Read kumam Jeremías 39 Bible Online

Jeremías 39 - kumam bible

Jeremías 39

¹Tuj tlajin xjaw te tb'elajin ab'q'i ttzyetlen tkawin rey Sedequías tuj Judá, ul Nabucodonosor aju rey te Babilonia, kyuk'ix kykyaqil t-soldad, ex b'aj kytxolb'an kyib' ti'jele tnam Jerusalén.

²Tuj tb'elajin q'ij te tkyajin xjaw te tjunlajin ab'q'i ttzyetlen tkawin Sedequías, okx kypa'n aj q'oj jun piẍ muro tok ti'j tnam Jerusalén,

³ex kykyaqiltzun qe xjal ma' kyoklen ttxlaj rey te Babilonia e okx tuj tnam ex e kub' ten ttzi tlamel tkub' tuj tmij tnam Jerusalén. Atzun qe jlu: Nergal-sarezer, Samgar-nebo, Sarsequim, aju xjal lu ma'xix toklen, ex tuk'ix juntl Nergal-sarezer ax ikx ma'xix toklen ttxlaj rey, kyuk'ix txqantl nejenel ma' kyoklen ttxlaj.

⁴Tejtzun tlonte Sedequías ex qe t-soldad aju in b'aj, e ex oq tuj tnam te qonik'an, ttzi tlamel tkub'sa'n t-xol kab'e muro tuj b'e nne'x tuj tqan tawal rey, ex atzun b'e xi kyi'n, aju in pon tuj chq'ajlaj te nima Jordán.

⁵Ex e je'x lpe' qe soldad kye aj Caldeo kyi'j ex kub' ti'j Sedequías kyu'n tuj chq'ajlaj te tnam Jericó; tzyettzun kyu'n ex xi kyi'n tuj tnam Ribla tuj kytx'otx' aj Hamat, ex atzun ta'toq rey te Babilonia, ex atzun kub' t-sentens Sedequías tu'n Nabucodonosor.

⁶Axtzun tuj Ribla ex twitzx Sedequías, e kub' b'yo'n qe tk'wa'l kyuk'ix kykyaqil xjal ma' kyoklen tuj Judá.

⁷Te tib'ajxi e jatz q'i'n qe tb'aq' twitz Sedequías ex ok k'alo'n tu'n caden, tu'ntzun t-xi q'i'n tuj Babilonia.

⁸Ok kyqoptz'i'n aj Caldeo q'aq' ti'j tja rey ex kyi'j qe ja ate' tuj tnam ex kub' kytilin muro tok ti'jele tnam Jerusalén.

⁹Ax ikx te Nabuzaradán aju nejenel kye t-soldad rey te Babilonia, e je'x ti'n qe xjal pres, aqeju ch'intl otoq che kyaj ten, ax ikx e je'x ti'n qeju otoq txi kyq'on kyib' tuj kyq'ab' aj Caldeo; kykyaqiltzun e je'x ti'n tuj Babilonia.

¹⁰Ex e kyaj tq'o'n Nabuzaradán junjun xjal tuj tx'otx' Judá, aqeju mas tal meb'axix ex minti' ch'in at kye, ex xi tq'o'n kytx'otx' ex tqan uva kye.

¹¹Otoq kyaj tma'n Nabucodonosor aju rey te Babilonia, te Nabuzaradán aju nejenel kye t-soldad, jun orden ti'j Jeremías kyja':

¹²Q'intza ex kwentin oka, mi'n tb'inchaya mya b'a'n ti'j, noq o'kx b'inchama tkyaqil aju ktzajel tma'n teya.

¹³Ex, ate Nabuzaradán aju nejenel kye t-soldad rey, tuk'ix Nabusazbán aju nejenel kye qeju in che ajb'en te rey, ex Nergal-sarezer aju nejenel kye aj sanjelal, kyuk'ix txqantl xjal at kyoklen ttxlaj rey te Babilonia,

¹⁴xi kyma'n tu'n tetz q'i'n Jeremías tuj ttxa'n kype'n soldad, ex xi kyq'o'n tuj tkwent Gedalías aju tky'ajal Ahicam ex tal tchman Safán, tu'n t-xi' q'olte te max tja. Kyja'tzun kyaj ten Jeremías najal kyxol qe ttanmil.

¹⁵Tej tokxtoq Jeremías tuj pres ttxa'n kype'n qe soldad xq'uqil tja rey, aju ttxa'n pe'n tokx tujxi, tzaj yolin Qman tuk'il ex tma kyja':

¹⁶Txi'ya ex q'manxa te Ebed-melec aju aj Etiopía: Chitzun Qman aju Tajaw Tkyaqil ex Kydios aj Israel kyja': Kjapunel wu'ne aju o txi nma'ne tu'n tb'ant ti'j tnam lu; ktzajel mya b'a'n ti'j ex mya jun b'a'n, ex k'okel tke'yina ok tjapun jlu.

¹⁷Ex tuj tq'ijlalil lu ok kletela wu'ne, mlay kub' tz'aqa tuj kyq'ab' xjal lu, aqeju in xob'a kywitz. Aqine Dios in chin q'mante jlu.

¹⁸Axix tok ok kletela wu'ne tu'n mi'n tkub' b'yo'na kyu'n, ok kletela tu'nju ma tz'ok qe' tk'u'ja wi'je. Aqine Dios in chin q'mante jlu.