Read kumam Jeremías 4 Bible Online

Jeremías 4 - kumam bible

Jeremías 4

¹Chi Qman in tma'n: Qa kyajb'ile tu'n kyajtz meltz'aje wuk'ile aqeye aj Israel, b'a'n tu'n kyajtze. Qa ma tz'el kypa'n kyib'e kyi'j qe tilb'ilal ik'b'ilxix ex qa mi'n tz'el kypa'ntl kyib'e wi'je,

²ex qa ma txi kytziyane jun yol axix tok nwitze tuj tumelxix ex tz'aqlxix, k'okeltzun nb'iye te ky'iwb'il kye qe nasyon, ex kjawil kynimsa'n nb'iye.

³Chi Qman in tma'n kye xjal tuj Judá ex tuj Jerusalén: Kyq'u'n b'aje qe tx'otx' na'nx tb'aj q'u't ex mi'n kub' kyawa'n kyawale kyxol ch'i'x.

⁴Aqeye aj Judá ex aj Jerusalén, kysaqsame tuj kyanmiye ex tz'elx kynik'e wi'je, ax tok aqine Dios. Kyq'o'nkxe tuj kyanmiye aju techal ti'j ju yol kyaj b'ant ti'j wu'ne kyuk'ile, porke tu'n tlaj kyb'inchb'ene mya b'a'n jaku tzaj nq'oje kyi'je, ex aju nq'oje ik tten ik tza'n q'aq', ex ok ttzaj, mi jun xjal jaku yupj tu'n.

⁵Kyq'manxe jlu tuj Jerusalén ex kyxol aj Judá, kyq'ajtzanke chun kyuj kykyaqil tnam, kyxi q'ajte kyi'j kyuwxix wen ex kyq'manxe kyja': Chux qeye, qo' qe, e tok qchmon qib', qo okx kyuj qe tnam tok muro kyi'j.

⁶Kyi'n jawe bander twitz kya'j ex kyyek'unxe tumlal tnam Sión, kyel oqe, mi'n kub' kyyo'ne, porke tuj tx'otx' tuj tb'anq'ab' q'ij ktzajel wi'ne jun matij k'ixb'isab'l ex jun matij xitb'il kyib'aje.

⁷Ik tza'n jun b'alun nne'tz tuj chk'ul, iktzun ma tz'etz ju xitb'il kye tnam; ya kyja' ttzaj tuj b'e; ma tz'etz tuj ttanmi tu'n tul xitul kytanmiye; che najel qe tnam tu'n ex minti' xjal kyjel ten kyuj.

⁸Kyja'tzun, kyq'o'nke kyxb'alune ch'i'x twitz, che oq'e ex che uxine tu'n ta'w k'ixk'oj, porke minti'x tumel tu'n tchewix tq'oj Qman qi'j.

⁹Chi Qman in tma'n: Tuj q'ij ok ttzaj jlu, ktzajel b'aj tk'u'j rey, ikx qe nejenel; ktzajel t-xob'il kyi'j qe pal ex b'i'x che sek'pajtel qeju nno'k kyq'o'n kyib' te nsanjele.

¹⁰Atzun weye xi nma'ne: Ay Nman, ¿tza'n tten ma che kub' t-sb'u'na qe xjal aj Jerusalén? Xi tma'na qa tu'n kyanq'in tuj txub'txaj, ex atzun ja'lo b'anin tten spad kyi'j tu'n kykub' b'yo'n.

¹¹Oktzun tpon tq'ijlalil jlu, kxel q'met kye xjal aj Jerusalén: Kyja' ttzaj jun kyq'iq' kyaq wen tuj tzqij tx'otx', ex ktzajel t-xupin kylugaril qe xjal etzan wu'ne. Ex aju kyq'iq' tzul mya aju in ajb'en te xupb'il tuj triw;

¹²aju kyq'iq' tzul wu'ne mas nimxix tipun twitzju in ajb'en te xupb'il tuj triw. Kyja'tzun kxel nma'ne kyja': Ja'lo tzul jwisi kyib'aj wu'ne.

¹³Kyke'yinxe qe aj q'oj in b'et kytzaj ik tza'n jun muj; aju kycarwaj te kyq'ojb'il ik kyten ik tza'n jun xkyaqinpaẍ, ex qe kychej masxix che ojqelan ik tza'n qe t'iw in che lipan twitz kya'j. Ay b'ek'b'il qwitz, ma qo najx.

¹⁴Aqeye aj Jerusalén, kytx'jome aju mya b'a'n tuj kyanmiye tu'ntzun kyklete. ¿Jtoj b'an tkyaj kykoline kyximb'etze mya b'a'n?

¹⁵Max tuj tnam Dan ex kywi' qe tal witz tuj kytx'otx' aj Efraín in tzaj tqanil mya b'a'n tzul kyib'aje.

¹⁶Kyq'manxe kye txqantl nasyon ex kye aj Jerusalén kyja': Tuj jun tnam najchaq ma che tzaj aj q'oj lu, in che sch'in wen tu'n kyok tzoqpaj q'ojlel kyi'j qe tnam ate' tuj Judá.

¹⁷Ik tza'n nno'k kwentin jun kojb'il kyu'n xjal, iktzun ma b'aj kytxolb'an kyib' aj q'oj ti'jele Judá, porke ma jaw kyi'n kyib' wi'je. Aqine Dios in chin q'mante jlu.

¹⁸Aju kymodiye ex aju kyb'inchb'ene atzunju ma tzaj q'inte mya b'a'n kyi'je ja'lo, aju kyb'inchb'ene mya b'a'n, atzunju ma tzaj q'inte mya b'a'n kyib'aje, ik tza'n jun k'ab'j k'a ma pon ta'w ti'j kyanmiye.

¹⁹In jaw nxqutz'in wib'e tu'n ta'w k'ixk'oj. Ma tzaj ta'w tuj wanmiye tu'n b'is, in putin wanmiye ex mlay chin q'ajene tu'n t-xi nma'ne aju ma nb'iye. Ma nb'iye tq'ajq'ajel chun ex tq'ajq'ajel kywi xjal in che q'ojin.

²⁰Ma tzul tqanil ti'j nimku mya b'a'n ma tzaj; ok in b'aj jun in tzaj juntl, kykyaqil tnam ya ma che kub' b'aj xitj. Te jurat naj ma che kub' xitj kyja qe njxalile ex ma che naj qe kyja xb'alun ja.

²¹¿Jte'tzun q'ijtl chin ke'yile ti'j bander yob'in twitz kya'j kyu'n aj q'oj, ex tu'n t-xi nb'i'ne tq'ajq'ajel twi chun?

²²Chi Qman in tma'n: Qe xjal etzan wu'ne mib'an tz'okx tuj kywi', minti' ojtzqi'n qine kyu'n. Ik kyten ik tza'n qe k'wa'l minti' kynab'l ex minti' nne'l kynik' ti'j. O'kx at kynab'l tu'n tb'ant mya b'a'n kyu'n, atzunju b'a'n, minti' nne'l kynik' ti'j tza'n tten tu'n tb'ant.

²³Xi nke'yine tx'otx' otoq tz'ok te minti' ttxolil ex minti' at twitz, xi nke'yine twitz kya'j ex minti'toq spik'un at twitz.

²⁴Xi nke'yine qe nmaq witz in che lu'luntoq ex kykyaqil tal witz in che yukchtoq.

²⁵Xi nke'yine minti' jun xjal at ex kykyaqil qe chyu'j otoq che ex b'aj oq.

²⁶Xi nke'yine ex aju tb'anil tx'otx' otoq tz'ok te tzqij tx'otx', ex kykyaqil tnam otoq che kub' b'aj xitj. Tkyaqil jlu o naj tu'n tq'oj Qman xob'ajilxix.

²⁷Chi Qman in tma'n: Kb'ajel naj aju at twitz tx'otx' lu, ex mlay kub' nxitune tkyaqil.

²⁸Knojel twitz tx'otx' tu'n b'is ex k'okel qlolj twitz kya'j, ex atzun jlu o txi nma'ne, o kub' nximane; mlay ch'expet nximb'etze ex mlay tzik'x ti'j.

²⁹Ok tb'injtz tq'ajq'ajel kywi qe q'ojlel kyjax kyib'aj chej ex qe q'ojlel xo'l plech, kykyaqil xjal ate' tuj tnam che elex oq, che xe'l ewal kyib' tjaq' chk'ul ex che jawix ewal kyib' kyxol pik; kykyaqil xjal kyjel kykolin kytanmi, minti' jun kyjel ten najal tuj.

³⁰Atzun teya tnam Jerusalén o kub' xitja, ¿tiqu'n nno'k tq'o'na t-xb'aluna tb'anilxix kyaq ke'yin? ¿Tiqu'n nno'k tq'o'na adorn q'an pwaq ti'ja? ¿Tiqu'n nno'k tq'o'na tk'a' twitza q'eq ke'yin? Noqx gan in b'aj tb'inchan tib'a, porke qe xinaq in tzalaja kyi'j ma tz'el ik'una kyu'n, noq o'kx in che jyon tumel tza'n tten tu'n tkub' b'yo'na kyu'n.

³¹In nb'i'ne tq'ajq'ajel k'ixk'oj mer ik tza'n tq'ajq'ajel twi jun xu'j ok nnu'l itz'j tnejel tal; a jlu tq'ajq'ajel kywi xjal aj Sión in che wuyin, nne'l kynuqpi'n kyq'ab' ex in kyma'n: Ay, b'ek'b'il qwitz, ma qo kub' numj, qo b'el b'yo'n kyu'n qe b'yol xjal.