Read kumam Jeremías 46 Bible Online

Jeremías 46 - kumam bible

Jeremías 46

¹Tzaj yolin Qman tuk'il Jeremías ex tzaj tma'n qe yol lu kyi'j qe nasyon.

²Aju tqanil lu o yolinjtz ti'j tnam Egipto ex kyi'j t-soldad Faraón Necao aju rey te Egipto, tej tkub' kyi'j tu'n Nabucodonosor tuj Carquemis, aju tkub' ttxlaj nima Éufrates, tuj tkyajin ab'q'i ttzyetlen tkawin Joacim aju rey te Judá ex tky'ajal Josías.

³Kyb'inchame kyten kykyaqil txkaj maqb'il ex kyxi'ye tuj q'oj.

⁴Kyb'inchame kyten chej jawolte carwaj, ex kyjaxe chejil kyib'aj txqantl chej, kyq'o'n jaxe kypasb'ile k'uxb'il ex kytxolb'anx kyib'e, kyjaqun b'aje ttzi kyspadiye ex kyq'o'nke kychikyete k'uxb'il.

⁵Ex ¿ti ma wile? Ma che ajtz oq qe soldad aj Egipto tu'n kyxob'il, ma kub' kyi'j, qe q'ojlel ma che el oq ex mi tu'n taj kyke'yin kyi'jxi; at xob'ajil tuj tkyaqil lugar. Aqine Dios in chin q'mante jlu.

⁶Mlayx b'ant tu'n kyel oq qeju kyuw che ojqelan ex mi tu'n kytzoqpaj qeju at nimxix kyipun. Max tuj tb'anq'ab' q'ij, ttxlaj nima Éufrates ma che jaw tolj ex ma che kub' tz'aq.

⁷¿Alkyetzunju in ch'iy tjaw ik tza'n nima Nilo, ik tza'n jun nima in jululun?

⁸A Egipto in ch'iy tjaw wen, ik tza'n nima Nilo, ik tza'n jun nima in pulin wen. Che chi aj Egipto kyja': Qo ch'iyil ex kb'ajel noj tkyaqil twitz tx'otx' qu'n, che b'el qxitun qe tnam kyuk'ix qe xjal najl kyuj, che chi.

⁹Che qeline aqeye chej, che qeline kyuw aqeye kyjax kyuj qe carwaj te q'ojb'il. E tkub' b'e kyu'n qe soldad te Etiopía ex te Put, aqeju b'anin kyten tuk'il kymaqb'il ex qe soldad te Lud, aqeju b'a'n che xo'n plech.

¹⁰Aju q'ij lu, atzun tq'ijlalil Qman aju Tajaw Tkyaqil, atzun q'ij kxelil tu'n Qman kyi'j qe aj q'oj ti'j. Che b'el tb'yo'n qe xjal tu'n spad okxi tb'aj tgan tu'n tb'iyan, ex k'elel nim kychk'el xjal tu'n, porke tu'n Qman aju Tajaw Tkyaqil k'okel jun matij b'iyenj, ik tza'n jun chojb'il twitz Qman, tuj tx'otx' tuj tb'anq'ab' q'ij aju tkub' ttxlaj nima Éufrates.

¹¹Aqeye aj Egipto, kyxi'ye jyolte remey tuj Galaad, ex maske tz'ajb'en nimku remey kyu'ne, mlayx q'anan kyi'je, porke minti' q'anb'il kyeye.

¹²Ma kyb'i txqantl nasyon qa ma kub' kych'ixwiye, ex tuj tkyaqil twitz tx'otx' ma b'injtz tq'ajq'ajel kywi'ye in che oq'e porke aqeju kysoldadiye kyuwxix kyk'u'j tuj q'oj in che jaw tolj jun ti'j juntl ex kykab'il in che kub' tz'aq twitz tx'otx'.

¹³Tzaj yolin Qman tuk'il Jeremías aju t-sanjel, tej ttzaj Nabucodonosor aju rey te Babilonia q'ojlel ti'j tnam Egipto, ex tma kyja':

¹⁴Kymanxe tqanil lu tuj Egipto, tuj Migdol, tuj Menfis ex tuj Tafnes: Kyb'incham kytene, noq list che tenkuye, porke lu in che naj xjal tu'n spad ti'jele tnam.

¹⁵¿Tiqu'n ma che el oq qe t-soldadiye kyuw kyk'u'j tuj q'oj? ¿Tiqu'n minti' ma kyipa tu'n kykub' we' kywitz aj q'oj? Porke wu'ne ma che kub' tz'aq, aqine Dios.

¹⁶Ma che jaw tolj kysoldadiye, ma che kub' tz'aq jun tib'aj juntl ex in kyma'n kyxolx: Che we'ktze, e qaj meltz'aj tuj qtanmi, tuj tnam jatum o qo itz'j, e qel oq twitz q'oj kyuwxix wen, che chi.

¹⁷Kymanxe ti'j Faraón aju rey te Egipto kyja': Nim in b'aj tyolin tib', ex ok tpon tq'ijlalil, minti' ch'in in b'ant tu'n, che chikuye.

¹⁸Aqine Rey ex aju nb'iye atzun jlu, Dios Tajaw Tkyaqil, kxel nma'ne jun yol axix tok: Ik tza'n witz Tabor matijxix twa'l, ex ik tza'n witz Carmelo aju tkub' ttxlaj mar, kyja'tzun kyten qe aj q'oj che ul.

¹⁹Aqeye najl tuj Egipto, kyb'incham kytene tu'n kyxi q'i'ne pres tuj juntl tnam, porke aju tnam Menfis k'okel te jun tzqij tx'otx', b'i'x kb'ajel xitj ex mi jun xjal kyjel ten tuj.

²⁰Aju tnam Egipto ik tten ik tza'n jun tal vac tb'anilxix ke'yin, ex tuj tx'otx' tuj tb'anq'ab' q'ij ktzajel jun xkatz tx'a'l ti'j.

²¹Ax ikx qe soldad te junxitl tnam otoq che tzaj txko'n te onil, ik kyten ik tza'n qe tal wakẍ ulni kynab'l, ax ikx kye che elel oq, mlay che we' kywitz aj q'oj, porke ma pon tq'ijlalil tu'n kynaj, atzun or tu'n tkub' kycastiw.

²²Che elel oq aj Egipto in che q'ajt ik tza'n jun lob'aj jililin tel; ok kyul laq'e' qe soldad aj q'oj kyi'j ex ok kyok tzoqpaj kyi'j tuk'il siwb'il k'uxb'il mer ik tza'n in che tx'emin tze',

²³ex mer ik tza'n in che tx'emin tqan tze' pin wen. Aqine Dios in chin q'mante jlu. Ok kyul, mas nim kyajlal ik tza'n qe ẍplon, ex mi jun jaku b'ant tajlante kye.

²⁴Kb'el kych'ixwi aj Egipto ex che kyjel ten tjaq' tkawb'il nasyon tuj tb'anq'ab' q'ij.

²⁵Ate Qman aju Tajaw Tkyaqil ex Kydios aj Israel chi kyja': Kb'el tcastiw Amón wu'ne, aju kydios aj Tebas, ax ikx kb'el kycastiw aj Egipto wu'ne, kyuk'ix kydios ex kyrey, ax ikx te Faraón kyuk'ix qeju nno'k qe' kyk'u'j ti'j.

²⁶Che xel nq'o'ne tu'n kykyaj ten tjaq' tkawb'il Nabucodonosor aju rey te Babilonia, ex tjaq' kykawb'il qeju at kyoklen ttxlaj, aqeju nno'k tilil kyu'n tu'n kykub' b'yo'n. Ex te tib'ajxi che pol xjal juntl maj najal tuj tnam Egipto ik tza'nx tten nej. Aqine Dios in chin q'mante jlu.

²⁷Mi'n che xob'e aqeye tiyjil Jacob aju ajb'el weye. Mi'n tzaj kyxob'ile aqeye aj Israel, porke aqeye kyuk'ix qe kyiyjile che kletele wu'ne tuj tnam najchaq jatum che pol q'i'ne; che anq'ile juntl maj tuj txub'txaj ex mi jun k'okel xob'tzante kyeye.

²⁸Aqine Dios in chin q'mante jlu. Mi'n che xob'e aqeye tiyjil Jacob aju ajb'el weye, porke atine kyuk'ile. Che b'ajel nxitune kykyaqil nasyon jatum otoq che b'aj nsputune, atzun kyeye mlay che b'aj naje wu'ne; o'kx kb'el nq'o'ne kycastiwoye ik tza'n kyb'inchb'ene, ex mlayx tzik'x ti'j tu'n mi'n tkub' kycastiwoye wu'ne.