Read kumam Jeremías 40 Bible Online

Jeremías 40 - kumam bible

Jeremías 40

¹Tzaj yolin Qman tuk'il Jeremías tetzlenxi q'i'n tuj pres tu'n Nabuzaradán aju nejenel kye soldad. Ok noj Nabuzaradán ti'j Jeremías tej presintoq ex k'alo'ntoq tu'n caden kyxol aj Jerusalén ex aj Judá, aqeju b'anin kyten tu'n kyxi q'i'n pres tu'n kypon tuj Babilonia, ex kyaj tzoqpi'n Jeremías tu'n tuj tnam Ramá.

²Part xi q'i'n Jeremías tu'n nejenel kye soldad ex xi tma'n te kyja': Ate Qman aju Tdiosa o tma tu'n ttzaj mya b'a'n tib'aj tx'otx' lu,

³ex matzun japun ja'lo aju o tma, ma tzaj jlu kyi'j t-xjalila porke o che b'inchan il twitz Qman ex minti' xi kyniman.

⁴B'intza, texju ja'lo k'elel wi'ne caden ti'j tq'ab'a, aju k'alo'na tu'n. Qa tajb'ila tu'n t-xi'ya wuk'ile tuj Babilonia, b'a'n tu'n t-xi'ya, jaku tz'ok nkwentina, ex qa tk'i'ya tu'n t-xi'ya wuk'ile, b'a'n tu'n tkyaj tena. Ke'yinxa, lu tkyaqil tx'otx' tkub' twitza, ex b'a'n tu'n t-xi'ya noq jatum taja.

⁵Qa tajb'ila tu'n tkyaj tena, txi'ya tuk'il Gedalías aju tky'ajal Ahicam ex tal tchman Safán, aju ma tzaj q'o'n toklen tu'n rey te Babilonia tu'n tkawin kyib'aj qe tnam te Judá; tenkja tuk'il ex kyuk'il qe ttanmila. Ex qa mi'n, b'a'n tu'n t-xi'ya noq jatum taja, chi nejenel kye soldad. Xitzun tq'o'n jun oyaj te Jeremías, tuk'ix ch'in twa, ex b'aj kyq'olb'en kyib'.

⁶Xi'tzun Jeremías tuk'il Gedalías ma tuj tnam Mizpa, axtzun kyaj ten tuk'il ex kyuk'il qe xjal otoq che kyaj ten tuj Judá.

⁷Tej kyb'inte kykyaqil nejenel kye soldad Judiy, kyuk'ix qe kyxjalil aqeju ate'toq tuj kojb'il, qa otoq txi tq'o'n rey te Babilonia toklen Gedalías aju tky'ajal Ahicam, tu'n tkawin tuj tx'otx' Judá, ex qa tuj tkwent otoq che kyaj q'o'n qe xinaq, qe xu'j ex qe k'wa'l, aqeju mas tal meb'axix, aqeju minti' e je'x q'i'n pres tuj Babilonia,

⁸e je'x tuk'il Gedalías tuj tnam Mizpa ex atzun qe jlu: Ismael aju tky'ajal Netanías, Johanán ex Jonatán aqeju tky'ajal Carea, Seraías aju tky'ajal Tanhumet, kyuk'ix qe tky'ajal Efai aju aj Netofa, ex Jezanías aju tky'ajal jun xinaq aj Maacat, kyuk'ix qe kyxjalil.

⁹Atzunte Gedalías xi tkyuwsa'n jun yol axix tok kye qe xinaq lu ex kye kyxjalil: Mi'n che xob'e tu'n tokx kyq'on kyib'e tjaq' kykawb'il aj Caldeo, ax che anq'ine tuj tx'otx' lu, kyq'on okx kyib'e tjaq' tkawb'il rey te Babilonia ex b'a'n k'elel te kyeye.

¹⁰Atzun weye, ax chin kyjel tene tuj tnam Mizpa tu'ntzun nyoline kyi'je kywitz aj Caldeo ok kyul tzalu. Kychmo'n b'aje ta'l twitz uva, tuk'ix twitz awal ex chib'j aseyt, kyk'u'nxe kyuj qe k'ub'l kye ex axtzun che tenkje kyuj tnam jatum ate'ye, chi Gedalías.

¹¹Ax ikx qe xjal Judiy, aqeju ate' tuj tnam Moab, tuj Amón, tuj Edom ex kyuj txqantl tnam, o kyb'i qa otoq txi tq'o'n rey te Babilonia amb'il kye junjun xjal Judiy tu'n ax tu'n kykyaj ten tuj tx'otx' Judá, ex qa otoq txi tq'o'n toklen Gedalías tu'n tkawin kyib'aj.

¹²E tzajtzun tuj tkyaqil part jatum otoq che b'aj sputj, e ul meltz'aj juntl maj tuj Judá, ex e ul tuk'il Gedalías tuj tnam Mizpa. Ax ikx kye b'aj kychmo'n ta'l twitz uva ex nimxix twitz awal.

¹³Ate Johanán aju tky'ajal Carea, kyuk'ix txqantl nejenel kye soldad, aqeju ax ate'toq tuj kojb'il, e je'x tuk'il Gedalías tuj tnam Mizpa,

¹⁴ex xi kyma'n te kyja': —¿Minti'pe b'a'n tu'na, ma tzaj sama'n Ismael aju tky'ajal Netanías, tu'n Baalis aju rey kye aj Amón, tu'n tkub' b'yo'na tu'n? Che chi. Atzunte Gedalías minti' xi tniman.

¹⁵Xitzun tma'n Johanán te Gedalías tuj ewaj: —Q'ontza amb'il weye tu'n nxi'ye b'yolte te Ismael ex mi jun jaku b'inte alkye otoq kub' b'yonte te. ¿Tiqu'ntzun kxel qq'o'n amb'il te tu'n tkub' b'yo'na tu'n? Ex qa ma kub' b'yo'na tu'n, jaku che el sputj qe xjal ma tz'ok kychmon kyib' tuk'ila ex jaku che b'aj naj aj Judá, aqeju nik'xi kyb'aj ma kyaj ten.

¹⁶Atzunte Gedalías xi ttzaq'we'n: —Mi'n tb'inchaya ikju, aju in tma'na ti'j Ismael mya ax tok.