum tkub'toq tnejel.

¹⁹Kyuj qe tnam lu che b'itzal xjal te aq'b'il chjonte te Dios ex kb'injtzel kytzalajb'il. Mlay kub' naj kyajlal, porke wu'ne kchmetel kyb'et. Mlay che el ik'un kyu'n xjal, porke wu'ne che jawil nimsa'n.

²⁰Che okel aj Israel ik tza'n kyten nej; segurxix ktel kytanmi nwitze ex wu'ne kb'el kycastiw qe yajlal kye.

²¹Kyxolxtzun k'eletz jun nejenel kye ex kyxolx k'eletz jun kawil, ex ktzajel wi'ne tu'n ttzaj laq'e', atzun te tzul laq'e' wuk'ile, ex ¿alkye jun jaku tnimari tib' tu'n ttzaj laq'e' nwitze?

²²Che okel te jun tnam etzan wu'ne, atzun weye chin okele te Kydios. Aqine Dios in chin q'mante jlu.

²³Aju tq'oj Qman ik tten ik tza'n jun kyq'iq' jb'al, mer ik tza'n jun xkyaqinpaẍ, ex atzun k'okel jub'an kyi'j qeju b'inchal mya b'a'n.

²⁴Mlay chewix tq'oj Qman; maxi kchewixtel okxi tb'ant ex ok tjapun aju ximamaj tu'n. Tzul tq'ijlalil tu'n tel kynik'e ti'j jlu.