Read kumam Jeremías 43 Bible Online

Jeremías 43 - kumam bible

Jeremías 43

¹Tej tb'aj tma'n Jeremías tkyaqil aju tzaj q'ma'n te tu'n Qman aju Kydios tu'n t-xi tma'n kye tnam xjal,

²ate Azarías aju tky'ajal Osaías, tuk'ix Johanán aju tky'ajal Carea, ex txqantl xinaq aqeju jawni qe, xi kyma'n te Jeremías kyja': Aju in tma'na noq tten. Mya a Qman aju Qdios ma tzaj q'mante teya ti'j ju ma tzaj tma'na qeye, tu'n mi'n qxi'ye najal tuj Egipto.

³Ate Baruc aju tky'ajal Nerías in oksante tk'u'ja tu'n ttzaj tma'na jlu qeye, tu'ntzun qkub' tz'aqe tuj kyq'ab' aj Caldeo, tu'ntzun qkub' b'yo'ne kyu'n ex qa tu'n qxi q'i'ne kyu'n tuj Babilonia, che chi.

⁴Kyja'tzun, ate Johanán ex qe nejenel kye soldad kyuk'ix kykyaqil xjal, minti' xi kyniman aju tzaj tma'n Qman kye tu'n kykyaj ten tuj tx'otx' Judá.

⁵Noq o'kx ate Johanán, kyuk'ix qe nejenel kye soldad, e ok kychmo'n qe xjal, aqeju otoq che b'aj sputj tuj junjun nasyon ex otoq che ul meltz'aj juntl maj tu'n kynajan tuj tx'otx' Judá,

⁶kyuk'ix qe xinaq, qe xu'j, qe k'wa'l, qe tme'jel rey ex kykyaqil xjal, aqeju otoq che kyaj q'o'n tuj tkwent qtzan Gedalías tu'n Nabuzaradán aju nejenel kye soldad, ex tuk'ix Jeremías ex Baruc e ok te tajlal.

⁷E je'x tuj Egipto ex e pon max tuj tnam Tafnes, porke minti' xi kyb'i'n aju otoq tzaj tma'n Qman kye.

⁸Maxtzun tuj tnam Tafnes tzaj yolin Qman tuk'il Jeremías ex tma:

⁹Q'intza junjun ma tij ab'j, ex kywitztzun aj Judá, maqu'n ku'xa qe jatum tkub' piso tumlal ttzi tja rey Faraón tuj tnam Tafnes,

¹⁰ex q'manxa kye: Ate Qman aju Tajaw Tkyaqil ex Kydios aj Israel chi kyja': Ktzajel wi'ne nmajene Nabucodonosor, aju rey te Babilonia, ex kb'el nq'o'ne tq'uqb'il kyib'aj qe ab'j ma che ku'x tmaqu'na tzalu, ex kjawil tlik'un t-xmuj kyib'aj.

¹¹Tzul rey Nabucodonosor q'ojlel ti'j Egipto. Aqeju b'anin kyi'j tu'n kykyim, che kymel, aqeju b'anin kyi'j tu'n kyxi q'i'n pres tuj juntl tnam, che xel q'i'n pres, ex aqeju b'anin kyi'j tu'n kykyim tuj q'oj, tuj q'oj che kymel.

¹²K'okel tq'o'n tq'aq'al kyja kydios xjal tuj Egipto ex che xel ti'n qe tilb'ilal nno'k kydiosin; kxel ti'n tkyaqilju at tuj tnam Egipto ik tza'n jun pastor in b'aj t-squk'in ti'j t-ẍjo'w, ex mi jun klab'tel ti'j ok taj meltz'aj.

¹³Ax ikx kb'el t-xitun qe tqan adorn tok kyilb'ilal kyi'j, aqeju ate' tuj Bet-semes aju at tujx tkwent Egipto, ex k'okel tq'o'n tq'aq'al kyja kydios xjal aj Egipto.