Read kumam Jeremías 32 Bible Online

Jeremías 32 - kumam bible

Jeremías 32

¹Tzaj yolin Qman tuk'il Jeremías tuj tlajin ab'q'i ttzyetlen tkawin Sedequías tuj Judá ex tuj twajxaqlajin ab'q'i ttzyetlen tkawin Nabucodonosor.

²Tuj tq'ijlalil lu in che q'ojintoq t-soldad rey te Babilonia ti'j tnam Jerusalén, ex atzunte Jeremías aju t-sanjel Dios presintoq tuj ttxa'n kype'n qe soldad xq'uqil tja rey te Judá, aju ttxa'n pe'n tokx tujxi ja,

³tu'nju otoq txi tma'n rey Sedequías tu'n tokx presin Jeremías tu'n tlaj xi tma'n kyja': Chi Qman: Kxel nq'o'ne amb'il tu'n ttzyet tnam lu tu'n rey te Babilonia ex tu'n tkyaj tjaq' tkawb'il,

⁴ex mlay tzoqpaj rey Sedequías tuj kyq'ab' aj Caldeo; ktzyetel kyu'n ex kxel kyq'o'n tuj tq'ab' rey te Babilonia; che yolil kab'e rey lu ex k'okel kyke'yin kywitz.

⁵Kxel q'i'n Sedequías tu'n Nabucodonosor max tuj Babilonia ex maxtzun kyjel ten nim ab'q'i okxi tkyim. Maske che q'ojine kyuk'il aj Caldeo pero mlayx che kamb'ane, chi Dios, chi Jeremías.

⁶Ax ikx xi tma'n Jeremías: Ma tzaj yolin Qman wuk'ile ex ma tzaj tma'n weye kyja':

⁷Tzul Hanameel aju tky'ajal Salum aju terman tmana, q'malte teya tu'n tkyaj tlaq'o'na jun piẍ ttx'otx' ta' tuj Anatot, porke aya mas at toklena ti'j tu'n tkyaj tlaq'o'na tu'nju at t-xilena tuk'il, chi Qman.

⁸Ik tza'nx otoq tzaj tma'n Qman weye, ultzun Hanameel wuk'ile ttxa'n kype'n qe soldad xq'uqil tja rey, ex tzaj tma'n weye kyja': Laq'o'n kyaja ntx'otx'e ta' tuj Anatot tuj kytx'otx' tiyjil Benjamín, porke aya at toklena ti'j tu'n tkyaj tlaq'o'na tu'n tok te tetzb'ila, chi Hanameel weye. Eltzun nnik'e ti'j qa tu'n Qman jlu,

⁹ex kyaj nlaq'o'ne ttx'otx' Hanameel aju tky'ajal terman nmane. Xi nq'o'ne wuqlaj saq pwaq te, ex atzun twi tx'otx' japun.

¹⁰Te tib'ajxitzun b'ant tu'jil wu'ne, ok sey ti'j, e jyet junjun testiw wu'ne tu'n kypirmarin ti'j ex kub' nmalo'ne saq pwaq tuj jun balans.

¹¹Xitzun wi'ne tu'jil tx'otx' tz'ib'an tkyaqil tuj, seyarimaj ex b'altz'imaj, tuk'ix juntl copya kukx katl,

¹²ex xi nq'o'ne te Baruc aju tky'ajal Nerías ex tal tchman Maasías; xi nq'o'ne te twitz Hanameel aju wermaniye, kywitz qe testiw otoq che pirmarin ti'j ex kywitz kykyaqil xjal Judiy q'uqlqe'toq ttxa'n kype'n soldad xq'uqil tja rey.

¹³Kywitztzun qe jlu xi nma'ne te Baruc kyja':

¹⁴Ate Qman aju Tajaw Tkyaqil ex Kydios aj Israel chi kyja': Q'inxa aju tu'jil tx'otx' b'altz'imaj, tuk'ix juntl copya kukx katl, ex k'u'nxa tuj jun tal xar tu'ntzun tten nim q'ij,

¹⁵porke chi Qman aju Tajaw Tkyaqil ex Kydios aj Israel kyja': Tzul tq'ijlalil che loq'ol juntl maj xjal kyi'j qe ja, qe kojb'il ex qe tqan uva tuj tx'otx' lu.

¹⁶T-xilenxitzun nq'o'ne tu'jil tx'otx' te Baruc aju tky'ajal Nerías, in ok tene na'l Dios kyja':

¹⁷Aya Nman Dios, tuk'il nim tipumala b'ant kya'j ex tx'otx' tu'na. Minti' jun mlaywit b'ant tu'na.

¹⁸In tzaj tyek'una tk'ujlalila kye ela' mil xjal, ax ikx in kub' tq'o'na kycastiw qe k'wa'lb'aj tu'n tlaj kyil qtzan kyman. Aya Dios, nimxix toklena ex at tipumala tu'n tb'ant tkyaqil tu'na, aju tb'iya atzun jlu: Qman Tajaw Tkyaqil.

¹⁹Nimxix tnab'la ti'j aju in kub' t-ximana ex ma'xix kyxilen qe tb'inchb'ena in che b'ant, in tila tkyaqil aju in b'ant kyu'n xjal, tu'n t-xi tq'o'na chojb'il kye ik tza'nx kyb'inchb'en ex ik tza'nx kyaq'unb'en.

²⁰Tu'na e b'ant qe señ ex qe b'inchb'en nim kyipumal tuj Egipto, ex kukx tb'ant tu'na ja'lo kyxol aj Israel ex kyxol kykyaqil xjal; kyja'tzun, b'i'maj tb'iya tuj tkyaqil twitz tx'otx' ex kukx ja'lo.

²¹Tuk'il nim tipumala e etz ti'na aj Israel tuj Egipto, aqeju etzan tu'na, e b'ant qe señ ex qe b'inchb'en nim kyipumal tu'na, kyja'tzun tzaj kyxob'il kykyaqil xjal.

²²Xi tq'o'na tx'otx' lu kye aj Israel, aju tx'otx' tb'anil ex q'inun tx'otx', ik tza'nx otoq txi ttziyana kye qtzan kyxe'chel.

²³Tejtzun kyul tuj tx'otx' lu ex tej tok te kye, minti' xi nimana kyu'n, minti' xi kyniman qe tleya ex mi jun tyola japun kyu'n, aju xi tma'na kye. Kyja'tzun ma tzaj t-sama'na tkyaqil k'ixb'isab'l lu kyib'aj.

²⁴Atzun ja'lo ma jaw kyb'incha'n aj Caldeo kyxwetzb'il tu'n kyok tzoqpaj q'ojlel ti'j tnam. Tu'n q'oj, we'yaj ex tx'u'j yab'il ktzyetel ju tnam lu kyu'n. Aya Nman, lu in tila ya ch'ix tjapun b'aj tkyaqil aju tzaj tma'na.

²⁵Nman, ma tzaj tma'na weye tu'n tlaq'et tx'otx' wu'ne ex tu'n tchjet wu'ne kywitz qe testiw, ex ch'ix ttzyet tnam kyu'n aj Caldeo, chi Jeremías.

²⁶Tzajtzun ttzaq'we'n Qman te Jeremías:

²⁷Aqine Dios, Kydios kykyaqil xjal, ¿Atpe jun ti'xti mlay b'ant wu'ne?

²⁸Kyja'tzun kxel nma'ne teya: Kxel nq'o'ne tnam lu tu'n ttzyet kyu'n aj Caldeo ex tu'n tkyaj ten tjaq' tkawb'il Nabucodonosor aju rey te Babilonia.

²⁹Qe aj Caldeo in che q'ojin ti'j tnam, ja'lo che oketz tuj ex k'okel kyqoptz'i'n q'aq' ti'j; kb'el tz'e'y kyu'n, kyuk'ix qe ja jatum in kub' kypatun storak kywi' twitz Baal ex jatum in kub' kyqo'n ta'l twitz uva kywitz qe tilb'ilal nno'k kydiosin; ex tu'n jlu ma tzaj nq'oje kyi'j.

³⁰Atxix t-xe tnejel qe aj Israel ex qe aj Judá o'kx in kyb'incha'n aju minti' in chin tzalaje ti'j, kukx in tzaj nq'oje kyu'n aj Israel tu'nju in che k'ulun kywitz qe tilb'ilal kyu'nx in kub' kyb'incha'n. Aqine Dios in chin q'mante jlu.

³¹Atxix tej tjaw b'inchet tnam lu, ax ikx ja'lo, minti' jun maj miwt in tzaj ntx'u'jile ex nq'oje kyu'n. Kyja'tzun kb'el naj tnam wu'ne.

³²Ma tzaj nq'oje tu'n tlaj tkyaqil mya b'a'n in kyb'incha'n aj Israel ex aj Judá, kyuk'ix kyrey, qe nejenel kye, qe pal at kyxol, qeju nno'k kyq'on kyib' te nsanjele ex kykyaqil qeju najl tuj Judá ex tuj Jerusalén.

³³Ma tz'ajtz kyq'o'n ttzal kyi'j nwitze ex maske kukx in xi nq'o'ne xnaq'tzb'il kye, minti' ma txi kyniman ex minti' ma txi kyb'i'n kawb'il kye wu'ne.

³⁴Malpe tz'okx kyq'o'n qe tilb'ilal ik'b'ilxix tuj njaye jatum in jaw nimsa'n nb'iye, ex tu'n jlu ma tz'ilix njaye kyu'n,

³⁵ex tuj chq'ajlaj Ben-hinom ma jaw kyb'incha'n qe altar te Baal tu'n tkub' kypatun kyky'ajal ex kyme'jel te chojb'il twitz Moloc; a jlu ik'unxix wu'ne, minti' xi nma'ne kye ex minti' ul ch'in tuj nximb'etze tu'n tb'ant kyu'n ikju, porke tu'n jlu ma kyb'incha aj Judá mya b'a'n nwitze.

³⁶Aqeye in kyma'ne qa tu'n tkyaj tnam lu tjaq' tkawb'il rey te Babilonia tu'n tlaj q'oj, we'yaj ex tx'u'j yab'il, atzunte Dios aju Kydios aj Israel in tma'n kyja':

³⁷Che okel nchmo'ne aj Israel ex che eletz wi'ne kyuj kykyaqil nasyon jatum o che pon nsputune tej ttzaj nq'oje ex ntx'u'jile xob'ajilxix, ex che ajetz wi'ne tu'n kyul tuj lugar lu, tu'ntzun kyanq'in tuj txub'txaj.

³⁸Che okel te jun tnam etzan wu'ne, atzun weye chin okele te Kydios.

³⁹Wu'ne k'okel kyanmi ex kyximb'etz te junx, tu'ntzun kyniman weye te jumajx, te jun b'a'n te kye ex te kye qe kyiyjil che ul itz'j te tib'ajxi.

⁴⁰Kyjel b'ant ti'j jun nyole te jumajx kyuk'il: Kxel ntziyane tu'n kukx tu'n nb'inchanteye b'a'n kye, ex wu'ne ktzajel nimxix kygan tu'n kyniman weye, tu'ntzun mi tel kypa'ntl kyib' wi'je.

⁴¹Chin tzalajele ok nb'inchanteye b'a'n kye; tu'n tkyaqil wanmiye ex axix tok wu'ne che ul wi'ne tu'n kynajan tuj tx'otx' lu.

⁴²Porke chi Qman: Ik tza'n o tzaj nsama'ne k'ixb'isab'l matijxix kyib'aj xjal lu, kyja'xtzun ktzajel nsama'ne tkyaqil b'a'n, ik tza'nx o txi ntziyane kye.

⁴³Ex klaq'etel juntl maj tx'otx' kyu'n xjal tuj tnam lu, aju in kyma'ne qa ktzyetel kyu'n aj Caldeo ex qa kyjel ten ik tza'n jun tzqij tx'otx' minti' xjal tuj, mi alumaj.

⁴⁴Che laq'etel tx'otx' ex kb'antel kyu'jil tuk'il sey ex kypirm testiw k'okel kyi'j. A jlu kb'antel tuj kytx'otx' aj Benjamín, kyuj qe aldey ti'jele tnam Jerusalén, kyuj qe tnam te Judá, kyuj qe tnam te tiwitz tx'otx', kyuj qe tnam ate' t-xe witz ex kyuj qe tnam ate' tuj tx'otx' Néguev, ok che ajetz meltz'aj wu'ne jatum otoq che pon q'i'n pres. Aqine Dios in chin q'mante jlu.